KDK biare pad kantrol postdažynkavyja Horki. Kiraŭnictva horada: tak, drobnyja chiby

U Horkach jakaść vykanańnia budaŭničych i ramontnych rabot pryciahnuła ŭvahu Kamiteta dziaržkantrolu, paviedamiŭ namieśnik staršyni Horackaha rajvykankama Uładzisłaŭ Jaromin.

Nahadajem, 21–22 vieraśnia ŭ Horkach prajšoŭ fiestyval rabotnikaŭ siała «Dažynki-2012». Jaho praviadzieńniu papiaredničała tradycyjna maštabnaja ŭ takich vypadkach rekanstrukcyja horada, jaki prymaje fiestyval. Adnak užo paśla «Dažynak» u internet-ŚMI źjavilisia šmatlikija fatahrafii, na jakich vidać, što novyja piešachodnyja darožki, dzie była vykładziena plitka, nie vytrymali vyprabavańnia daždžami i razburylisia. Taksama byli apublikavany i inšyja zdymki šmatlikich niedarobak i budaŭničaha braku. U kancy minułaha tydnia šerah ŚMI paviedamili, što Alaksandr Łukašenka na sustrečy z prem'jer-ministram Michaiłam Miaśnikovičam u rezkaj formie raskrytykavaŭ jakaść ramontu ŭ Horkach i zapatrabavaŭ likvidavać niedarobki i brak.

Pavodle słoŭ Jaromina, jość prablema z amfiteatram, u jakim prachodziła ŭračystaja častka «Dažynak». «Dzieści parušyli hidraizalacyju. Idzie padciakańnie pa ściency», — skazaŭ čynoŭnik.

Jak paviedamiła BiełaPAN redaktar horackaj haziety «Uzhorak» Halina Budnaja, u mnohich damach, dzie mianiali dach, na praciahu niekalkich miesiacaŭ daždžy zalivali kvatery vierchnich pavierchaŭ.

Ciapier mnohija z hetych kvater adramantavany, prablema zastałasia «ŭ dvuch-troch damach» z-za marudnaj pracy mahiloŭskich padradnych arhanizacyj, paviedamiŭ Jaromin. Pavodle jaho słoŭ, prablema «zaciakańnia daždžavych vod» u kvatery taksama ciapier u centry ŭvahi Kamiteta dziaržkantrolu.

Pavodle infarmacyi Budnaj, paśla praviadzieńnia «Dažynak» darožki, vykładzienyja plitkaj, u šerahu miescaŭ stali razburacca. «Ludzi telefanavali, paviedamlali pra hetyja vypadki. Na praciahu dzion dziesiaci — tydnia hetyja niedachopy ź plitkaj byli ŭstaronieny. Usio nazad pakłali. Ale ŭsio adno ŭ roznych miescach źjaŭlajucca nievialikija pravalvańni ci ŭźnimajecca plitka. Ja dumaju, heta niekatory čas budzie praciahvacca, pakul usio kančatkova nie ŭsiadziecca, nie ŭlažacca», — skazała Budnaja.

Prablemu z darožnaj plitkaj paćvierdziŭ i Uładzisłaŭ Jaromin, adznačyŭšy, što heta adbyłosia ŭ čatyroch miescach, dzie z-za mocnaha patoku vady była vymyta asnova darožki.

«Plitku pierakłali adrazu ž. Ale heta ž nie brak», — śćviardžaje čynoŭnik.

«Jość vulicy, žycharam jakich abiacali pakłaści asfalt mienavita da hetaha śviata. Siońnia dźvie žycharki horada raskazali, što nie ŭsim pakłali asfalt, kamu abiacali», — skazała Budnaja. U pryvatnaści, pavodle jaje słoŭ, nie byŭ pakładzieny asfalt na adnoj z vulic u rajonie małakazavoda.

«Rabili kanalizacyju, nie darabili. Kałodziežy stajać niezakrytyja. Hetyja kałodziežy vystupajuć nad uzroŭniem vulicy.

Jaromin paviedamiŭ, što jamu ničoha nie viadoma pra niezakrytyja kałodziežy, za vyklučeńniem tych, adkul luki byli vykradzieny złamyśnikami.

Pavodle jaho słoŭ, na asfaltavańnie pieryfieryjnych vulic vydzielena 15 młrd. rubloŭ.

Što datyčycca infarmacyi pra ćvil u adnym ź internataŭ Biełaruskaj dziaržaŭnaj sielskahaspadarčaj akademii, to, jak adznačyŭ Jaromin, jamu pra heta ničoha nie viadoma, pakolki sa skarhami ŭ rajvykankam pa hetym pytańni nichto nie źviartaŭsia.

• 0
• 0
• 0
• 0
• 0
• 0
• 0
• 0