№ 47 (204), 20 — 27 listapada 2000 h.
Biełaruskija hrošy rasiejskaj palityki
Sapraŭdnaj sensacyjaj stałasia zajava Tamary Rochlinaj, udavy zabitaha ŭ 1998 h. rasiejskaha hienerała, pra toje, što Łukašenka davaŭ jaje mužu hrošy na padrychtoŭku masavaha vystupu siłavikoŭ suprać Jelcyna.
Vystupajučy 15 listapada ŭ haradzkim sudzie Nara-Faminsku, Tamara Rochlina skazała, što jaje muž rychtavaŭ vialikuju antyjelcynskuju akcyju, pra jakuju było viadoma Hienadziu Ziuhanavu, Viktaru Iluchinu, Albiertu Makašovu dy Alaksandru Łukašenku. Apošni, kali vieryć jaje słovam, zabiaśpiečvaŭ jak maralnuju, tak i finansavuju padtrymku. Rochlina kaža, što paśla zabojstva ź letnika źnikła vialikaja suma, jakuju sabrali adnadumcy Rochlina dla finansavańnia akcyi… U vyniku ŭdavie hienerała dali 8 hadoŭ źniavoleńnia, paŭtara ź jakich jana ŭžo adsiedzieła pad śledztvam.
Ranišni streł
Nievynosnaja haleča była ci nie hałoŭnym dziciačym uspaminam Lava Rochlina. Jon uparta vykaraskvaŭsia ź jaje, uźnimajučysia ŭharu pa prystupkach słužbovaj leśvicy vajskoŭca. Atrymaŭ try dyplomy, słužyŭ u hrupie savieckich vojskaŭ u HDR, Zapalarji, vajavaŭ u Aŭhanistanie, u Čačenii byŭ abjaŭleny śmiarotnikam. Zrabiŭsia, urešcie, deputatam rasiejskaj dumy. U vychodnyja lubiŭ pakorpacca na hradach na svaim leciščy ŭ vioscy Kłokava ŭ Nara-Faminskim rajonie, kudy pryjaždžaŭ z žonkaj, 15-hadovym synam dy dvuma achoŭnikami. Časam naviedvałasia darosłaja dačka ź dziciom.
Ranicaj 3 lipienia 1998 h. da Rochlinych vyrašyŭ zavitać susied. Mienavita jon i pabačyŭ zabitaha haspadara na kanapie. Streł ź pistaletu PSM, jaki padaravaŭ Rochlinu były ministar abarony Pavał Hračoŭ, prahučaŭ na piać hadzinaŭ raniej. Napaŭprytomnaja Tamara Rochlina nia zdoleła raspavieści milicyjantam ničoha peŭnaha. Paźniej na dopycie jana skazała, što zabiła svajho muža. Daktylaskapičnaja ekspertyza zaśviedčyła, što adbitki palcaŭ na dziaržalnie pistaletu naležać joj.
Śledztva kruciłasia vakoł taho, što mienavita Tamara Rochlina zabiła muža. Pryčyny – jaje niaŭstojlivy charaktar, siamiejnyja svarki, niespakoj pra dziaciej z-za palityčnaj dziejnaści baćki. Kazali pra toje, što adnosiny Rochlinych pahoršylisia paśla naradžeńnia syna, chvoraha na padučku. Śledztva tak i nie razhladała pa-surjoznamu versii pra toje, što Rochlina moh zabić jahony syn ci achoŭniki, hruntujučysia, u asnoŭnym, na śviedčańniach apošnich.
U čakańni investycyjaŭ
Viadoma, nielha z 100-adsotkavaj upeŭnienaściu skazać, što zajavy Tamary Rochlinaj praŭdzivyja, jak nielha dać poŭnaj viery i sudu nad joj. Ale całkam realna pamierkavać, kamu było vyhadna zrabić palityčnuju staŭku na Lava Rochlina.
Rochlin sprabavaŭ abjadnać nie rasiejskich, a savieckich siłavikoŭ, bo sam tak i zastaŭsia aficeram savieckaj armii. Vyhadnaja stratehija – abrać za pole dziejnaści abšary SSSR zamiest terytoryi RF . Rabić investycyi ŭ novy ruch, jaki abiacaŭ zrabicca realnaju pahrozaju dla Jelcyna, mahło być pryciahalnym dla palityka, što žadaŭ pavialičyć svaju vahu ŭ rasiejskaj hulni ŭva ŭładu. Pośpiech rochlincaŭ adrazu davaŭ kozyry tamu, kamu raniej nie dazvalali navat dakranucca da kartaŭ. I, vidavočna, rochlinski ruch moh być vielmi pryciahalny dla čałavieka, pierapoŭnienaha ščyrym sumam pa savieckich časoch.
Ale ambitnaje pačynańnie pastupova hublała pryciahalnaść, bo jamu brakavała aktyŭnych dziejańniaŭ. Jak vynikaje sa słovaŭ Tamary Rochlinaj, sprava da ich paprostu nie dajšła – hienerała zabili. Jana kaža, što ŭ dzień zabojstva Rochlin planavaŭ vyjechać u Biełaruś, kab sustrecca z Łukašenkam. Užo nichto nie daviedajecca, pra što jon mieŭsia raspavieści. Zrešty, Łukašenka moža mieć bolš infarmacyi, čym chto inšy – na minułym tydni jon vykazaŭ skandalnuju padziaku za rehularnyja “analityčnyja i aperatyŭnyja materyjały z Maskvy” dyrektaru FSB Siarhieju Lebiedzievu. Cikava, ci nie adtul jon atrymaŭ źviestki pra padrychtoŭku da napadu na Lava Rochlina (interviju hazecie “Pravda” 17 lutaha 2000 h.)? Jak heta suadnosicca z zajavami Tamary Rochlinaj pra dačynieńnie FSB da zabojstva?
Adkazaŭ na pytańni niama, adno versii. Zrešty, heta nia tak istotna. Navat kali Tamara Rochlina sapraŭdy zastreliła muža, kali ŭsie jaje słovy – tolki adčajnyja sproby davieści svaju nievinavataść, sama ideja taho, što biełaruskija hrošy mohuć adyhryvać samastojnuju dy važkuju rolu ŭ rasiejskaj palitycy, vartaja asablivaj uvahi.
Aleś Kudrycki
Kamientary