Jarašuk abiacaje viarnuć preferencyi...
A mo', naadvarot, raspačniecca palavańnie na viadźmarak?
Choć takoha zychodu i čakali, siońniašni "demarš Mandelsona" prahučaŭ jak hrom z čystaha nieba. Nie čakajučy mierkavanaj daty — 21 červienia, Eŭraźviaz vusnami kamisara ŭ spravach handlu abvieściŭ, što Biełaruś pazbaŭlajecca preferencyjaŭ.
Tym časam Alaksandar Jarašuk, lider apalnaha Biełaruskaha kanhresu demakratyčnych prafsajuzaŭ, trochi raspavioŭ pra zakulisny bok niadaŭniaha mierapryjemstva ŭ Ženevie. Taho samaha, vynikam jakoha stała ŭniasieńnie Biełarusi ŭ specparahraf (što, u svaju čarhu, zrabiła niepaźbiežnaj stratu preferencyjaŭ u handli z Eŭraźviazam).
Akazvajecca, pierad kanferencyjaj u Jarašuka była navat sustreča z namieśnicaj kiraŭnika prezydenckaj Administracyi Natallaj Piatkievič! Zrešty, na dumku lidera BKDP, uradavy bok dziejničaŭ u Ženevie nastolki niaŭkludna, što ŭźniaŭ suprać siabie navat tych, chto ad pačatku byŭ neŭtralny ci navat rychtavaŭsia zamović słoŭca za aficyjny Miensk. FPB narabiła šumu historyjaj z padroblenymi podpisami (prabačcie, "techničnaj pamyłkaj"!), a biełaruski vice-premjer, sa słoŭ Jarašuka, padčas vystupu ŭvohule parušyŭ palites, pierajšoŭšy na asoby. Tak što "ŭrad sam pryvioz u Biełaruś specparahraf MAP".
Apošnim časam ajčynnaje načalstva raz-poraz atrymlivaje žorstkija ŭroki ad mižnarodnaj supolnaści. Vyhladaje na toje, što začystka palityčnaha landšaftu sasłužyła kiroŭnaj klasie kiepskuju słužbu. Vysokija asoby pryzvyčailisia havaryć i rabić što zaŭhodna, biaz rozdumu skručvać niazhodnych u baranoŭ roh, manipulavać ličbami dy faktami — i pakrysie stracili pačućcio realnaści. Bo što ni ŭčyni, padchalimy plaskajuć u ładki, u palityčnych apanentaŭ lapy zatknutyja, pipł zasiarodžana smokča svoj "čarlik"... A voś cyvilizavanaje zamiežža, akazvajecca, da takoha stylu nie pryvučanaje. Ni nachrapam, ni chłuśnioj jaho nia voźmieš. I aficyjny Miensk usio čaściej siadaje ŭ haloš.
Zaraz hałoŭnaje pytańnie ŭ tym, jaki scenar pavodzinaŭ vybiera ŭłada paśla taho, jak skasavańnie preferencyjaŭ stała faktam.
Na dumku palitolaha Valera Karbaleviča, kvaziliberalizacyja skončycca. Režym uskliknie "ach, vy tak!.." — i jašče tužej zakrucić šrubki. Jarašuk taksama nie vyklučaje, što pačnuć truščyć "piatuju kalonu", ale ŭvohule aptymistyčna miarkuje, što, naadvorot, u apazycyi źjaŭlajecca vahar, kab trochi napružvać uładu.
Va ŭsiakim razie, pilnaja ŭvaha zamiežnikaŭ moža utrymać kiraŭnictva dziaržavy ad kančatkovaha vypalvańnia hramadzka-palityčnaha pola. Mižnarodnyja struktury papiaredžvajuć aficyjny Miensk, što buduć adsočvać sytuacyju na pradmiet mahčymych represijaŭ, naprykład, suprać toha samaha BKDP. Spalvać masty ŭ stasunkach z Zachadam pry vielmi zmročnaj kanjunktury na ŭschodnim kirunku było b zusim niedalnabačna. I naadvarot, pry najaŭnaści prahresu ŭ vykanańni rekamendacyjaŭ MAP lider BKDP abiacaje jak maha chutčej inicyjavać viartańnie preferencyjaŭ.
Inšaja reč, što, pry ŭsich mahčymych maneŭrach, vialikaj voli niezaležnym prafsajuzam u nas nie daduć. Heta sto pudoŭ. Chaj užo lepiej harać haram tyja preferencyi! Bo pierad vačyma vysokaha načalstva peŭna ž staić pryvid polskaj "Salidarnaści". Kali pachiśniecca stvorany va ŭmovach "naftavaha afšoru" dabrabyt, dyk mienavita struktura "a-la prafsajuz" pad sacyjalna-ekanamičnymi lozunhami moža sabrać tuju krytyčnuju masu, jakaja zastajecca niedasiažnaj maraj tytulnaj palityčnaj apazycyi.
U nas nie było Majdanu, ale była płošča Lenina. Nia śmiejciesia, ja maju na ŭvazie vychad sta tysiačaŭ praletaraŭ da Domu ŭradu ŭ krasaviku 1991 hodu. Tady, paśla "paŭłaŭskaha" padvajeńnia cenaŭ, samaja cichmianaja, lajalnaja savieckaja respublika termajadravym vykidam pratestavaj enerhii šakavała maskoŭskaje načalstva. A ŭ Miensku na toj momant kamu-kolviek, musić, uvohule nie zaškodzili b pampersy :-)
Bałota bałotam, ale ad hetych partyzanskich dziaciej čaho zaŭhodna čakać možna!
Kamientary