Śvinakompleks Čyža na Vałožynščynie: Sasnoŭski kliča ludziej na słuchańni
Hramadskija słuchańni adbuducca 31 žniŭnia ŭ Piaršajach.
Viasnoj hetaha hoda ŭ Vałožynskim rajonie Minskaj vobłaści STAA «Danprad» (ułasnaść Juryja Čyža), pačało budavać śvinakompleks ahulnaj płoščaj 2,5 tys. ha na 110 tys. hałoŭ.
Budoŭla zakranaje vioski Daŭhuleŭščyna (z chutarami), Kaniušaŭščyna (radzima eks-premjera Viačasłava Kiebiča), Makryčaŭščyna, Łajkoŭščyna, Suhvazdy, Puhačy (radzima paeta Viktara Šnipa), Łasokina, Ciabuty.
U hetych miaścinach maje chutar i lidar hurtu «Stary Olsa» Źmicier Sasnoŭski. Jon paviedamiŭ NN, što na słuchańni pojdzie i arhanizuje transpart dla žycharoŭ navakolnych viosak. Muzyka stvaryŭ u sacyjalnaj sietcy «Ukantakcie» admysłovuju supołku «Suprać śvinstva». Zaraz u joj 129 čałaviek.
Śvinakompleks płanujecca ŭzvodzić pa dackaj technałohii, jakaja praduhledžvaje sanitarnuju zonu ŭsiaho 1 km, niahledziačy na pamiery kompleksu. Mnohija chaty ŭ vioskach u hetuju zonu traplajuć.
Ekałahičnuju ekśpiertyzu prajekta pravodziła pryvatnaje pradpryjemtsva «Navukova-vytvorčaja firma «Ekałohija». Pavodle ich zaklučeńnia,
«pry strohim vytvorčym ekałahičnym kantroli niehatyŭny ŭpłyŭ na navakolnaje asiarodździe budzie niaznačnym».
Z hetym nie pahadžajecca žychar Vałožyna inžynier-hidratechnik Hieorhij Karžanieŭski.
«Lepš by na hetym miescy ŭvohule ničoha nie budavali. Hety rehijon ličać žamčužynaj staroj Litoŭskaj (Nalibockaj) puščy», kaža mužčyna.
Kali ž paźbiehnuć budoŭli nie mahčyma, to «najmienšym złom» byŭ by pieranos śvinafiermy na 700-800 mietraŭ na poŭnač, dalej ad raki.
Karžanieŭski davodzić, što
adkidy śvinahadoŭli składuć nie 82 tysiačy kuboŭ, jak napisana ŭ spravazdačy «Ekałohii», a 450 tysiač kubamietraŭ u hod (hł. fota).U rajonnym upraŭleńni sielskaj haspadarki, kudy jon źviarnuŭsia, na 110 tysiač śviniej naličyli mienšuju kolkaść adkidaŭ: 313 tysiač kuboŭ. Ale i heta amal u 4 razy bolš za aficyjnuju ličbu.
Kab pierapracavać takuju kolkaść adkidaŭ, vałožynski inžynier raić vykarystoŭvać inšuju sistemu ačystki stokaŭ. A lepš – utraja źmienšyć pamiery pradpryjemstva.
Śvinakompleks na 110 tysiač śviniej inačaj jak «bijałahičnaj bombaj» nie nazavieš.
Svaje parady i prapanovy Karžanieŭski dasłaŭ «Danpradu», «Ekałohii» i rajvykankamu (hł. fota). Adnak ci prysłuchajucca da ich čynoŭniki – stanie viadoma na słuchańniach.
Miesca praviadzieńnia słuchańniaŭ 31 žniŭnia: v.Piaršai, Piaršajski sielski saviet.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary