Plušavyja miški takoha nie čakali

Supracoŭniki šviedskaha pijar-ahienctva Studio Total zładzili bliskučuju pavodle miedyjnaha efiektu akcyju. Praŭda, šviedy naŭrad ci čakali takich nastupstvaŭ. Nie znajomyja z noravami Minska, jany naŭrad ci dumali, što ich biasškodnaja akcyja paciahnie za saboj uziaćcio novych zakładnikaŭ u Biełarusi i dypłamatyčny kryzis.

SPA tut ni pry čym

Kali b samalot sa šviedami pasadzili, ich čakaŭ by sud i turma. Čamu hetaha nie zdaryłasia?

Šerah analitykaŭ, u pryvatnaści, Andrej Suzdalcaŭ z Maskvy, paśpiašaŭsia zhańbić biełaruskuju sistemu supraćpavietranaj abarony (SPA). Maŭlaŭ, kali jana nie zdatnaja adsačyć navat avijetku, to jak na jaje možna spadziavacca? Hetyja mierkavańni z hatovaściu byli padchoplenyja biełaruskimi i zamiežnymi ŚMI.

Adnak

parušeńnie lohkamatornym samalotam pavietranaj prastory Biełarusi nijak nie śviedčyć pra realnuju bajazdolnaść SPA.

SPA pryznačanaja dla abarony ad uzbrojenych pavietranych abjektaŭ, a nie ad adzinočnych spartyŭnych samalotaŭ. I tamu pierachop abo źniščeńnie parušalnika ździajśniajecca paśla vyznačeńnia jaho jak niebiaśpiečnaj bajavoj celi. U mirny čas radary nastrojenyja na adsočvańnie mienavita bajavych celaŭ na najbolš imaviernych vyšyniach. Chacia pa svaich TTCH biełaruskija radary mohuć zaŭvažać taksama i takija abjekty, jak šviedski samalocik, ale viadzieńnie takich celaŭ nie jość ich pieršasnaj zadačaj.

Sistema SPA moža funkcyjanavać u režymie tatalnaha skanavańnia prastory 24 hadziny 365 dzion na hod, ale ŭ mirny čas heta zvyšrastrata resursaŭ.

Badaj što nivodnaja kraina (chiba za vyklučeńniem Izrailu) nie maje sucelnaha radyjołakacyjnaha pola nižejšaha za 150–200 mietraŭ pa ŭsioj terytoryi krainy. Tamu «plušavy desant» — heta nijak nie realny test bajazdolnaści supraćpavietranaj abarony.

Infarmacyja da vierchu nie dajšła?

Čamu šviedskamu samalotu ŭsio ž udałosia dalacieć da Minska i viarnucca nazad u Litvu? Viersii mohuć być try.

1. Samalot nie byŭ zaŭvažany sistemami sačeńnia, adpaviedna nie było padniataje dziažurnaje źviano dla pierachopu, a kiraŭnictva daviedałasia pra parušeńnie miažy ź Internetu.

2. Samalot byŭ zaŭvažany, infarmacyja pajšła «navierch», ale kiraŭnik krainy vyrašyŭ ničoha nie rabić z parušalnikami.

3. Samalot byŭ zaŭvažany sistemaj SPA, ale infarmacyja nie była pieradadzienaja asobam, jakija prymajuć rašeńnie pra pierachop abo likvidacyju parušalnika.

Pieršaja viersija padajecca vielmi imaviernaj, bo abjekty takoha typu słaba zaŭvažnyja dla radaraŭ sistemy SPA, nastrojenych na vyjaŭleńnie inšych celaŭ.

Heta paćviardžajuć raniejšyja incydenty ź pierasiačeńniem miažy lohkamatornymi samalotami. Naprykład, u 2006 hodzie litoŭski samalot zabłukaŭ i byŭ zaŭvažany biełaruskim šturmavikom Su-25 vypadkova, pry vykanańni pralotu ŭzdoŭž miažy. Jašče raniej, u 2003 hodzie, u Hrodzienskaj vobłaści znajšli litoŭski lohkamatorny samalot, jaki paciarpieŭ krušeńnie na biełaruskaj terytoryi niekalki miesiacaŭ tamu, što nie było zaŭvažana pamiežnikami i vojskami SPA.

Ale hetaja viersija supiarečyć ahučanymi A. Łukašenkam dadzienymi pra toje, što samalot byŭ adsočany radarami, a taksama infarmacyi ad samich šviedaŭ, što ich vyklikaŭ dyśpietčar aeraporta nad Minskam.

Takim čynam, tak ci inakš, samalot byŭ zafiksavany. Zastajecca adnak niezrazumiełym, čamu nie byli padniatyja pierachopniki paśla taho, jak samalot byŭ zaŭvažany viežaj aeraporta Minsk-1 i nie adkazvaŭ na zapyty. U takich umovach dyśpietčary musiać źviazvacca z vajskoŭcami dla vyśviatleńnia prynaležnaści pavietranaha abjekta.

