Što takoje typovy pradukt časoŭ hlabalizacyi, i z čym jaho jaduć? Feljeton Alesia Kudryckaha.
Što takoje typovy pradukt časoŭ hlabalizacyi, i z čym jaho jaduć?
Pa‑anhielsku «vialikaja vosiemka» paznačajecca «G8». Great Eight. Koratka i zrazumieła. Hatovieńki brend, biary i rehistruj. Adnak adkaznaść tut vialikaja: nazva vymahaje adpaviednaj pavahi da najlepšych tradycyjaŭ krainaŭ, jakija składajuć elitny klub superdziaržavaŭ. Jak ni kruci, a jany pradstaŭlajuć 65% suśvietnaj ekanomiki. Jak moh by vyhladać dy smakavać pradukt, vyrableny pad markaj «G8«?
Syravinu dla praduktu musiać zdabyvać afrykancy, atrymlivajučy za svaju ciažkuju pracu horkija kapiejčyny. Potym dackaja ci narveskaja meha‑karparacyja pa hruzapieravozkach budzie dastaŭlać syravinu ŭ centralny Kitaj, dzie 12‑hadovyja dzieci buduć upakoŭvać paŭfabrykat «G8« u słoiki, vyrablenyja na inšaj kitajskaj fabrycy, jakaja ščodra adorvaje atmasferu vuhlekisłatoj sa svaich kominaŭ. Pramocyju praduktu budzie rabić mižnarodnaja sietkavaja reklamnaja ahiencyja, prezentujučy «G8» jak nadzvyčaj karysny dla zdaroŭja pradukt, vyrableny z zachavańniem usich pravoŭ pracoŭnych dy z pavahaj da navakolnaha asiarodździa. Pravy na handlovuju marku, naturalna, musić mieć amerykanskaja karparacyja. Adnak u Amerycy budzie znachodicca chiba što chmaračos z top‑menedžerami kampanii, a taksama ŭprava dabračynnaha fondu «G8‑dapamoha», hałoŭnaj zadačaj jakoha budzie palehčyć žyćcio žycharoŭ treciaha śvietu, kab, narešcie, kožny ź ich mieŭ dastatkova hrošaj na słoik‑druhi niedasiažnaha i niepaŭtornaha praduktu pad markaj «G8».
A chto ž budzie spažyvać hety zahadkavy «G8»? Ciaredniestatystyčny eŭrapiejec, amerykaniec ci japoniec, jaki nabyvaje «G8» tamu, što jon niedarahi, nizkakalaryjny dy daje, jak śćviardžajuć pres‑relizy, hodnuju pracu miljonam ludziej u Azii dy Afrycy. Kaštavać słoik «G8» budzie 1 eŭra, ź jakich 95 centaŭ atrymiuć tyja, chto robić praduktu markietynh, a 5 centaŭ – tyja, chto jaho vyrablaje. U Biełaruś buduć masava zavozicca padrobnyja kopii «G8« i pradavacca na praduktovych kirmašach. Aryhinały možna budzie adšukać u «prestyžnych kramach» – z padvojnaj, a to j patrojnaj nacenkaj.
Kali hetyja ŭmovy buduć vykananyja, to słoiki «G8« buduć sapraŭdy vartyja nasić nalepki z hetym vysokim imiem.
(Zaŭv. Red.: pradukt «G8» – čystaja prydumka. Lubyja supadzieńni vypadkovyja)
Kamientary