U pieršym paŭhodździ najaŭnyja resursy chatnich haspadarak skłali ŭ siarednim bolš jak Br4,2 młn. u miesiac
U pieršym paŭhodździ 2012 hoda najaŭnyja resursy damašnich haspadarak u Biełarusi skłali 4 młn. 214,6 tys. rubloŭ u miesiac, paviedamiła pres-słužba Nacyjanalnaha statystyčnaha kamiteta.
Najaŭnyja resursy — heta hrašovyja srodki damašnich haspadarak plus košt spažytych praduktaŭ charčavańnia, jakija pastupili z asabistaj padsobnaj haspadarki (za vyličeńniem materyjalnych raschodaŭ na ich vytvorčaść). Siudy ž uvachodzić košt dadzienych u naturalnym vyražeńni lhot i datacyj.
U studzieni—červieni 2012 hoda najaŭnyja resursy ŭ raźliku na adnaho člena damašniaj haspadarki skłali 1 młn. 749,4 tys. rubloŭ u miesiac. U haradach i pasiołkach haradskoha typu siaredniedušavyja najaŭnyja resursy na 16,9% pieravysili ŭzrovień siaredniedušavych najaŭnych resursaŭ sielskich žycharoŭ i skłali adpaviedna 1 młn. 817,8 tys. i 1 młn. 555,6 tys. rubloŭ.
Dola damašnich haspadarak z uzroŭniem siaredniedušavych najaŭnych resursaŭ nižejšym za biudžet pražytačnaha minimumu (małazabiaśpiečanych damašnich haspadarak) skłała 5,3%, u haradach i pasiołkach haradskoha typu — 4,3%, u sielskich nasielenych punktach — 7,7%.
U struktury małazabiaśpiečanych damašnich haspadarak asnoŭnuju častku (64,9%) składajuć damašnija haspadarki ź dziećmi da 18 hadoŭ, 21% — heta damašnija haspadarki bieź dziaciej, 14,1% — damašnija haspadarki, jakija składajucca z adnaho čałavieka.
Spažyvieckija raschody ŭ siarednim na damašniuju haspadarku skłali 3 młn. 176,6 tys. rubloŭ u miesiac.
U struktury spažyvieckich raschodaŭ damašnich haspadarak dola raschodaŭ na charčavańnie skłała 45,3%, na kuplu ałkaholnych napojaŭ — 2,6%, na kuplu niecharčovych tavaraŭ — 35%, na apłatu pasłuh — 17,1%.
Kamientary