Druhuju viersiju adrazu možna adkinuć, chacia jana i źjaŭlajecca aficyjnaj.

Hetaj viersii supiarečyć pieršapačatkovaje admaŭleńnie ŭładami faktu parušeńnia i paśpiešlivyja kadravyja nastupstvy, jak adlustravańnie razboru palotaŭ unutry siłavych viedamstvaŭ i, adpaviedna, pryznańnia ichniaj viny. Viersija taksama nie stykujecca z łohikaj prapahandy: parušeńnie miažy paśla śviatočnaha paradu i demanstracyi vajskovaj mocy adrazu razburaje ŭvieś prapahandyscki efiekt ad mierapryjemstva i vystaŭlaje vajskoŭcaŭ u niavyhadnym śviatle. Naadvarot, kłasikaj žanru była b prymusovaja pasadka šviedskaha samalota i hučny praces nad parušalnikami. Ciažka pavieryć, što ŭ hetym vypadku kiraŭnik Biełarusi kiravaŭsia «pryncypami humannaści».

Takim čynam, samaj vierahodnaj ujaŭlajecca treciaja viersija, jakaja tłumačyć jak sproby admaŭlać vidavočnyja fakty, hetak i chutkuju raspravu nad kiraŭnictvam Dziaržaŭnaha pamiežnaha kamitetu i vojskaŭ SPA.

Čamu ž tak stałasia? Całkam vierahodna, radarami byŭ ździejśnieny aŭtamatyčny zachop i viadzieńnie celi, jakaja pry hetym była raspaznanaja jak nie bajavaja i nie ŭjaŭlajučaja pahrozy, tamu, mahčyma, infarmacyja i pajšła pa łancužku navierch ad dziažurnaha, ale patrebnaja infarmacyja nie dajšła da patrebnaha źviana.

Zboj u sistemie

Chutkaść i značnaść kadravych pierastanovak (nie zabyvajemsia, što kiraŭnik DPK Ihar Račkoŭski blizki da starejšaha syna prezidenta) śviedčyć pra toje, što adbyŭsia zboj u dziaržaŭnaj sistemie pryniaćcia rašeńniaŭ, što paciahnuła za saboj niehatyŭnyja palityčnyja nastupstvy.

Inšymi słovami, incydent sa šviedskim samalotam pakazvaje, što viertykalnaja sistema pryniaćcia rašeńniaŭ nie spracoŭvaje naležnym čynam i što kiraŭnik dziaržavy, vierahodna, nie maje ŭsioj paŭnaty infarmacyi pra toje, što adbyvajecca ŭ krainie. Pry peŭnych abstavinach heta moža stać fatalnym dla ŭsioj sistemy i jaje kiraŭnika. I mienavita adsiul hetkaja iracyjanalnaja i niesimietryčnaja reakcyja ŭ adkaz.

Kanflikt sa Šviecyjaj: čamu Minsk idzie na abvastreńnie?

Miarkujučy pa ŭsim, «plušavy desant» i adklikańnie pasolstvaŭ — rečy pamiž saboj nie źviazanyja.

Ale miedyjny i palityčny efiekt ad abiedźviuch padziejaŭ uzajemna ŭzmacnili adzin druhoha, što i pryviało da hučnaha skandału.

Pa-pieršaje, aficyjny Minsk u hetym dypłamatyčnym skandale adčuvaje svaju pravatu.

Pa-druhoje, pad šum skandału možna pazbavicca ad škodnaj, na dumku Minska, šviedskaj ambasady, jakaja zaŭždy była dosyć zaŭvažnaj u svajoj supracy ź biełaruskaj hramadzianskaj supolnaściu.

Pa-treciaje,

Minsk nie baicca iści na adkryty dypłamatyčny kanflikt, bo viedaje, jakim čynam i kali jaho možna spynić.

Navat kali da kanfliktu padklučacca i inšyja pasolstvy ES. Dypłamatyčny kryzis viasny hetaha hoda mnohamu navučyŭ: krainy-siabry ES sami nie zacikaŭleny trymać svaich ambasadaraŭ pa-za Biełaruśsiu; možna adpuścić niekalkich palitviaźniaŭ, i ŭsio vierniecca da raniejšaha stanu rečaŭ (bałazie, takich viaźniaŭ ciapier dastatkova); palityčnyja kanflikty ź ES nie pryvodziać da adčuvalnych ekanamičnych nastupstvaŭ.

Pa-čaćviortaje, paśla minułych prezidenckich vybaraŭ i asabliva paśla dypłamatyčnaha kryzisu hetaj viasny Minsk užo nie napałochaješ paharšeńniem imidžu. Jamu ŭžo praktyčna niama kudy horšać.

I apošniaje: biełaruskaje kiraŭnictva praciahvaje adčuvać za saboj ekanamičnuju i zamiežnapalityčnuju padtrymku Maskvy.

• 0
• 0
• 0
• 0
• 0
• 0
• 0
• 0