Z usioj krainy

 Z usioj krainy

Žyvie leninizm na Mahiloŭščynie!

Pakul Rasieju dzialili na 7 federalnych akruhaŭ, u Biełarusi stvaryli 110 vybarčych. Cikava, što navat «Źviazda» 108-ju akruhu nazyvaje «Uručskaj», a nia Ŭruckaj, rasiejskamoŭnyja ž hazety pišuć «105-j Kołosovskij okruh» (napeŭna, u centarvybarkamie Lidzii Jarmošynaj nia viedajuć, što Kołas i pa-rasiejsku — z adnym «o»).

Ale ŭ hetym centarvybarkamie dobra viedajuć, jak dahadzić načalnicy. Va ŭsich abłaściach pieralik akruhaŭ pačynajecca z adpaviednaha abłasnoha centru, a na Mahiloŭščynie — z Babrujsku. Čamu? Dy tamu, što pani Jarmošyna tam pracavała jurystkaj, pakul Łukašenka napiaredadni nia skinuŭ ukazam jejnaha papiarednika Viktara Hančara. Voś i pačynajecca Mahiloŭskaja vobłaść z 63-j Babrujskaj-Leninskaj vybarčaj akruhi. Što jašče admietna, dyk heta zachavańnie «leninskich» nazvaŭ akruhaŭ tolki na Mahiloŭščynie (jość jašče 70-ja Mahiloŭskaja-Leninskaja). Va ŭsich inšych abłasnych centrach akruham dali bolš-mienš nejtralnyja najmieńni. Leninski rajon Bieraścia — heta 1-ja Bresckaja-Zachodniaja akruha, a Leninski rajon Horadni padzialili pamiž Haradzienskaj-Centralnaj i Haradzienskaj-Paŭnočnaj akruhami. Tamu ŭ pałacie pradstaŭnikoŭ budzie tolki dva lenincy, i heta buduć pradstaŭniki Mahiloŭščyny.

Jan Dziamidaŭ

Navat haradzienskija sialanie zdajucca

Jak paviedamlaje BiełaPAN, na Haradzienščynie za pieršaje paŭhodździe vytvorčaść małaka skaraciłasia na 34,4 tys. t, albo na 14% proci letašniaje, miasa — na 10,6 tys. t, abo na 16%. Siaredniesutačnyja pryvahi ŭ vykormlivańni byčkoŭ pamienšali na 62, śvinak — na 30 hramaŭ. Kolkaść rahataj chudoby skaraciłasia na 32,4 tys. hałovaŭ, śviniej — na 43,8 tys.

Nia lepš i na nastupny hod, mabyć, budzie. Na ŭmoŭnuju hałavu žyvioły narychtavali 3,4 centnery karmavych adzinak, što na 2,4 centnery mienš za adpaviedny čas 1999-ha. I, choć žnivo nie za harami, z 3116 kambajnaŭ spraŭnyja tolki 79%.

Niaŭžo dazvolać Nacyjanalny Ŭniversytet?

Pytańnie ab adkryćci Biełaruskaha Nacyjanalnaha Ŭni-versytetu budzie razhledžana na sustrečy ministra adukacyi i rektara BDU z pradstaŭnikami hramadzkich arhanizacyjaŭ, što jaho dabivajucca. Čas sustrečy pakul nia vyznačany. Jak pa-viedamiŭ ahienctvu BiełaPAN Aleh Trusaŭ, 20 lipienia pryjšoŭ list ad novapryznačanaha vice-premjera Michaiła Dziemčuka. Toj piša, što daručyŭ ministru adukacyi Michaiłu Stražavu i rektaru BDU Alaksandru Kazulinu abmierkavać pastaŭlenyja TBM pytańni. Vo što značyć zamiest Zamiatalina pryjšoŭ biełarus! Adrazu sprava zrušyłasia.

U Niomanie nielha płavać

Epidemijolahi pieraścierahajuć ad kupańnia ŭ Niomanie. Padčas daśledavańniaŭ vady medyki vyjavili pieravyšeńnie dapuščalnaj normy bakteryjaŭ kišečnaj pałački ŭ šmat razoŭ.

Paklikaŭ kałhas tokara

Tokara babrujskaha zavodu traktarnych detalaŭ i ahrehataŭ Piatra Kapuścina letaś pasłali ŭ słaŭharadzki kałhas «Raś-śviet». Dla šefskaj dapamohi vioscy. Tam jon svaimi rukami adramantavaŭ kambajn, 18-hadovuju «Nivu», i jašče papracavaŭ na poli. Sioleta kałhas specyjalna paprasiŭ zavod, kab toj dasłaŭ u haspadarku taho tokara. Zavod praciahły čas admaŭlaŭsia. Bo hety specyjalist — adzin z samych daśviedčanych na pradpryjemstvie, u jaho 20-hadovy staž. Spatrebiłasia, kab z harvykankamu patelefanavali na pradpryjemstva — tady zavodu ničoha nie zastałosia, jak Kapuścina vypravić u viosku znoŭ. Vidać, 18-hadovamu kambajnu niaprosta dajecca pierachod da paŭnalećcia.

