BT vačyma biełarusa
Niamoje TV
Prycichli razmovy pra adkryćcio druhoha biełaruskaha kanału. Nichto nie chavaje, što hrošaj niama j na adzin. Na BT zryvajucca zaplanavanyja zdymki, skaračajucca kamandziroŭki i vyjezdy — benzynu taksama niama. Razmovy iduć adno pra skaračeńnie efiru dy štatu. Dziaržava admaŭlajecca trymać naskroź dziaržaŭnaje telebačańnie. Ułady kažuć: sami pavinny vyžyvać. Ale ci nia ŭłady vinavatyja, što biełaruski «błakitny ekran» šery va ŭskosnym i prostym sensie, bo nia moža j słova skazać biez prymusu? Što ŭ krainie niama kamu davać dla telebačańnia reklamu? I što zamiest złabadzionnych temaŭ u efiry ŭ luboj pryhodzie čuješ adno — «alaksandar łukašenka».
U atmasfery ŭsieahulnaha zaniapadu dy amal usieahulnaj abyjakavaści, što panuje na BT, nie ździŭlajeśsia, kali bačyš pieradačy z takimi žachlivymi chibami, jakimi vyznačyŭsia na minułym tydni «Turabjektyŭ». Niebłahi ŭ pryncypie raspovied pra Čechiju išoŭ hołym tekstam pa videašerahu biez anijakaj muzyčnaj ahučki, jakoj patrabujuć pieradačy takoha rodu. Bolej za toje, navat paśla taho jak u zakadravaj načytcy hučali faktyčna zaprašeńni pasłuchać pieśni ci praskija arkiestryki, dalej išło niamoje kino. Z kadrami tych arkiestrykaŭ. Možna pavieryć, što ŭ pracoŭnaj zaparcy nie zaŭvažyli, jak huk nie zapisaŭsia. Ale kab nichto nie sabraŭsia pravieryć, što puskajuć u efir?! Maŭlaŭ, nie palityka, dyk chaj tam choć čorta łysaha...
U nastupnuju sieradu ŭ 18.20 paśla doŭhaha pierapynku vyjdzie čarhovaja prahrama seryi «Cieni i postaci». Seryja raspaviadaje pra asobaŭ biełaruskaje historyi i kultury, jakija zasłuhoŭvajuć ušanavańnia, ale praktyčna zabytych. Hety vypusk pryśviečany słynnamu opernamu artystu pieršaj pałovy XX st. Selechu-Kačanskamu. «Zabytamu», bo byŭ niesavieckim čałaviekam. Materyjał dla prahramy zdymaŭsia ŭ Miensku i Pieciarburhu. Pra kolkich biełaruskich słavutaściaŭ možna było b raspavieści, źjeździŭšy ŭ tuju ž Prahu — ale dzie tyja hrošy?..
Arciom Łukjanovič
Kamientary