Lepiej nažyć adnaho Cholcapfela, čym stracić 400 miljonaŭ eŭra!
Biez zališniaha afišavańnia Natalla Piatkievič znoŭ pabyła ŭ Ženevie. Piša ŭ svaim błohu Alaksandar Kłaskoŭski.
Biez zališniaha afišavańnia Natalla Piatkievič čarhovy raz pabyła ŭ Ženevie. Biełaruskaja delehacyja znoŭ šukała ahulnuju movu ź Mižnarodnaj arhanizacyjaj pracy.
Nahadaju: mienavita z padačy MAP (za parušeńnie pravoŭ pracoŭnych) Brusel užo ŭ červieni źbirajecca vyklučyć Biełaruś z Abahulenaj systemy preferencyjaŭ u handli z EZ.
I chacia presavy sakratar MZS na siońniašnim bryfinhu zapeŭnivaŭ, što pieramovy ŭ Švajcaryi z pytańniem ab preferencyjach naŭprost nie źviazanyja, — niaciažka zrazumieć, što stračvać štohod pa 400 miljonaŭ eŭra Miensk nadta ž nia choča.
Byŭ spadzieŭ, što Eŭropu źmiakčyć zhoda na adkryćcio tut ofisu Eŭrakamisii. Numar nia vyhareŭ. I na siońnia data, kali pradstaŭnictva rasčynić dźviery, pa-raniejšamu ŭ tumanie.
Niaciažka mierkavać, što jahonuju pracu tutejšaje načalstva pastarajecca staranna abkłaści čyrvonymi ściažkami. Bo dasiul u kašmarnych snach prychodzić vobraz Hansa-Hieorha Vika. Były kiraŭnik Kansultacyjna-naziralnaj hrupy ABSE (taksama ŭžo byłoj, zamienienaj na biaskryŭdny ofis z koratka stryžanym mandatam:-) u svoj čas daŭsia ŭładzie ŭ znaki, ładziačy pad dacham svajoj struktury apazycyjnyja pasiadziełki.
Darečy, mienavita pad ehidaj Vika (persanaža, adnolkava nie lubimaha jak Łukašenkam, tak i Paźniakom) u svoj čas byŭ zładžany i taki-siaki kruhły stoł uładaŭ z apazycyjaj. Ciapier voś Brusel taksama dziaŭbie pra dyjaloh z apanentami. I vidavočna, kamu-kolviek u vysokich mienskich kabinetach druhim Vikam ujaŭlajecca sp. Cholcapfel, francuz ź niamieckim (niejki fatum!:) proźviščam. Toj daŭno siadzić u Kijevie, čakajučy mahčymaści prystupić da vykanańnia misii pradstaŭnika Bruselu u "čornaj dzircy" Eŭropy.
Ale lepiej užo nažyć adnaho Cholcapfela, čym stracić 400 miljonaŭ eŭra!
Tym bolej što realna ofis Eŭrakamisii mała čym budzie adroźnivacca ad luboj zachodniaj ambasady. Nu jašče adnym naziralnikam bolej stanie na nastupnym Dni Voli... Ułady ž mohuć preventyŭna paščyravać tak, što tych naziralnikaŭ akažacca bolej, čym manifestantaŭ!
Zrešty, u tym samym napramku faktyčna ščyruje i tytulnaja apazycyja. Jašče para histaryčnych kanhresaŭ — i durniaŭ chadzić pad jaje kiraŭnictvam, badaj, nie zastaniecca.
P.S. U sp. Cholcapfela dobraja zahartoŭka ŭ ekstremalnych umovach. Jon dziesiać hadoŭ adpracavaŭ u Afrycy :-)
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ154
Kamientary