№ 46 (203), 13 — 20 listapada 2000 h.
Załaty švahier
praśpiavaŭ “himn XX stahodździu”
Narešcie skončyŭsia “Mižnarodny muzyčny festyval “Załaty šlahier”, što ceły tydzień ciešyŭ sercy savieckich hraždanoŭ. Voś ža, jak u prykazcy, dy naadvarot: retra-kłoŭny źjechali, a ichny cyrk zastaŭsia.
Čymści ŭsio ž hetaje šablonnaje mierapryjemstva ździviła: akramia stałych vykanaŭcaŭ, da “Švahra” ŭ hości zavitali i koliś suśvietna viadomyja pop-zorki: Tota Kutuńjo dy hurt “Eruption” (“Deep Purple”, daliboh, pryjechaŭ ź inšaj nahody). Miadovahałosy italjaniec naładziŭ “superšoŭ”, dzie ŭraziŭ prysutnych markotnikaŭ svajoj nadzvyčajnaj sympatyjaj da biełaruskich dzietak: sabraŭ ich z paŭsotni i “ŭ dziciačym natoŭpie pieramiaščaŭsia pa zali”, jak piša “SB”. Upieršyniu pryjechaŭ na imprezu Biul-Biul ahły, što voś užo 12 hod nikomu nie addaje partfel ministra kultury Azerbajdžanu. Abłažałasia sastarełaja seks-zorka Safija Rataru: pieła, pieła svoj “Miesiac”, dy raptam muzyka abarvałasia. Safija prypała na kalenca, uračysta adviała mikrafon, a “fanera”, chalera, vaźmi j zahraj nanoŭ. Vo dzie Ryhoravič prysaromiŭ arhanizataraŭ, mabyć... Na muzyčnuju mašynu času (z adnym nakirunkam palotaŭ – u śvietłaje minułaje) pryjechaŭ i rasiejski hurt z adnajmiennym nazovam: čas usio-tki prahnuŭsia pad ciažaram padsiviełych vykanaŭcaŭ.
Kab užo zusim nie zaimšeć, u “švahravu” chatu zavitaŭ i “švadron” maładych śpievakoŭ: usiaho 21 vakalist z 16 krainaŭ śvietu. Kab padleścić palityčna zvyšpryncypovym Štatam, žury – ci nie pa padkazcy – addało Hran-pry maładoha konkursu kalifarnijcu Antońjo Martynesu, jaki viarnuŭ na miesca emisii 2000 amerykanskich rubloŭ. Premijavanaja kampazycyja zvałasia zvyšaryhinalna – “Kiss Me”: heta vam nie zaniuchany “Californication”. Lepšym mužčynskim hołasam pryznali, adnak ža, biełarusa Anatola Alecha. Cikava, a jakim hołasam śpiavaŭ amerykaniec?
Dalary viarnulisia ŭ ZŠA, a kolišni miančuk Jakaŭ Jaŭno – na Radzimu, dzie, dziakujučy pramoŭšanu Dunajeŭskaha, praśpiavaŭ talerantnamu nasielnictvu paru-trojku žydoŭskich liryčnych piesień.
Hledačy ŭsio “bisiravali” dy “bisiravali”, a “Ahmad Tea” svaju harbatu “pedaliravaŭ”: za adzin kancert pryzvyčajenyja za savietami da chalavy biełarusy vyžłukčvali ažno pa 20 litraŭ hetaha napoju.
A BT pryjechała da “Švahra”, kab źniać navahodniuju pieradaču (“A mužiki-to nie znajut!”), brali “ekskluzyŭnyja” interviju na fonie ŭpryhožanaj jalinki. Jalinka jalinkaj, a voś “šampuniem”, jak pišuć, tak nikoha z surazmoŭcaŭ i nie pačastavali.
Na Miensku z Mahilovam festyval, jak vyjaviłasia, nia skončycca: hala-kancerty adbuducca ŭva ŭsich bujnych miestach SND, a zaklučny retra-numar projdzie, dzie j maje być – u kramloŭskim Pałacy źjezdaŭ. 19 śniežnia. A Kutuńji z “Irapšanami” dumali, što na tydzień zavitali, nia bolej. Nie ŭžo, treba pa-słaviansku – dzie “bis”, tam i “trys”, i “kiaturys”.
Cikava adznačyć, što naš “Švahier” šče zusim małady – jamu tolki 6 hod. Stolki ž Łukašenka siadzić u prezydenckim kreśle. Z hakam, praŭda.
A.Uciuhovič
Kamientary