Šeście ŭ Hrozavie.
Vystupaje Juraś Bieleńki
Udzielnicy śviatkavańnia
Vystupaje Aleś Čacholski.
Šeście ŭ Słucku.
Maleńkaja ŭdzielnica śviatkavańnia
Vystupaje Siarhiej Kavalenka.
Aktyvisty Kansiervatyŭna-chryścijanskaj partyi BNF, a taksama nieabyjakavyja da biełaruskaj histaryčnaj spadčyny ludzi ź bieł-čyrvona-biełymi ściahami, kvietkami, viankami i źničkami tradycyjna vandrujuć pa miescach bajoŭ słuckich paŭstancaŭ z vojskami Čyrvonaj armii.
Udzielniki ŭračystaściaŭ naviedali viosku Hrozava, dzie kala pamiatnaha kryža prahučała pasłańnie z nahody hadaviny Słuckaha zbrojnaha čynu ad lidara KCHP-BNF Zianona Paźniaka. U svaim vystupie v.a. staršyni KCHP-BNF Juraś Bieleńki adznačyŭ vialikaje značeńnie tych padziejaŭ, jakija adbyvalisia ŭ Słucku i vakolicach u 1920 h., dziela niezaležnaści Biełarusi.
«Užo tady słuččaki razumieli, što rasijski balšavizm – heta čužaja, varožaja fiłasofija dla biełarusaŭ, i pakłali svaje žyćci, kab nie dapuścić na našuju ziamlu tuju navału. Siońnia my nie pavinnyja achviaravać žyćciami, ale šmat što možam zrabić.
Toje, što vy tut, što havorycie pa-biełarusku, što trymajecie ŭ rukach bieł-čyrvona-biełyja ściahi, – heta taksama zmahańnie, heta praciah taho, što pačali tut słuččaki 92 hady tamu nazad»,– skazaŭ Juraś Bieleńki.
Zatym aktyvisty naviedali pamiatny kryž u vioscy Siemiežava. Kala śviatyni zaśpiavali «Mahutny Boža», uskłali bieł-čyrvona-biełyja kvietki da miemaryjalnaj plity, pastavili źnički, jakija byli zapalenyja ŭ Kurapatach. Jak i ŭ Hrozavie, udzielnikaŭ śviatkavańnia sustreli milicyjanty, u tym liku ŭ cyvilnym. Jany filmavali akcyju, adnak pieraškodaŭ udzielnikam nie čynili.
Adkazny sakratar KCHP-BNF Valery Bujvał va ŭračystym vystupie kala pamiatnaha kryža adznačyŭ, što Biełaruś siońnia znachodzicca ŭ padobnych umovach, jak i ŭ 1920-ch hadach.
«Jak kaliści my byli pad pryhniotam Rasii, tak i ciapier. Ale toje, što tut siońnia łunaje vialikaja kolkaść našych ściahoŭ, havoryć pra toje, što my niaskoranyja, što jašče pazmahajemsia», – skazaŭ sp. Bujvał.
Skončyłasia ŭšanavańnie pamiaci słuččakoŭ u Słucku (pierad hetym udzielniki mierapryjemstvaŭ naviedali Vyznu/Čyrvonuju Słabadu), u Słucku da akcyi dałučyŭsia były palitviazień Siarhiej Kavalenka.
Tut kala hanku sabralisia słuččaki, kab taksama ŭziać udzieł va ŭračystaściach. Z hetaj nahody Valery Bujvał znoŭ pračytaŭ zvarot Zianona Paźniaka, pryśviečany hadavinie Słuckaha zbrojnaha čyna. A Jury Bieleńki adznačyŭ, što hledziačy na sučasnych słuččakoŭ, bačyć naščadkaŭ kolišnich mužnych zmaharoŭ, jakija pakłali svaje žyćci dziela baraćby za svabodu.Adbyłosia šeście pa centralnaj vulicy horada ad univiermaha da budynka Słuckaha krajaznaŭčaha muzieja, dzie mieściŭsia štab paŭstancaŭ.
U svaim vystupie na hanku muzieja Siarhiej Kavalenka padziakavaŭ usim, za toje, što dapamahli jamu vyzvalicca z turmy. Jon skazaŭ: «Zaklikaju ratavać Biełaruś ad akupacyjnaj ułady, zmahacca za niezaležnaść svajoj krainy».
Akcyja adbyvałasia pad nahladam šmatlikich milicyjantaŭ.