Žychar Mahilova: Dumaju, devalvacyja budzie — Łukašenka choča supakoić narod

Niekalki dzion tamu staršynia Nacbanka Biełarusi Nadzieja Jermakova zajaviła, što nie vyklučaje płaŭnaj devalvacyi rubla. A Alaksandr Łukašenka paabiacaŭ, što nijakaj devalvacyi nie budzie. «Jakoj z zajavaŭ vy bolš daviarajecie? Čamu?» — zapytaŭ karespandent BiełaPAN žycharoŭ Mahilova.

Spadarynia stałaha vieku: «Nie viedaju, kamu daviarać, ja tolki baču, što inflacyja raście sa strašennaj siłaj. Značyć, i hrošy našy abiasceńvajucca. Praktyka pakazvaje, što devalvacyja jość».

Junak: «Napeŭna, bolej Jermakovaj. Jana — majstar u svajoj spravie, raźbirajecca».

Małady spadar: «Ja dumaju, devalvacyja budzie, naohuł biełaruski rubiel upadzie. Ja vo tolki pryjšoŭ z armii. Sychodziŭ — byli adny ceny, viarnuŭsia, jak u inšuju krainu. Prezident choča supakoić narod, skazać, što ŭ nas usio dobra. I pa televizary ŭ nas usio dobra, kab ludzie nie ŭzdymali paniki, kab nie mianiali hetyja biełaruskija rubli».

Małady spadar: «Staršyni Nacbanku vidniej, kali rabić devalvacyju. Heta ž jaje, u pryncypie, praca — pilnavać stan nacyjanalnaj valuty. Mahčyma, adzin ź ich pamylajecca i niapravilna aceńvaje situacyju».

Spadar: «Situacyja była ŭžo ŭ 2011 hodzie, kali staršynia Nacbanka zajaŭlaŭ pra minimalnuju devalvacyju, a pieršaja asoba krainy kazała pra toje, što jana niemahčymaja. A my praz dva-try miesiacy atrymali toje, što atrymali. Kali mierkavać pa našaj ekanamičnaj situacyi, my možam adnamomantna atrymać 50-pracentnuju ŭ kastryčniku ci listapadzie».

Maładaja spadarynia: «Devalvacyja budzie! Prablemy ŭ ekanomicy vidavočna prykmietnyja. Naš prezident choča niejak ludziej supakoić, bo znoŭ ža rost cenaŭ, a pakolki jany apošnim časam duža rastuć, to ŭ palityčnych metach».

Spadar: «Čas pakaža. U našaj krainie nichto ničoha skazać nie zmoža. Sumlenna ž nie kažacca, što ŭ krainie adbyvajecca, usio tak zavualavana. Ale ž pa ekanomicy ž vidać, što hrošaj nie chapaje».

Spadarynia stałaha vieku: «Ščyra kažučy, nie viedaju, što da devalvacyi, a voś denaminacyju chacieła b. Hetyja miljony, nuli… Ceny, zrazumieła, rastuć niaspynna. Vielmi składana mnie jak piensijaniercy, davodzicca kožnuju kapiejku ekanomić».

Spadar: «Jermakovaj bolš daviaraju. Intuicyja i stan ekanomiki».

Spadarynia: «Ja naohuł nie daviaraju palitykam. Praca ŭ mianie — na pieršym płanie, hrošy zarablaju. A voś budzie niešta tam abiasceńvacca ci nie — nie ŭnikaju ŭ heta. Moža być, u mianie takaja nieaktyŭnaja hramadzianskaja pazicyja, nie viedaju. Ale ja palitykam nie daviaraju».

Spadarynia: «Usio-taki daviaraju Jermakovaj. Tamu, što devalvacyja budzie pavolnaj, dla ludziej ža heta nie tak baluča, jak adrazu…»

• 0
• 0
• 0
• 0
• 0
• 0
• 0
• 0