Naviny

NAVINY

Psalmy Ryhoravy

Paet Ryhor Baradulin i bard Aleś Kamocki zapisali na studyi «Kaŭčeh» supolny kampakt-dysk «Psalmy». Kružełka źmiaščaje kala 20 apracavanych Baradulinym biblejskich psalmoŭ cara Davida, a pačynajecca dysk ź vieršavanaj malitvy «Ojča naš…», jakuju pierakłaŭ i čytaje sam paet. Vokładku dysku azdablaje repradukcyja karciny «Anioł» dački Baradulina, Iłony.

Jubilej Čornaha

Dziaržaŭny muzej historyi biełaruskaj litaratury naładziŭ vystavu i kanferencyju z nahody 100-hadovaha jubileju Kuźmy Čornaha. U kanferencyi ŭziali ŭdzieł 35 školnikaŭ ź Mienskaha rajonu, jakija daśledujuć tvorčaść Čornaha, i ŭnuk piśmieńnika Mikoła Ramanoŭski. Najbolš cikavaje spavieščańnie zrabiła Kaciaryna Šašalevič, jakaja raspaviała pra katavańni represavanaha klasyka ŭ Mienskaj turmie.

Suśvietnaja — pa-biełarusku

Kalehija Ministerstva adukacyi zaćvierdziła kancepcyju novaha padručnika suśvietnaj litaratury dla starejšych klasaŭ škoły. Užo z novaha navučalnaha hodu suśvietnaja litaratura budzie vykładacca ŭ miežach abnoŭlenaha kursu biełaruskaj litaratury, a značyć — na biełaruskaj movie. Najbolš uvahi ŭ hetym kursie nadajecca pryhožamu piśmienstvu našych susiedziaŭ, a najpierš Ukrainy, jakuju buduć pradstaŭlać 11 piśmieńnikaŭ.

«Mastactva» ŭ Internecie

Časopis «Mastactva» stvaryŭ svaju elektronnuju versiju ŭ suśvietnym pavučyńni na servery www.ibamedia.com. Na tym samym servery źmiaściła svoj sajt Nacyjanalnaja biblijateka, ale apošni jašče nie pracuje.

Na Śviatoha Patryka

17 sakavika ŭ Łunincy i ŭ mienskim parku Horkaha prajšli malaŭničyja parady z nahody Dnia Śviatoha Patryka. Na nastupny dzień u Domie družby adbyłasia prezentacyja knihi «Biełaruś—Irlandyja», jakuju vypuściŭ Skarynaŭski centar. U knizie źmieščana ŭsio, što pisałasia ŭ Biełarusi pra Irlandyju (u tym i našaniŭskija teksty), i naadvarot. Pačynajecca jana sa zvarotu prezydenta Irlandyi pani Mery MakElis. Vialikaja delehacyja pradstaŭnikoŭ dabračynnych arhanizacyjaŭ i dziejačoŭ kultury ź Irlandyi naviedaje taksama Słucak, Haradzieju, Mazyr i Łuniniec. Ukłała knihu i arhanizavała pryjezd haścioŭ Maryja Mickievič, unučka Jakuba Kołasa.

Juraś Barysievič

Armianie ŭ Połacku

13 sakavika Połacak naviedaŭ Suren Aruciunian, były pieršy sakratar kampartyi Armienii, a ciapier pasoł u Biełarusi. Jon uziaŭ udzieł u adkryćci mastackaj vystavy mastaka Hryhora Danielana ŭ połackim muzei knihadruku. Hryhor Danielan naradziŭsia ŭ 1950 hodzie ŭ Tbilisi, ale siomy hod žyvie ŭ Miensku. Sp.Danielan pryjechaŭ u Połacak z padarunkam — hrafikaj pa matyvach paezii Chuana Ramona Chimenesa. Mastak zastaŭsia pracavać u horadzie na tydzień.

Aleś Kozik