Vakansii žniŭnia: ad 1 da 15 miljonaŭ rubloŭ

Siaredni zarobak u Minsku ŭ lipieni amal dasiahnuŭ 5 miljonaŭ, adrapartavaŭ Biełstat. Heta navat bolš za $500, pra jakija ŭłady kažuć tym čaściej, čym bližej robicca data parłamienckich vybaraŭ. Naturalna, daloka nie kožny, chto pracuje ŭ stalicy, atrymlivaje taki zarobak. My praanalizavali raźmieščanyja na sajcie Minharvykankama vakansii za žnivień, kab vyśvietlić, kamu prapanujuć najmienšy zarobak, chto zarablaje najbolš.

Ad miljona

Najmienšyja zarobki prapanujuć kredytnym i handlovym ahientam, akušerkam u šerahu minskich paliklinik.

Tak, ad 1,05 miljona rubloŭ (kala $125) u Minsku prapanujuć administrataram u šerahu bankaŭ i ŭ Biełteleradyjokampanii. Stolki ž prapanujuć akampanijataru-kancertmajstru i artystu baleta ŭ Ansambli tanca. Zarobki akušerkam prapanujuć pačynajučy z 1,5 miljona.

Kala $500 i bolš

Zarobki, bolšyja za 4 miljony, najčaściej prapanujuć śpiecyjalistam budaŭničych prafiesij. Z hetaj sumy startuje zarobak armaturščykaŭ i bietonščykaŭ.

Mahičnyja $500 prapanujuć barmenu ŭ hateli «Minsk». A voś Kiraŭnictva spravaŭ prezidenta (hałoŭnaje haspadarčaje ŭpraŭleńnie) šukaje sistemnaha administratara kampjutarnaj sietki z zarobkam ad 4,8 miljona (kala $570).

Šukajuć śpiecyjalista ź viedańniem farsi

Kiepski toj administratar banka, jaki nie maryć uznačalić jaho. Zarobak 14,7 miljona jak u kandydata na pasadu načalnika ŭpraŭleńnia «Biełahraprambanka» — dobraja matyvacyja dla karjernaha rostu. Pavieranamu ŭ spravach «TK Banka» prapanujuć 12 miljonaŭ, adnak kandydatu na pasadu nieabchodna viedać anhlijskuju movu i farsi. Viadučy śpiecyjalist u adździele raspracoŭki kiravańnia infarmacyjnych technałohij «Delta banka» budzie zarablać na 400 tysiač bolš.

Kab atrymlivać 10 miljonaŭ, nie abaviazkova być načalnikam u banku. Stolki prapanujuć kiroŭcam furaŭ, zaniatych u śfiery mižnarodnych pieravozak.

A što ŭ rehijonach?

Jak vidno, u stalicy pry žadańni možna znajści dobry zarobak. A ciapier razhledzim vakansii, jakija prapanujucca ŭ adnych z samych addalenych ad Minska rajcentrach krainy. Pavodle źviestak Ministerstva pracy i sacyjalnaj abarony, u Vialikaj Bierastavicy (Hrodzienščyna) najmienšy zarobak składaje 1,5 miljona. Jaho prapanujuć darožnamu rabočamu, piečniku, prybiralščyku pamiaškańniaŭ, kvietkavodu i ślesaru-santechniku. Na najbolšy zarobak u pamiery 3,6 miljona pretenduje inžynier enierhainśpiekcyi.

Haradok (Viciebščyna) — adziny z praanalizavanych nami rajcentraŭ, dzie sustrakajecca zarobak, jaki nabližajecca da $500.

U Łojevie, što na Homielščynie, čverć staŭki videademanstratara składaje kala 260 tysiač (1 050 tysiač za poŭnuju staŭku). Na samy vysoki zarobak tut pretenduje mašynist ekskavatara — 3,5 miljona rubloŭ.

Małarycki prafiesijny licej sielskahaspadarčaj vytvorčaści (Brestčyna) šukaje technika-nahladčyka na zarobak u 1 090 tysiač rubloŭ, a miascovaja rajonnaja balnica hatovaja płacić 2,9 miljona doktaru-śpiecyjalistu.

U Chocimsku na Mahiloŭščynie na samy mały i na samy vialiki zarobki pretendujuć traktarysty. Miascovaje DRBU abiacaje 1,07 miljona, a AAT «Babulin padvorak» — 2,3 miljona.

Zarobki

Minsk 1,05—14,7 młn

Vialikaja Bierastavica 1,5—3,6 młn

Haradok 1,05—4 młn

Łojeŭ 1,04—3,5 młn

Małaryta 1,08—2,9 młn

Chocimsk 1,07—2,3 młn

• 0
• 0
• 0
• 0
• 0
• 0
• 0
• 0