Klijenty, jakija žadajuć atrymać kredyt, usio čaściej sutykajucca z admovaj.
Klijenty biełaruskich bankaŭ, žadajučyja atrymać kredyt, usio čaściej sutykajucca z admovaj. «Niama resursaŭ»— zvyčajny adkaz. Śpiecyjalisty ličać taki stan bankaŭskaj sistemy zakanamiernym vynikam padvyšeńnia cenaŭ na rasiejskija enerhanośbity.
Hałoŭny buchhałtar pryvatnaj firmy, u jakoha praces atrymańnia spažyvieckaha kredytu raściahnuŭsia na 5 miesiacaŭ, raspavioŭ pres‑centru Chartyi'97 svaju historyju:
— U Cłavianskim adzialeńni «Bielinviestbanku», jakoje absłuhoŭvaje firmu, dzia ja pracuju, mnie paviedamili, što kredyty časova nie vydajucca, tamu što skončylisia resursy. U hordyrekcyi mianie abnadzieili: maŭlaŭ, rychtujcie dakumenty. Heta było ŭ studzieni. Kali praz 2 miesiacy ja prynios papiery, mnie paviedamili, što kredyty pakul nie vydajuć, ale papiery prymajuć. (Paźniej admovilisia rabić i heta.) Kab nie čakać nieviadoma kolki, źviarnuŭsia u «Biełprambudbank», dzie maju z 1994 hoda rachunak indyvidualnaha pradprymalnika. Tam prapanavali rychtavać dakumenty. Praź miesiac, kali jany byli padrychtavany ŭ hetym banku taksama skončylisia resursy... — paviedamiŭ Siarhiej.
Dniami ŭ «Biełprambudbanku» Siarhieju ŭsio ž paabiacali vydać kredyt. Spažyvieckija kredyty nie takija vialikija (3‑5 miljonaŭ rubloŭ). Kudy źnikli resursy dla kredytavańnia nasielnictva? Jašče ŭ minułym hodzie kredyty, pa słovach supracoŭnicy banku, davali ŭsim chto choča, aby brali. Sioleta kredytnaja linija skaraciłasia da paŭhodu, stali bolš žorstkija patrabavańni: ciapier patrabujecca 2 haranta zamiest adnaho. Niaŭžo kredytavańnie nasielnictva stała niavyhadnym?
U adździele kredytavańnia «Biełprambudbanku» tak patłumačyli pres‑centru Chartyi'97 sytuacyju z časovym deficytam resursaŭ:
— Napačatku hodu adtok srodkaŭ z bankaŭskaj sistemy — typovaja źjava. Ludzi zdymajuć hrošy z rachunkaŭ, robiać bujnyja pakupki, padarunki na kaladnyja śviaty. My vymušany trochi limitavać abjom vydačy kredytaŭ. U hetym hodzie situacyja ŭskładniłasia nafta‑hazavym kryzisam. Istotna pavialičyŭsia adtok srodkaŭ z bankaŭskaj sistemy na kredytavańnie pradpryjemstvaŭ, z metaj ich adaptacyi da vysokich koštaŭ na enerhanośbity. Uvohule, naša zadača — padtrymka biełaruskich pradpryjemstvaŭ. Spažyvieckija kredyty ŭ našym aktyvie składajuć mizer. Chacia heta vyhodna dla banku. Inakš my by hetym nie zajmalisia, — kaža śpiecyjalist adździeła.
Doktar ekanamičnych navuk Leanid Zaika tłumačyć aściarožnaść kamiercyjnych bankaŭ z vydačaj rublovych kredytaŭ vysokimi ryzykami:
— Kredytavańnie nacyjanalnaj valutaj va ŭmovach niepradkazalnaj inflacyi vielmi niebiaśpiečnaje. Z pačatku hoda ryzyki bankaŭ istotna pavialičylisia i jany ničym nie kampiensavanyja, tamu naturalna, što banki imknucca prytrymać svaje resursy. Zaraz samyja vysokija ryzyki niapeŭnaści ŭ biełaruskaj ekanomicy. Z‑za źmienaŭ koštaŭ na enierhanośbity pastupleńni valuty ŭ krainu, jakija harantavali stabilnaść rubla, istotna źnizilisia. Ciapier bankam metazhodna vydavać chiba što valutnyja kredyty. Takaja situacyja chutčej za ŭsio pratrymajecca da kastryčnika, ‑‑ zajaviŭ ekspert pres‑centru Chartyi'97.
Daśviedčannyje ludzi taksama miarkujuć, što biełaruskaja ekanomika «pierahretaja» i isnuje surjoznaja pahroza rosta inflacyi. Bankaŭskaja sistema sutyknułasia z deficytam najaŭnych biełaruskich rubloŭ i adsutnaściu mahčymaści ich zakupać u Centrabanka z‑za pamiańšeńnia valutnych pastupleńniaŭ u krainu. Pa pryčynie nieraźvitaści ŭnutranaha rynku kaštoŭnych papieraŭ, deficyt biełaruskaj najaŭnaści biez devalvacyi rubla ŭ našaj sytuacyi možna likvidavać tolki praź źniešnija zajmy i prodaž dziaržaŭnaj ułasnaści. Ale i hetyja nie samyja papularnyja zachady nia vielmi atrymlivajucca.
Kamientary