Nachabnaja cenzura

Mahiloŭskaja apazycyja mierkavała adśviatkavać 27 lipienia, Dzień niezaležnaści krainy pavodle «dałukašenkaŭskaha» času, kancertam z udziełam viadomych biełaruskich vykanaŭcaŭ i folk-hurtoŭ. Ale ŭłady admovili. Čynoŭniki tłumačyli ŭsio tym, što arhanizatary nia mieli «kancertnaj» licenzii, a taksama nie dali na prahlad tekstaŭ piesień i nie prademanstravali, jak jany buduć vykonvacca. Padobnaja cenzura raniej ažyćciaŭlałasia bolš nachabna — prosta zabaraniali, i ŭsio. Ciapier, kažuć, što mahčyma b i dazvolili, kab dali pierš pasłuchać.

Videazala «pa-biełarusku»

U mahiloŭskim kinateatry «Kastryčnik» adkryjecca videazala, dzie buduć pakazvać kino na biełaruskaj movie. Heta robicca ź inicyjatyvy haradzkoha kinaprakatnaha pradpryjemstva «Pozirk». Pryviazuć u Mahiloŭ biełaruskaje videa, mien-skim hledačam dobra viadomaje z pakazaŭ u TBM na Rumiancava. Videazala raspačnie pracu ŭ vieraśni — kali cenzary nie pieradumajuć.

Niesałodkaje leta

Mahiloŭskija kramy, jak i ŭva ŭsioj Biełarusi, pieražyvajuć cukrovy deficyt. Kolki ŭžo hadoŭ naš handal usprymaje leta, sezon narychtoŭki sočyvaŭ i kampotaŭ jak stychijnuju navału! Štohod paŭtarajucca tyja samyja deficyty.

Symon Hłazštejn, Mahiloŭ

Zuby — tolki za hrošy

Z 11 lipienia ŭ pinskaj haradzkoj stamatalahičnaj paliklinicy ŭviedzienyja płatnyja pasłuhi. Biaspłatna zuby lečać tolki lhotnikam dy ŭ dziciačaj stamatalohii. Ale j pensijanery mohuć pry žadańni stavić sabie bolš jakasnyja plomby za hrošy.

Pakolki pryvatnych dantystaŭ u Pinsku nadta mała, inšaha vyjścia, jak zrabić płatnaje absłuhoŭvańnie, u kalektyvu stamatalahičnaj palikliniki nie było. Sa słovaŭ hałoŭnaha lekara U.Bialinskaha, užo ź lutaha im nie davali hrošaj na materyjały da plombaŭ dy na dezynfekcyjnyja srodki. A ź lipienia ŭvohule nie było za što kuplać medykamenty. Tamu, kab nie pakidać ludziej biez dapamohi (a praz kabinety palikliniki štomiesiac prachodzić kala vaśmi tysiačaŭ pinčukoŭ), vyrašyli nie začyniać palikliniki, a zrabić pasłuhi płatnymi. Ciapier lačeńnie karyjesnaha zuba kaštuje ad 750 da 4500 rub., u zaležnaści ad jakaści plambavalnaha materyjału. Navina dla pinčukoŭ nia nadta kab pryjemnaja, ale ciapier niama čerhaŭ, dy jašče harantyju na šieść miesiacaŭ dajuć. Tak što niajakasnaja praca budzie kaštavać hrošaj lekaru, a nie pacyjentu.

Jaŭhien Salejčuk, Pinsk

Ułada nie raźbiraje fronty

Baranavicki harvykankam prapanavaŭ siabram BNF «Adradžeńnie» zamiest samastojnaha pikietu da 10-ch uhodkaŭ Dnia Niezaležnaści 27 lipienia pikietavać razam ź siabrami KCHP BNF. Tyja atrymali dazvoł na pikiet 23 lipienia ŭ Maładym Parku z 15-j da 17-j biez vykarystańnia ściahoŭ i nacyjanalnaj symboliki. Jak ličać u vykankamie, niemetazhodna pravodzić dva pikiety z adnoj nazvaj. Cikava, što ŭ piśmovym adkazie z harvykankamu prysutničaje tolki prapanova — niama dazvołu, ale ž niama j zabarony.

Novy staršynia harvykankamu Dzičkoŭski admoviŭsia sustrakacca z pradstaŭnikami BNF «Adradžeńnie», kab abmierkavać uźnikłyja z abodvuch bakoŭ prablemy. Usie pytańni treba nakiroŭvać piśmova — tady budzie aficyjny adkaz.

Usio dla ludziej

Niekalki hadoŭ žychary vioski Dekoły, što la Baranavičaŭ, mahli patrapić u svaju viosku z poŭdnia tolki na čoŭnie. Narešcie im pabudavali most praz rečku. A ŭ dadatak jašče j zrabili pierachod praz čyhunku.

Rusłan Raviaka, Baranavičy

Intehracyjny inter-faks

U internecie na adrasie www.interfucks.com źjaviłasia novaje infarmacyjnaje ahienctva «Interfaks». Jak pišuć jahonyja stvaralniki, heta «ahientstvo Sojuznoho h. Rośsii i B.» (jany paviedamili mnie ŭ elektronnaj pošcie, što B. — heta baćka), pryčym nazva «interfucks», skradzienaja maskoŭskimi kankurentami dy vykarystoŭvanaja imi ŭ eŭfemistyčnym vyhladzie «Interfax», «na samoj spravie jak maha paŭniej adlustroŭvaje sutnaść i hłybiniu intehracyjnych pracesaŭ u sajuznaj dziaržavie». Ahienctva paviedamlaje padrabiaznaści źniknieńnia Tamary Vińnikavaj ź Biełarusi dy abiacaje šmat čaho cikavaha ŭ budučyni.

Jurys Okryŭs