Z usioj krainy

 Z usioj krainy

Ź viečara 14 lutaha kamanda milicyjantaŭ pilnavała na hanku siadziby BNF, kab aryštavać Paŭła Sieviarynca za “arhanizacyju niesankcyjavanaha šeścia” na Dzień śviatoha Valancina. Frontaŭcy, majučy dośvied adbićcia nalotaŭ, zamknulisia zahadzia. Milicyjanty dziažuryli ŭ mašynie ŭsiu noč i nastupny dzień. Inšaja milicyjnaja kamanda ŭziała na pryceł i zadnija dźviery siadziby. Hetyja dla padstrachoŭki zalapili vočka plajstram i padpiorli dźviery toŭstym kałom. “Pastaŭcie na miesca!” – kryčeli jany kožnamu, chto maniŭsia skraści dubiec “na drovy”. A Sieviaryniec tak i nie vychodziŭ. Major Hirel taksama nie davaŭ svaim ludziom kamandy ŭłamicca, bo nia mieŭ sankcyi na aryšt. 16-ha znadvornaje nazirańnie źniali. Milicyjanty načekvali ŭ zasadzie ŭ specyjalna padahnanym tralejbusie na inšym baku vulicy. Tady vypuścili j samoha Paŭła, zmoranaha dvuchdzionnaj abłohaj. Tutaka jaho i ŭziali. Pavieźli ŭ sud, a sudździa vypuściła da paniadziełka pad padpisku pra niavyjezd, bo śpiašałasia na sustreču z Łukašenkam. Prysud stanie viadomy siońnia.

Pravasłaŭje pa hrafiku

Na minułym tydni ŭ Miory pryjechała pierasoŭnaja vystava “2000 hod chryścijanstvu. Biełaruś pravasłaŭnaja”. Vykankam terminova sabraŭ dyrektaraŭ usich dziciačych navučalnych ustanovaŭ i zahadaŭ zabiaśpiečyć stoadsotkavaje naviedańnie dadzienaj vystavy vučniami tutejšych škołaŭ. Dałučeńnie da pravasłaŭnych kulturnych kaštoŭnaściaŭ adbyvajecca pa hrafiku – niezaležna ad žadańnia vučniaŭ i ich kanfesijnaj prynaležnaści. Nastaŭnik, čyj urok prypadaje na pryznačany čas, pavinien brać dziaciej i vieści ich na vystavu. Cikava było b daviedacca, jak heta stasujecca z pravami dziciaci, roŭnaściu kanfesijaŭ i ci nie paŭpłyvaje admoŭna na navučalny praces?

Hołas ź Mioraŭ

Śv.Valancin u Horadni

14 lutaha siabry Maładoha Frontu i Maładoj Hramady na praciahu dnia vinšavali žycharoŭ horadu, razdajučy im valancinki. Siamionu Domašu, jakoha moładź ličyć budučym prezydentam, było ŭručanaje śviatočnaje vinšavańnie ad kaalicyi «Pieramienaŭ!» — pryhožaja nakidka z nadpisam «14 lutaha — Dzień śviatoha Valancina. Lubovi, svabody, pieramienaŭ!», aŭdyjokaseta «More kachańnia» dy admysłovaja valancinka. Skončyła śviatkavańnie dyskateka ŭ Medyčnym universytecie.

Andrej Mialeška, Horadnia

Mitynh prafsajuzaŭ

Na Dzień śviatoha Valancina na płoščy Banhałor pratestavali prafsajuzy. Sabrałosia kala 3000 mitynhoŭcaŭ. Na trybunie mitynhu stajaŭ transparant “Zarobki – na ŭzrovień koštaŭ!”, toj samy, što j na letašniaj akcyi prafsajuzaŭ.

A.K.

Ludziej mienšaje

U 33 vioskach i chutarach Ašmianščyny zastałosia ŭsiaho pa adnym žycharu. U 8 vioskach – pa dva, a ŭ 19 – pa try žychary. Najbolš takich pasialeńniaŭ u zonach viosak Maćviliški i Kamienny Łoh. A dziaciej najmieniej u Dokšyckaj zonie: na 100 čałaviek usiaho 8. Ci treba tut kamentary?

Nastaŭnikaŭ rychtujuć
da vybaraŭ

U kožnuju škołu Astravieččyny pastupiŭ zahad “źvierchu” pravodzić štotydzień z nastaŭnikami hadzinu palitinfarmacyi. Dziela čaho heta robicca – zrazumieli i biez namiokaŭ, bo prezydenckaja vertykal pačała rychtavacca da vybaraŭ. Akramia hetaha, kožny klasny kiraŭnik pavinien raskazać svaim vučniam pra byłoha haradzienskaha hubernatara Dubka.

Marjan Vianhroŭski, Astraviec

Paciarpiełyja za Biełaruś

17 lutaha ŭ Viciebsku zatrymali Ihara Ziemlakova za razdaču ŭlotak studentam. 16 lutaha paśla trochdzionnaj abłohi ŭpravy BNF aryštavali Paŭła Sieviarynca. Paśla akcyi 14 lutaha ŭ Miensku aryštavali šaścioch čałaviek, čyje imiony pakul nie ahałošvajucca. 14 lutaha Barysaŭski haradzki sud aštrafavaŭ Alaksandra Abramoviča, kiraŭnika miascovaha adździaleńnia Narodnaje Hramady na 5 min. zarobkaŭ za “niepavahu da sudu”. 13 lutaha apisali majomaść staršyni viciebskaje arhanizacyi AHP Aleny Zaleskaj. Joj dali štraf 540 tys. rub. za praviadzieńnie pikietu. Štraf buduć vyličvać z nastaŭnickaje pensii spn.Zaleskaj, jakaja składaje 46 tys. u miesiac. U noč z 8 na 9 lutaha ŭ Babrujsku zatrymali Valerja Mackieviča dy Dzianisa Šejku. Kanfiskavali nalepki “Zubr”, “Akcyja lubovi” dy adpuścili. U Horadni zvolnili z pracy ŭ Centry navučańnia i reabilitacyi psychična chvorych dziaciej Śviatłanu Niech, aktyvistku Hramady.

A.K.