Presa
BAŽ śviatkuje
17-18 listapada ŭ Miensku prajšoŭ I Respublikanski fest niedziaržaŭnaj presy, arhanizavany Biełaruskaj Asacyjacyjaj Žurnalistaŭ. Udzieł uziali bolš za 20 vydańniaŭ. Staršynia BAŽu Žana Lićvina padkreśliła ŭ svaim vystupie, što śviatkavańnie adbyvajecca ŭ nie zusim śviatočnych umovach, adnak, niahledziačy na ciažkaści, žurnalisty musiać zachoŭvać pryznačeńnie svajoj prafesii, baranić pravy hramadzianaŭ na atrymańnie abjektyŭnaj infarmacyi. Sustreča z čytačami prachodziła ŭ formie vypusku hazety. Sa słovami vitańnia i padarunkami asobnym žurnalistam vystupili Karłas Šerman, Michaił Čyhir, Alaksandar Dabravolski, Michaił Pastuchoŭ, Siamion Domaš. Hości festyvalu – Vilis Kavalaŭskas z Sajuzu Žurnalistaŭ Litvy i Alaksandar Kamiejka z Sajuzu Žurnalistaŭ Rasiei – chvalili biełaruskich žurnalistaŭ za prafesijny ŭzrovień i mužnaść pisać u ciažkich palityčnych umovach. Naprykancy imprezy BAŽ ušanavaŭ 10 vydańniaŭ dyplomami “Za addanaść prafesii”. Heta “Salidarnaść”, “Riehion-viesti”, “Pahonia”, “Ašmianski kurjer”, “Homielskaja dumka”, “Biełaruski rynak”, “Kamsamolskaja praŭda ŭ Biełarusi”, “Rehijanalnyja viedamaści”, “Naša svaboda” i “Zhoda”.
BAŽ papiaredžvaje
Biełaruskaja Asacyjacyja Žurnalistaŭ raspaŭsiudziła paviedamleńnie pra rezkaje paharšeńnie stanovišča ŚMI ŭ Biełarusi. U pryvatnaści, BAŽ papiaredžvaje: “Bolšaść niezaležnych hazet Biełarusi mohuć być źlikvidavanyja ŭžo ŭ studzieni 2001 hodu”. Padstavaj moža stać patrabavańnie da ŭsich hazet pierarehistravacca da pačatku nastupnaha hodu. “Hruvastkaja biurakratyčnaja pracedura hetaha sumnieŭnaha z pravavoha punktu hledžańnia mierapryjemstva nie dazvalaje ździejśnić jaho ŭva ŭstalavanyja terminy”, — papiaredžvaje BAŽ. Druhaja padstava – ekanamičnaja niaroŭnaść dziaržaŭnych i niezaležnych ŚMI. “Najbolš dyskryminacyjnymi źjaŭlajucca taryfy na raspaŭsiud niezaležnaj drukavanaj pradukcyi. Jany ŭ 4,5–5 razoŭ pieravyšajuć adpaviednyja vydatki dziaržaŭnych vydańniaŭ”. BAŽ razumieje, što napiaredadni prezydenckich vybaraŭ 2001 h. stanovišča ŚMI ŭ Biełarusi budzie jašče bolš abvastracca. BAŽ ličyć nieabchodnym: prypynić praces pierarehistracyi; zabiaśpiečyć roŭnyja ekanamičnyja ŭmovy; spynić idealahičny, ekanamičny i administracyjna-sudovy cisk na niedziaržaŭnyja vydańni; nieadkładna źniać aryšt z abstalavańnia pryvatnaj drukarni «Medžyk»; uzmacnić mižnarodny kantrol za vykanańniem biełaruskim uradam abaviazkaŭ u miežach mižnarodnych damoŭlenaściaŭ.
“Začystka” ŭ Smarhoni
Radyjo Racyja paviedamiła, što na miažy zakryćcia apynułasia «Novaja hazieta Smorhoni». Rachunak hazety zamarožany. Žurnalisty adzinaj niezaležnaj u hetym horadzie hazety nazyvajuć dziejańni ŭładaŭ «infarmacyjnaj začystkaj» i zajaŭlajuć, što «takim aryhinalnym čynam ułady raspačali kampaniju padrychtoŭki da prezydenckich vybaraŭ nastupnaha hodu».
Hazeta ŭ haražy
Aršanskuju niezaležnuju hazetu “Kuciejna” anijak nie žadajuć rehistravać. Dla hetaha patrebny jurydyčny adras, jaki nichto hazecie davać nie žadaje — bajacca miascovaj ułady. Hałoŭny redaktar “Kuciejna” Viktar Andrejeŭ u rospačy padaŭ zajavu na rehistracyju hazety ŭ haražy. Pakul niezaležnyja žurnalisty čakajuć adkazu, u šapikach pradajuć aficyjoznuju “Aršanskuju hazetu”, jakaja bolš nia maje kankurentaŭ u horadzie.
Pavodle BARC
Kamientary