U Barysaŭskim rajonie pobač ź psichanieŭrałahičnym domam-internatam u vioscy Tarasiki fatohraf NN Siarhiej Hudzilin znajšoŭ mohiłki, na jakich chavajuć psichična chvorych pacyjentaŭ. Na repartaž adtul pryjšoŭ vodhuk z doma-internata, jaki pakazvaje, što tam pracujuć nieabyjakavyja ludzi.
Administracyja i ŭvieś kalektyŭ HU «Barysaŭski psichanieŭrałahičny dom-internat» aburanyja dadzienaj publikacyjaj. Terytoryja mohiłak zajmaje amal adzin hiektar ziamli, pachavańni prachodziać z 1962 hoda, ale naš kalektyŭ znachodzić čas try razy na hod (da dnia paminańnia pamierłych — Radaŭnica, letam, u razhar rostu raślinnaści, i ŭvosień — da śviata Pakrova) pravieści ŭborku i akulturyć terytoryju mohiłak. Štohod uviesnu da nas pryjazdžajuć naviedniki, nie mienš za 80 čałaviek, kab pamianuć svaich pamierłych svajakoŭ, i za ŭsiu bytnaść doma-internata nivodnaha narakańnia ŭ adras taho, jak vyhladajuć mohiłki, nie było. My razumiejem, što dadzienaja terytoryja vyhladaje nie tak, jak chaciełasia b nam i ludziam, ale zrabić z hetym, na vialiki žal, ničoha nie možam, bo na akulturvańnie terytoryi nieabchodna kala 65 miljonaŭ biełaruskich rubloŭ, jakich u doma-internata niama. Nieabchodna mianiać płot pa ŭsich mohiłkach, što kaštuje 36,35 młn biełaruskich rubloŭ, taksama nieabchodnaja zamiena kryžoŭ i tabličak, a heta składzie 18 młn rubloŭ, nabyć abstalavańnie dla skošvańnia travy — heta 7 młn rubloŭ, jakich u doma-internata taksama niama. Rabotniki doma-internata u niepracoŭny čas prychodziać na mohiłki i prybirajuć ich. Dom-internat stała atrymlivaje padziaku ad svajakoŭ ludziej, jakija pa voli losu znachodziacca ŭ nas, a taksama my atrymlivajem padziaki ad svajakoŭ tych, chto ŭžo pakinuŭ hetaje žyćcio. Jany ŭdziačnyja nam za toje, što my nie zastajemsia abyjakavymi da ich bolu, bo ŭ ich niama mahčymaści zabrać i pachavać svaich svajakoŭ samastojna, my robim heta za ich, i ŭ dalejšym starajemsia sačyć za mahiłami i navodzić tam paradak. My ličym, što zamiest taho kab nas krytykavać, lepš by akazali dapamohu ŭ pošuku sponsaraŭ, jakija zmohuć dapamahčy nam. Prosim nie zastavacca abyjakavymi da dadzienaha lista, a naadvarot, dapamahčy nam u našaj spravie.
Kamientary