sport
Prarvalisia ŭ elitu
eŭrapiejskaha nastolnaha tenisu našy dzieŭki
Ź miesiac tamu, kali biełaruskaja kamanda pinh-ponhu viartałasia na radzimu z pravalnaha dla biełarusaŭ suśvietnaha pieršynstva ŭ Tailandzie, ajčynnyja zaŭziatary plavalisia dy łajalisia. Sapraŭdy, amatary sportu nie mahli być u zachapleńni ad 13-ha miesca biełarusak dy 17-ha radka mužčynskaj kamandy na tajskim mundyjali. Zdavałasia, što biełaruskamu nastolnamu tenisu chutka pryjdzie samy sapraŭdny hamon. Navat naša biełaruskaja zorka hetaha vidu sportu Ŭładzimier Samsonaŭ pačaŭ spakvala zbaŭlać abaroty, addajučysia, vidać, šalonamu kachańniu sa svajoj serbskaj pasijaj, jakuju jon skleiŭ na niejkim turniry ŭ Białhradzie. Chtości sa spartovych fanaŭ užo pastaviŭ dla siabie kryž na pinh-ponhu dy pačaŭ horača sačyć za našymi chakieistami...
Ale biełaruskaja zbornaja nastolnaha tenisu na pačatku viasny, skinuŭšy zimovuju melanchaličnaść, upieršyniu prabiłasia ŭ superdyvizijon Eŭralihi. Na šlachu biełarusak da zapavietnaj mary stajała tolki kamanda z Belhii. Pieršaja sustreča supiernic mieła adbycca 7 sakavika na belhijskim kurorcie Spa, što słavicca svajoj mineralnaj vadzičkaj...
Moža, vada ŭ ich tam i lepšaja, čym Chomskaja i Mienskaja-4, ale dobra machać rakietkaj belhijki nia ŭmiejuć — biełaruskaja družyna prosta razdušyła supiernic — 4:0. Ciapier našym dziaŭčatam, kab praščamicca navierch, patrabavałasia ŭsiaho tolki farmalna aformić svoj kvitok u najvyšejšy dyvizijon praz tydzień u Miensku. Biez anijakich prablemaŭ biełaruski ŭ druhi raz zakacili apanentkam čatyry banki, vyjšaŭšy ŭ superdyvizijon superkamandaŭ.
Čyjo ž miesca ŭ elicie zojmie zbornaja Biełarusi? Z hetaj samaj elity vylataje... rasiejskaja kamanda. Što ž, dobry padarunak da Dnia Voli. A 21 krasavika startuje čempijanat Eŭropy...
Bohuś Bijatlanionak
