Trynaccać hadoŭ tamu biasśledna źnikli Viktar Hančar i Anatol Krasoŭski

Viktar Hančar, jaki z samaha pačatku byŭ u kamandzie Alaksandra Łukašenki, dapamoh jamu pryjści da ŭłady, a zatym syšoŭ u apazicyju, i Anatol Krasoŭski biasśledna źnikli 16 vieraśnia 1999 hoda. Viečaram jany pajšli ŭ łaźniu, što ŭ Minsku pa vulicy Fabryčnaj, 20. Apošni raz ich bačyli prykładna ŭ 22.35, kali abodva vyjšli z budynka i sieli ŭ «Džyp-Čeroki», jaki naležaŭ Krasoŭskamu.

Kryminalnuju spravu pa fakcie źniknieńnia Hančara i Krasoŭskaha raspačała prakuratura Minska. Pavodle danych śledstva, pry ahladzie prylehłaj terytoryi byli znojdzieny askołki płastmasavych raśsiejvalnikaŭ śviatłosihnalnych pryboraŭ aŭtamabila, ślady tarmažeńnia aŭtamašyny i jaje ŭdaru ab dreva, a taksama ślady kryvi.

Pradstaŭniki apazicyi, rodnyja źnikłych i mižnarodnaja hramadskaść ličać, što Hančar i Krasoŭski byli vykradzienyja pa palityčnych matyvach, i padazrajuć u zamiešanaści ŭ ich vykradańni vyšejšych słužbovych asob krainy.

Jak paviedamiŭ BiełaPAN juryst Hary Pahaniajła, sprava ab źniknieńni Hančara i Krasoŭskaha naminalna praciahvaje rasśledavać prakuratura Minska. «Prakuratura rehularna paviedamlaje, što pravodziacca śledčyja dziejańni, adnak ni pra vyniki hetych śledčych dziejańniaŭ, ni pra ich sutnaść nikomu nie paviedamlajecca. Ja liču, što ŭłady čakajuć, kali źniknieńniu Hančara i Krasoŭskaha spoŭnicca 15 hadoŭ i tady heta sprava moža być spyniena z pryčyny zakančeńnia terminu daŭnaści», — havoryć juryst.

Realnaje rasśledavańnie spravy, adznačyŭ jon, moža adnavicca ŭ vypadku źmieny isnujučaj ułady. «Tady heta sprava atrymaje inšuju kvalifikacyju — naprykład, pavodle artykuła 128 Kryminalnaha kodeksa, jaki praduhledžvaje vykradańnie i źniknieńnie čałavieka, źviazanaje ź jaho palityčnaj dziejnaściu, jak złačynstva suprać biaśpieki čałaviectva. Takija złačynstvy nie majuć terminu daŭnaści», — padkreśliŭ Pahaniajła.

Tym bolš, dadaŭ jon, što sprava ab źniknieńni Hančara i Krasoŭskaha ciapier znachodzicca na razhladzie ŭ Kamitecie pa pravach čałavieka AAN. «Hady paŭtara-dva tamu pravaabaroncy davali svaje kamientaryi na adpaviednyja kamientaryi ŭłady, dasłanyja ŭ AAN, jak heta praduhledžana praceduraj razhladu spravy. Dalej Kamitet pa pravach čałavieka AAN dziejničaje sam — pierakładaje materyjały spravy i praciahvaje razhlad. Spravy tam mohuć razhladacca pa 4–5 hadoŭ», — zaŭvažyŭ juryst.

• 0
• 0
• 0
• 0
• 0
• 0
• 0
• 0