Drama «Viartańnie» Andreja Źviahincava, «Žmurki» Alaksieja Bałabanava i trahikamedyja «Eli Parkier»
BT, 22.05
Žmurki (Žmurki)
Rasieja, 2005, kalarovy, 107 chv.
Režyser: Alaksiej Bałabanaŭ
Roli vykonvajuć: D́mitry Dziužaŭ, Alaksiej Panin, Mikita Michałkoŭ, Siarhiej Makaviecki, Viktar Sucharukaŭ, Dźmitry Piaŭcoŭ
Žanr: iranična-mizantrapičny kryminalny bajavik, ściob-kamedyja.
Adznaka: 6 (z 10).
U klasyčnych žudaścikach parački vyčvarencaŭ ažyŭlali niaviest (dla Frankienštajna) dy hulalisia z zombi. U karcinie Alaksieja Bałabanava «Žmurki» krynicaj žachaŭ vystupaje falklorny rasiejski peryjad pieršapačatkovaha nazapašvańnia kapitału, preparavany ź iraničnym cynizmam i «pryściobnutymi» adsyłkami da Tarantyna.
Dva hanhstery-admarozki (Alaksiej Panin i Dźmitry Dziužaŭ), jakija słužać na pabiahuškach u hieroja Mikity Michałkova (malinavy pinžak i raspalcoŭka dadajucca kamplektam), musiać viarnuć valizku z hierainam. Kolkaść trupaŭ raście ŭ hieametryčnaj prahresii.
Persanažy karciny — usie jak na padbor: ź iłbami pitekantrapaŭ, masiŭnymi skivicami, idyjatyčna-rublenymi frazami, i amal usie kandydaty ŭ žmuryki. U filmie skarystana 60 litraŭ štučnaj kryvi.
Vulicy, mašyny, damy — pašarpanyja, atmasferka ściobna-hratesknaja. Bałabanaŭ daŭ volu svajoj mizantropii — i raskvieciŭ jaje čornym humaram. Kryminalna-hieraičnyja tavaryšy z «Bryhad», «Miantoŭ» i bałabanaŭskaha «Brata» naŭmysna źnižany da ŭzroŭniu moŭnaha štampu i falklornaha cetlika.
Cetliki ažyŭleny trapnymi detalkami: bandziuhan Panin paŭsiul ciahajecca ź intelihienckaju papkaju i žahnajecca na kožnuju cerkaŭku; šafapadobny Dziužaŭ maje malusieńki natatničak i vyvučaje anhielskuju pa komiksach. Malinavapinžačny Michałkoŭ mleje ad toŭstaha synka-naščadka i nia lubić Cereteli.
Ale pierapracavany scenar futbalista Stasa Machnačova — heta nabor anekdotaŭ, jaki nia ciahnie na epas. Napoŭnicu acanić takoje zdolnyja tolki ludzi, na ŭłasnym dośviedzie znajomyja z časami «malinavych pinžakoŭ».
Pry kancy filmu paranieny hieroj Panina skardzicca, što «straciŭ cnatlivaść». Vynikam hetaj straty stanovicca kabinet ź vidam na Kreml, sakratarka Renata Lićvinava — i siońniašniaja Rasieja.
***
***
STV, 23.30
Viartańnie (Vozvraŝienije)
Rasieja, 2003, kalarovy, 105 chv.
Režyser: Andrej Źviahincaŭ
Roli vykonvajuć: Uładzimier Haryn, Ivan Dabranravaŭ, Kanstancin Łaŭranienka
Žanr: Drama
Adznaka: 8 (z 10)
Pryzy: "Załaty leŭ" Venecyjanskaha kinafestu
U žyćci dvuch bratoŭ niečakana źjaŭlajecca baćka (Kanstancin Łaŭranienka), znajomy im tolki pa fatahrafijam dziesiacihadovaj daŭniny. Čužy i suvory čałaviek naładžvaje synam žorstkaje vyprabavańnie. Adzin z bratoŭ padparadkoŭvajecca, druhi buntuje…
I ci nasamreč heta ichni baćka? I ci byŭ, uvohule, baćka...
Metafizyčnaja drama Andreja Źviahincava, što vyklikała zachapleńnie ŭ Venecyi, vykarystoŭvaje dakładny j nieabchodny minimum vyraznych srodkaŭ, zabyvaje pra “pobyt” i pracuje z adviečnymi archietypami. Baćka, syn, achviaraprynašeńnie…
Aktor Kanstancin Łaŭranienka sioleta atrymaŭ uznaharodu Kanskaha kinafestu, jak najlepšy aktor (nastupny film Andreja Źviahincava «Vyhnańnie»).
Paśla karciny a 01.20 na telekanale dakumentalny raspovied pra stužku «Viartańnie».
