 |
Z Akademii kiravańnia adličany student‑vydatnik Juraś Alejnik. Niahledziačy na toje, što siaredni bał za 4 kursy vučoby ŭ jaho składaje 8,4, a apošniuju sesiju jon zdaŭ na «dziaviatki», dekan fakultetu Ŭładzimier Jazepčyk zajaviŭ, što taki čałaviek nia moža vučycca ŭ Akademii.
Pryčyny: aficyjnyja i nieaficyjnyja
Juraś navučaŭsia na fakultecie dziaržaŭnaha kiravańnia ekanomikaj. 16 traŭnia chłopca prosta z raspranalni paśla valejbolnaha matču vyklikali ŭ dekanat, kab paviedamić, što 15 traŭnia jaho adličyli z Akademii. Aficyjnaja pryčyna — «systematyčnyja parušeńni vučebnaj dyscypliny i praviłaŭ unutranaha rasparadku». Vydatnika adličyli za 22 hadziny propuskaŭ u krasaviku dy «ihnaravańnie palityčnaha žyćcia VNU» — prarektar pa vychavaŭčaj pracy Taciana Piečaniova ŭzhadała što Juraś nie hałasavaŭ na apošnich vybarach u miascovyja saviety. Jana nie pryniała da ŭvahi toj fakt, što Ju. Alejnik byŭ naziralnikam na vybarach. Aznajomiŭšy studenta z zahadam na adličeńnie, jamu nie prapanavali raśpisacca ŭ im, a paraili padumać. Jahony podpis pad zahadam, jaki b śviedčyŭ, što jon ź im aznajomleny, nie staić dahetul. Chłopiec mieŭ adzinuju vymovu — za prahuły zaniatkaŭ. Pry hetym zapis u jurydyčnym adździele akademii śviedčyć, što prahuły adbyvalisia na praciahu navučalnaha 2006‑07 hodu, a ŭ asabistaj spravie — tolki ŭ listapadzie 2006 h.
Sapraŭdnymi pryčynami adličeńnia Juraś ličyć svajo staršynioŭstva ŭ abłasnoj arhanizacyi TBM, siabroŭstva ŭ BAŽ. Akramia taho, jon arhanizavaŭ zbor kala paŭtysiačy podpisaŭ suprać admieny ilhotaŭ.
Dosyć krasamoŭna heta paćviardžajuć takija krasamoŭnyja fakty. Rektar Akademii Stanisłaŭ Kniazieŭ praz svajho namieśnika Siarhieja Sabaleŭskaha pieradaŭ, što nia bačyć sensu dla hutarak ź Jurasiom i jaho baćkami. Kali maci chłopca źviarnułasia da dekana U.Jazepčyka z pytańniem, ci ŭsie tak dobra vučacca ŭ akademii, što voś tak prosta možna adličyć paśpiachovaha studenta, pačuła nastupnaje: «Vaš syn nia moža tut vučycca, bolš ad mianie ničoha nie pačujecie». Adna vykładčyca tak i paraiła: «admoŭsia ad svajoj idealohii i zastanieśsia vučycca».
Tym časam, u akademii nie isnuje narmatyŭnaj bazy, jakaja b śviedčyła, za jakuju kolkaść prapuščanych hadzinaŭ možna adličyć studenta. U hrupie Jurasia kala traciny studentaŭ za semestar majuć pa 22‑30 hadzinaŭ propuskaŭ. Razam ź im adličyli studenta, što mieŭ zapazyčanaści pa ŭsich ekzamenacyjnych pradmietach i šmatlikija propuski zaniatkaŭ.
Padtrymka
Užo ŭ čaćvier 17 traŭnia u padtrymku Jurasia było sabrana kala 250 podpisaŭ studentaŭ vočnaha adździaleńnia. Praŭda, na padpisantaŭ raspačaŭsia cisk, i paśla hetaha častka admoviłasia ad svaich podpisaŭ. U vyniku ŭ rektarat patrapiła 228 kopijaŭ podpisaŭ.
Ciapier adličanaha studenta nie puskajuć u akademiju: achova maje adpaviedny zahad. Apošni raz jaho ŭratavała žurnalisckaje paśviedčańnie. Dziela pierasoŭvańnia pa korpusie da chłopca prystavili kanvoj.
Praz kolki dzion paśla adličeńnia byŭ praviedzieny admysłovy starastat, na jakim spn. Piečaniova paraŭnała Jurasia z Kazulinym.
«Ja daŭ im šaniec usio vypravić»
Juraś Alejnik budzie sudzicca. «Ceły tydzień ja čakaŭ, dumaŭ, što sytuacyja vypravicca, bo zanadta šmat u hetaj spravie chibaŭ. Ale, vidno, daviadziecca sudzicca» — kaža jon. Baranić intaresy chłopca ŭ sudzie budzie Aleh Hułak. U paniadziełak 28 traŭnia ŭ sud budzie nakiravanaja skarha. Juraś kaža, što prykładzie ŭsie namahańni, kab davučycca tut, albo zavočna za miažoj. Pad pahrozaj apynułasia i druhaja vyšejšaja adukacyja, jakuju jon atrymoŭvaje ŭ BDU. Užo hetym letam jaho mohuć zabrać u vojska. Chłopiec nia suprać, ale spačatku choča atrymać adukacyju.
Vydatnik, spartoviec, tolki nie kamsamolec
Skončyŭ škołu z załatym medalom. Navučaŭsia ŭ muzyčnaj škole. Źjaŭlajecca stvaralnikam i pieršym vice‑prezydentam klubu zamiežnych movaŭ Akademii SCOFL. Udzielnik i pryzior intelektualnych hulniaŭ. Zachaplajecca sportam: na praciahu ŭsioj vučoby prymaŭ udzieł u spartyŭnych spabornictvach pa valejbole (člen zbornaj Akademii apošnija dva hady), futbole, baskietbole. Maje 21 hod. Vyras u Maładečnie ŭ šmatdzietnaj siamji. Drukavaŭsia ŭ roznych vydańniach, u tym liku «Našaj Nivie». Byŭ arhanizataram śviatkavańnia 100-hodździa «Našaj Nivy» i biełaruskich kancertaŭ u Maładečnie.
