Nacyjanalnaja biblijateka straciła 10% čytačoŭ

I nie tolki da rajonnych i sielskich — za minuły hod kolkaść čytačoŭ Nacyjanalnaj biblijateki skaraciłasia na 10%.

Da 2011 hoda kolkaść čytačoŭ mieła ŭstojlivuju tendencyju da rostu. U 2010 hodzie kolkaść karystalnikaŭ biblijateki dasiahnuła maksimumu — 163 tysiačy čałaviek, pavialičyŭšysia ŭ paraŭnańni z 2005 hodam (tady ŭ Nacyjanalnaj biblijateki jašče nie było novaha budynka) amal na 40%.

Zatrymalisia ŭ čerhach?

Adnak u 2011 hodzie adbyłosia skaračeńnie karystalnikaŭ na 15,5 tys, choć mahčymaści dla čytačoŭ tolki pašyrajucca.

Biblijatečny fond Nacyjanałki hod ad hoda pavialičvajecca. Pieravaliŭšy za 9 młn asobnikaŭ u 2010 hodzie, u 2011 hodzie jon papoŭniŭsia jašče 129 tysiačami asobnikaŭ.

Nie vyklučana, što pryčynaj źnižeńnia cikavaści da Nacyjanalnaj biblijateki ŭ 2011 hodzie staŭ finansavy kryzis — u ludziej, jakija prastojvajuć u čerhach pa valutu i ažyjatažnyja vidy tavaraŭ, prosta nie chapała času na biblijateku. I tady pakazčyki minułaha hoda, mahčyma, nie varta ličyć kančatkovaj źmienaj trendu.

Raźlubili drukavanuju pradukcyju?

U toj ža čas dadzienyja pa vykarystańni fondu biblijateki pakazvajuć, što źnižeńnie čytackaj cikavaści — ustojlivaja tendencyja.

Razam sa skaračeńniem kolkaści karystalnikaŭ u 2011 hodzie źniziłasia i kolkaść vydadzienych knih i časopisaŭ — prykładna na 5% u paraŭnańni z 2010 hodam.

Usiaho za minuły hod Nacyjanalnaja biblijateka vydała amal 2,7 młn asobnikaŭ knih i časopisaŭ. Heta bolš, čym u 2005 hodzie (amal 2,4 młn), ale na 12% mienš, čym u 2008, kali kolkaść vydadzienych za hod asobnikaŭ pierasiahnuła 3 miljony. U cełym tendencyja pa źnižeńni vydačy knih i časopisaŭ zachoŭvałasia ciaham čatyroch apošnich hadoŭ.

Kolkaść čytačoŭ na adnu biblijateku vyrasła

Tendencyja pa skaračeńni vykarystańnia biblijatečnaha fondu charakternaja ŭ apošnija hady dla Biełarusi ŭ cełym, adnak temp źnižeńnia istotna mienšy, čym dla hałoŭnaj biblijateki krainy. Tak, u 2011 hodzie ŭ paraŭnańni z 2005-m skaračeńnie kolkaści vydadzienych knih i časopisaŭ pa krainie ŭ hod skłała 9,3%, a ŭ paraŭnańni z 2010 hodam — 1%.

Kolkaść biblijatek u cełym pa krainie źmienšyłasia, jak i čytačoŭ (na 10% u paraŭnańni z 2005 hodam i na 1% u 2011 u paraŭnańni z 2010), ale kolkaść karystalnikaŭ na adnu biblijateku ŭ 2011 hodzie vyrasła na 1,7% u paraŭnańni z 2010 hodam i pieravysiła 1000 čałaviek.

• 0
• 0
• 0
• 0
• 0
• 0
• 0
• 0