Za skasavańnie lhot adkaža apazycyja?
Prapahanda moža pa-jezuicku padać balučyja navacyi akurat jak uvasableńnie apazycyjnych idejaŭ. Ź inšaha boku, apazycyja moža adpijaryć temu z vyhadaj dla siabie. Piša ŭ svaim błohu Alaksandar Kłaskoŭski.
Pavodle "Rojters", dziaržava vyjhraje kala 300 miljonaŭ dalaraŭ. Paraŭnajcie: vyklučeńnie z Abahulenaj systemy preferencyjaŭ (ASP) budzie kaštavać krainie 300-400 miljonaŭ eŭra za hod. To bok, hrošy, zekanomlenyja na lhotnikach, tearetyčna navat nie kampensujuć stratu bruselskaha bonusu.
Načalstva miž tym zapeŭnivaje, što srodki ad reformy lhotaŭ pojduć na dapamohu dzieciam. Dyk što, usia katavasija — dziela taho, kab pierakinuć niejkuju sumu z adnaho radka biudžetu ŭ inšy? Možna padumać, nie mahli b zrabić heta biaz šumu i pyłu... Kali ž iduć na niepapularnyja zachady, zdolnyja spravakavać nadta niavyhadnyja dla viarchoŭ u pijaraŭskim planie akcyi kštałtu siońniašniaha maršu invalidaŭ-vazočnikaŭ, — mižvoli naprošvajecca dumka, što ź finansami naśpiavajuć vialikija prablemy.
Miž tym zhadany krok Brusela vyhladaje nieminučym. Tajmer uklučany. Faktyčna rašeńnie pra vyklučeńnie Biełarusi z ASP było pryniataje jašče 20 śniežnia letaś. Miensku dali paŭhodu na vypraŭleńnie sytuacyi. Ale, jak kanstatuje Biełaruski kanhres demakratyčnych prafsajuzaŭ, padrychtavany ŭładami zakonaprajekt ab prafsajuzach nie adpaviadaje patrabavańniam Mižnarodnaj arhanizacyi pracy (jakaja i zavaryła ŭsiu kašu). To bok rabić reveransy pierad Zachadam ajčynnaje načalstva nie źbirajecca. Praściej prycisnuć svaich invalidaŭ?
Savieckuju systemu symbaličnaha razmazvańnia tych ilhotaŭ tonkim słojem, kaniešnie ž, tre' było niekali mianiać. Kładučy ruku na serca, kali b apazycyja pryjšła da ŭłady, to na peŭnym etapie hetym abaviazkova b zaniałasia.
Inšaja reč, što siońnia kiroŭnyja viarchi adbirajuć ilhoty, nie žadajučy mianiać ekanamičnuju systemu. I pry hetym prapahanda moža pa-jezuicku padać balučyja dla elektaratu navacyi akurat jak uvasableńnie apazycyjnych idejaŭ. Vo, adhuknulisia na ichnija refarmatarskija zakliki! Ź inšaha boku, apazycyja, kažučy technalahična, moža adpijaryć hetuju temu z vyhadaj dla siabie. Kali pavarušycca.
Pieršym adčuŭ heta Anatol Labiedźka. Siońnia — subotnim viečaram, zaŭvažcie — na sajcie AHP źjaviłasia voś hetaja natatka. Usio słušna, varta aperatyŭna vypracavać vyraznuju platformu apanentaŭ ułady ŭ pytańni pra lhoty, jakoje na vačach abvastrajecca i zdolnaje palityzavać navat tych, chto daloki ad palityki.
Kab tolki nie zavalili abjadnanyja demakraty i hetaje pytańnie, jak niekali zajavu z nahody naftahazavaj vajny. Bo sa svaich vojnaŭ nijak vybracca nie mahli.
Ciapier čytajuć
Fiaduta rezka adkazaŭ Kaleśnikavaj: Za što vy zmahalisia ŭ 2020 hodzie, nie cikavić nikoha, akramia miadźviedziaŭ ź bierlinskaha zaaparka, jakija vas atačajuć4949
Kamientary