Biez prezydenta rakiety nie ŭviazieš

Apošnija pajezdki aficyjnaha lidera stvarajuć uražańnie, što ŭ pytańniach pijaru ź im ščylna pracujuć daśviedčanyja admysłoŭcy.

Padčas vizytaŭ z farmalna haspadarčym uchiłam niazmušana, u formie ekspromtaŭ, dajucca adkazy na tyja pytańni, što abmiarkoŭvajucca na kuchniach dy palityčnych sajtach u niavyhadnym dla ŭłady rakursie.

Tak, vielmi imavierna, što zvyšzadačaj niadaŭniaha naviedvańnia fabryki harodniny byŭ adkaz amataram temy prezydenckaha zdaroŭja. Adkaz u duchu viadomaha anekdotu: nie dačakajeciesia!

Siońnia padčas naviedvańnia Bresckaj vobłaści zakranalisia i zusim nie lakalnyja prablemy. Tak, elektaratu patłumačana, što zdabyča nafty ŭ Venesuele — nie maniłaŭski pražekt. I ŭvohule: Biełaruś daloka prasunułasia što da dyversyfikacyi pastavak "čornaha zołata". Karaciej, nasielnictvu naviavajecca spakoj u adčuvalnym pytańni enerhanośbitaŭ.

Znoŭ zajaŭlena, što dyjaloh z Eŭraźviazam nie zaškodzić, ale — biez "padvojnych i patrojnych standartaŭ". To bok pra svaje 12 umoŭ Bruselu lepiej i nia maryć. Naadvarot, heta Miensk stavić apryjornuju umovu: skasavać sankcyi. Raźlik ža robicca na toje, što ŭ Eŭropy jość i vyklučna prahmatyčnyja matyvy supracoŭničać ź biełaruskaj uładaj.

Peŭna ž, nie vypadkova było padniataje pytańnie pra raźmiaščeńnie elementaŭ amerykanskaj supraćrakietnaj abarony ŭ Čechii dy Polščy. Tut Alaksandar Łukašenka i sam užyŭ słova "pijar". Jon nazvaŭ pijaraŭskaj akcyjaj infarmacyju rasiejskich medyjaŭ ab raźmiaščeńni na našaj terytoryi ichnich rakietaŭ siaredniaj dalokaści (u adkaz na plany vierałomnych janki).

"Biez prezydenta Biełarusi nichto nia maje prava ŭvieźci ŭ respubliku i zvyčajnuju rakietu, a nia toje što ź jadravym načyńniem", — zajaviŭ Łukašenka, davodziačy niasłušnaść na siońniašni dzień nadrukavanaj u maskoŭskaj presie "mapy adekvatnaha adkazu".

Takim čynam, treba razumieć, siońnia z Brestčyny Zachadu aperatyŭna dasłany mesydž, kab tam pakul što nadta nie pierajmalisia. Sapraŭdy, našto lišni raz dražnić byka?

Taksama ŭskosna pryznana, što nia varta było ryzykavać žyćciami avijataraŭ paśla taho, jak nad Mahadyša padbili naš pieršy samalot.

Nu i, narešcie, što da "ziamnych kłopataŭ chlebaroba", deklarujecca novy padychod: usio, šanoŭnyja, era datacyjaŭ skončyłasia, kroŭ z nosu zabiaśpiečvajcie rentabielnaść!

Uvohule, vy, musić, zaŭvažyli: aficyjny lider staŭ nastojliva paŭtarać, što mianiaje styl kiravańnia. Z puhaj stajać nad roznymi načalnikami nie źbirajecca, a spytaje za kančatkovy vynik. Tak što, mahčyma, selektarnych naradaŭ my bolej nia ŭbačym.

U sytuacyi, kali ekanomika moža pachisnucca, lahična apryjory pierakłaści adkaznaść na ŭrad i vertykal. Pry nievykanańni sakramentalnych prahnoznych pakazčykaŭ — fihuralnaja siakir-baška. Elektarat pa-raniejšamu lubić sceny publičnaha pakarańnia "kiepskich bajaraŭ".

• 0
• 0
• 0
• 0
• 0
• 0
• 0
• 0