U Mahilovie supracoŭniki KDB znoŭ sprabujuć verbavać maładziovych aktyvistaŭ
Hetym razam vyrašyli nacisnuć na studenta 4‑ha kursa Biełaruska‑rasiejskaha ŭniversytetu.
Hetym razam vyrašyli nacisnuć na studenta čaćviertaha kursa Biełaruska‑Rasiejskaha ŭniversytetu Stanisłava Jesipoŭskaha. Viarboŭka adbyvałasia prama ŭ VNU. Tydzień tamu namieśnik dekana aŭtamechaničnaha fakultetu Vital Arciomčyk zaprasiŭ studenta paśla zaniatkaŭ da siabie ŭ kabinet. Chłopca tam sustreli dvoje nieznajomych mužčynaŭ, jakija prapanavali supracu z KDB.
Adznaču, heta ŭžo nia pieršaja sproba cisku na Jesipoŭskaha z boku specsłužbaŭ. Dva hady tamu jon traplaŭ u pole zroku KDB, jak aktyvist ruchu supracivu «ZUBR». Tamu ciapier chłopcu prapanavali źbirać infarmacyju mienavita na svajho byłoha kaardynatara Jaŭhiena Suvorava, jaki, darečy, dva tydni tamu staŭ namieśnikam staršyni miascovaj supołki maładziovaha kryła Partyi BNF.
Chłopiec admoviŭsia supracoŭničać i paviedamiŭ pra ŭsio Suvoravu. A pra sprobu viarboŭki raspavioŭ i ŭsim svaim siabram. Ale ŭ minułuju piatnicu da Jesipoŭskaha znoŭ zajavilisia tyja ž ludzi. Niahledziačy na toje, što junak raspavioŭ pra svajo samavykryćcio, supracoŭniki KDB nazvali Stanisłava «razumnym chłopcam» dy prapanavali supracoŭničać nadalej. Maŭlaŭ, ciapier da Jesipoŭskaha nia budzie padazreńniaŭ, tamu možna śmialej źbirać infarmacyju. Bolš za toje, supracoŭniki specsłužbaŭ paabiacali, što dniami daduć numary telefonaŭ maładziovych aktyvistaŭ, da jakich jany chočuć nakiravać studenta, jak «svajho čałavieka».
U vyniku Stanisłaŭ Jesipoŭski musiŭ źviarnucca pa dapamohu da pravaabaroncaŭ. Vyhladaje, KDB naŭrad ci pakinie jaho ŭ spakoi pa ŭłasnym žadańni. Nastupnuju sustreču kamitetčyki pryznačyli na bližejšuju piatnicu.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary