Barys Tumar. Dyjakanu dali 20 hadoŭ za zabojstva papa

Dyjakanu dali 20 hadoŭ za zabojstva papa

Ale hramadzkaja dumka ŭ Bieraści nia viedaje, kaho bolš škada — achviary ci zabojcy

Na 20 hadoŭ u turmu pojdzie dyjakan Hienadź Kaleśnikaŭ za zabojstva nastajaciela bieraściejskaj Śviata-Mikałajeŭskaj carkvy ajca Michaiła (Saciuka). Dy jašče j maje spłacić kampensacyju za maralnuju škodu synu j dačce zabitaha (pa 250 tys. rub. kožnamu), a taksama ŭdavie (500 tys.).

Saciuk byŭ zabity 12 kastryčnika 1998 hodu nažom u svajoj sobskaj mašynie ŭ lesie kala Telmaŭ, pryharadnaha sielišča. Pachavali jaho z asablivaju pašanaju na ćvintary, adpiavaŭ sam mitrapalit Fiłaret. Jahonaja mahiła stanaviłasia abjektam pakłanieńnia — babulki jaje całavali, z carkvy vychodziačy.

Kaleśnikaŭ raniej prysłužvaŭ dyjakanam u toj carkvie, što i ajciec Michaił, vielmi hrašovaj — jana staić u samym bahatym bieraściejskim rajonie, la bazaru i vakzałaŭ. U saviecki čas jana była začynienaja ŭładami, ale apošnim časam adrestaŭravanaja. Heta prychod z prychodaŭ navat na Bieraściejščynie, dzie pravasłaŭje dahetul šanavanaje spasiarod šanavanych. Viadoma, što ŭ śviataroŭ była vialikaja kankurencyja za takuju parafiju, pahatoŭ, što mienavita pry joj — rezydencyja japiskapa Bieraściejskaha i Kobryńskaha Kanstancina, pavažanaha patryjarcha (pa hadoch) biełaruskaha pravasłaŭja.

Kaleśnikava zatrymali byli na nastupny ž dzień paśla znachodki trupa — milicyja, akazvajecca, svajo dzieła znała, i praviarała nia tolki versii, što vykazvalisia ŭ pravasłaŭnych kołach (pra satanistaŭ najpierš, a taksama pra hrošy, pazyčanyja na budaŭnictva saboru i za jakija nie było jak raźličycca, a taksama pra pomstu muža niejkaj žančyny, jakuju Saciuk byccam by spakusiŭ). Ale praz sutki jaho adpuścili. Aryštavali ž Kaleśnikava nanoŭ u śniežni 1999 hodu — u toj čas jon pracavaŭ dyjakanam u adnoj z homielskich cerkvaŭ.

Sud pryznaŭ jaho vinavatym pa artykule «naŭmysnaje zabojstva pry abciažarvajučych abstavinach, učynienaje z asablivaj žorstkaściu». Prakuror vinavaciŭ jaho taksama pa artykule «razboj», ale sud paličyŭ hetaje abvinavačvańnie niedakazanym.

Matyvami zabojstva sud paličyŭ paharšeńnie finansavaha stanovišča siamji Kaleśnikavych paśla pieravodu dyjakana ŭ inšuju carkvu, a taksama seksualnyja damahańni z boku ajca Michaiła. Jak piša ahienctva BiełaPAN, na sudovym pasiadžeńni, jakoje ciahnułasia bolš za miesiac pry začynienych dźviarach, kalehija Bieraściejskaha abłasnoha suda ŭstanaviła, što Kaleśnikaŭ złoŭžyvaŭ harełkaju i byŭ zvolnieny sa Śviata-Mikałajeŭskaj carkvy abhruntavana (u momant učynieńnia złačynstva Kaleśnikaŭ taksama byŭ pjany).

U dzień zabojstva dva carkoŭniki strelisia, kab pahavaryć pra mahčymaść pieravodu Kaleśnikava nazad u Bieraście. Jany zajechali ŭ les i ajciec Michaił byccam by prapanavaŭ arhanizavać pieravod, kali Kaleśnikaŭ ustupić ź im u homaseksualnuju suviaź. Pavodle słovaŭ Kaleśnikava, jon vychapiŭ nož i ŭdaryŭ Saciuka ŭ halonku, potym, niahledziačy na prośby źlitavacca, rezanuŭ jašče paru razoŭ. Paśla zabojstva Kaleśnikaŭ pryjechaŭ damoŭ i davaj pić dalej razam z žonkaj i tavaryšam, jak niama ništo. Voś rekanstrukcyja padziejaŭ pavodle suda.

Jak viadoma, prablemaj maralnaj dehradacyi słužak carkvy i homaseksualizmu, pašyranamu miž ich, u pryvatnaści, zasmučanyja mnohija pravasłaŭnyja intelektuały. Carkva ž sa zrazumiełych pryčynaŭ starajecca nie akcentavać uvahi na hetaj prablemie. Vyniasieńnie takich dalikatnaściaŭ na publičnaje abmierkavańnie nie abaviazkova pryviało b da ŭnutranaha ačyščeńnia carkoŭnaje jerarchii, ale nieadmienna paspryjała b rasčaravańniu ludziej u carkvie jak instytucyi i navat adpadzieńniu ich ad Boha ŭvohule, ličać praciŭniki publičnaści ŭ hetym pytańni. Biełarusy jašče nie nabyli stojkaści ŭ viery paśla savieckaha ateizmu, uvažajuć jany. Mienavita hetymi mierkavańniami, treba dumać, kiravałasia Rasiejskaja Pravasłaŭnaja Carkva, nijak nie adreahavaŭšy na letašni artykuł u rasiejskaj hazecie Moskovskij komsomolec, u jakim biełaruski mitrapalit Fiłaret i ŭkrainski Ŭładzimier, pastaŭlenyja na čale kalanijalnych adździełaŭ RPC, nazyvalisia prychilnikami nietradycyjnaj seksualnaj aryjentacyi, što, pavodle hazety, źmianšaje ichnyja šancy stać nastupnikami patryjarcha Aleksija.

Ciaham tydnia prysud Bieraściejskaha sudu moža być abskardžany, i Kaleśnikaŭ źbirajecca heta zrabić. Bieraściejskaja hramadzkaść, šakavanaja padrabiaznaściami spravy, nia viedaje, što j dumać.

Barys Tumar