U halinie svabody presy Biełaruś zajmaje adno z apošnich miescaŭ u śviecie. Pavodle štohadovaj spravazdačy pravaabarončaj arhanizacyi «Freedom House», Biełaruś adniesiena da liku «niesvabodnych» krainaŭ i znachodzicca na 186‑ym miescy ŭ śpisie z 195 krain śvietu.
«Freedom House» kanstatuje, što ŭłady ŭ Biełarusi skarystoŭvajuć dziaržaŭnuju manapoliju na druk i raspaŭsiudžvańnie pieryjadyčnych vydańniaŭ. Zhodna z analizam arhanizacyi, biełaruskija ŭłady pajšli pa šlachu nie prosta hrubaha zakryćcia vydańniaŭ, ale ich maksimalnaha abmiežavańnia nibyta ŭ ramkach isnujučaha zakanadaŭstva.
Situacyja sa svabodaj słova i druku horš čym ŭ nas tolki ŭ Paŭnočnaj Karei, Turkmienistanie, Livii, na Kubie, u Birmie, Erytrei, Uźbiekistanie, Zimbabve i Ekvataryjalnaj Hviniei. U hetych krainach, pavodle spravazdačy svabodnyja miedyi abo ŭvohule nie isnujuć, abo raspaŭsiudžvajucca ŭ takich nievialikich maštabach, jakich niedastatkova, kab danieści da hramadstva alternatyŭnuju, niepadcenzurnuju infarmacyju.
U sensie svabody ŚMI, pavodle «Freedom House», ź liku 195 krainaŭ śvietu 74 — «svabodnyja», 58 — «častkova svabodnyja» — i 63 — «niesvabodnyja». Śćviardžajecca, što najlepšaja situacyja ŭ Finlandyi i Isłandyi,Bielhii, Danii, Narviehii i Šviecyi. Z krain byłoha sacłahieru i SND najbolš svabodnyja miedyi ŭ Estonii, Čechii, Litvie, Łatvii i Słavaččynie, a najmieniej svabodnyja ŭ Turkmienistanie i Uźbiekistanie.
U spravazdačach, jakija «Freedom House» publikuje z 1980 hodu, aceńvajecca stupień svabody raspaŭsiudžvańnia infarmacyi praz drukavanyja vydańni, radyjo i telebačańnie, a taksama praź internet.
U sioletnim dakumiencie adznačana, što za 2006 hod u niekatorych krainach jakraz internet staŭ abjektam cenzury abo byŭ zakryty dostup da paasobnych sajtaŭ.
«Uśled za takimi krainami, jak Rasieja, biełaruskija ŭłady sprabujuć kantralavać taksama i internet — apošniuju krynicu niezaležnaj dumki. Pakolki dziaržaŭnaja kampanija «Biełtelekam» źjaŭlajecca manapalistam na rynku elektronnych medyjaŭ, ułady błakujuć niekatoryja internet‑staronki ŭ momanty, asabliva istotnyja dla režymu, naprykład, padčas vybaraŭ», — paviedamlajecca ŭ sioletniaj spravazdačy «Freedom House» pra svabodu słova i druku ŭ śviecie.
