Biełaruś praz sto hadoŭ
Lider Paŭnočna-Eŭrapiejskaha Aljansu
Paśla treciaj suśvietnaj vajny, raźviazanaj u vyniku abmienu mižkantynentalnymi terarystyčnymi ŭdarami, palityčnaja karta śvietu istotna źmienicca i zaśviedčyć, što spadziavańni na kalektyŭny ćviarozy rozum čałaviectva znoŭ vyjavilisia marnymi. U pačatku CHCHII st. Kitaj budzie znachodzicca ŭ stanie paŭraspadu, Rasieju vyniki vajny lakalizujuć u rajonie Zachodnie-Sibirskaj raŭniny, ZŠA buduć padzielenyja pamiž Kanadaj, Meksykaj, Kubaj, Brazylijaj i Arhientynaj. Indyja viernie ŭ svajo ŭłońnie Pakistan i budzie zachoŭvać uzbrojeny neŭtralitet. U časie pavajennych razborak kurdy ŭtvorać svaju dziaržavu — Kurdystan, a Irlandyja akupuje sumiežnyja ź joju ziemli Brytanii (rešta anhielskaj terytoryi budzie ŭjaŭlać saboju atamny palihon).
Biełaruś budzie sustrakać CHCHII stahodździe jak centar Paŭnočnaj Eŭropy, utvaryŭšy hieapalityčny Paŭnočna-Eŭrapiejski Aljans, u jaki ŭvojduć Švecyja, Narvehija, Danija, Polšča, Finlandyja, Karelija i pratektarat “Prybałtyja”. Karabli biełaruskaha vajennaha i handlovaha flotaŭ buduć znachodzicca ŭ Bałtyckim, Barancavym, Paŭnočnym, Narveskim morach i ŭ Batničnaj zatocy.
Paśla treciaj suśvietnaj Biełaruś budzie pieražyvać demahrafičny ŭzdym — našych naščadkaŭ nia spyniać ekanamičnyja prablemy. Naadvarot, rost naradžalnaści budzie abumoŭlivać perspektyvu ekanamičnaha rostu.
Navukovy patencyjał krainy budzie zachavany. Praciahniecca raźvićcio navukajomistych technalohijaŭ. Našyja spadarožniki buduć vyviedzienyja na arbitu Ziamli dy inšych planetaŭ.
Unutrany palityka-sacyjalny ład budzie vyznačacca nastupnymi źmienami. Da ŭłady ŭ krainie pryjdzie Biełaruski Nacyjanalny Kanhres i jahony kancler, a instytut prezydenctva zachavaje pieravažna pradstaŭničyja funkcyi. Dla vyrašeńnia pytańniaŭ nacyjanalnaha vyžyvańnia i dziaržaŭnaj biaśpieki sklikajecca Valny Sojm Starejšynaŭ. Na pastajannaj asnovie dziejničajuć Vierchniaja Pałata i Pałata Pradstaŭnikoŭ. Zachoŭvajecca davajenny administracyjny padzieł na rajony i vobłaści. Svaju asobnuju formu kiravańnia maje pratektarat “Prybałtyja”, u jaki ŭvachodzić i byłaja Kalinihradzkaja vobłaść. Va ŭmovach pastiadravaj adbudovy dziejnaść nadnacyjanalnych i niebiełaruskich partyjaŭ i tavarystvaŭ zabaroniena Kanstytucyjaj.
Mova i nacyjanalnaja škoła. Razam z zaniapadam Rasiejskaj Federacyi spyniłasia i ekspansija rasiejskaj movy. Biełaruskaja dziaržava absalutna naturalna pačała viartacca da svajoj. Niejkaha asobnaha nacyjanalnaha ŭniversytetu nie pabudujuć: nacyjanalnymi stanuć užo isnyja VNU, PTV, licei, a najpierš dziciačyja sadki dy jasielki.
Medycyna. Z-za rostu śmiarotnaści ad chvarobaŭ, vyklikanych radyjacyjaj, zakanadaŭča zamacavana prava na eŭtanaziju. Usie ciažarnyja ŭ abaviazkovym paradku prachodziać dyjahnostyku na najaŭnaść patalohii płodu. Dziaržava ŭsialak stymuluje naradžeńnie zdarovych dziaciej i nie ŭchvalaje abortaŭ.
Relihija. Nijakaha ahulnanacyjanalnaha vieravyznańnia biełarusy praz sto hadoŭ mieć nia buduć — navošta? Bolš za toje, chryścijanstva paśla treciaj suśvietnaj budzie zaniepadać. Pačnie adradžacca instytut Hierojaŭ. Z renesansu pahanstva paŭstanie renesans kultury. Kultura pierastanie być dźviuchdušnaj i dvuchiazykaj. Z kantynentalnaj Biełaruś pieratvorycca ŭ marskuju dziaržavu. Biełaruskaja nacyja, vyjšaŭšy ŭ vody Suśvietnaha akijanu, adčuje siabie nacyjaj śvietu, mužnaj i samadastatkovaj. Mora vyzvalić našych naščadkaŭ z pałonu pradziedavych kompleksaŭ. Ale adnojčy, uklučyŭšy systemu aŭtapilotu dzieści pamiž Mienskam i Banhałoram, małady biełaruski šturman adkiniecca na śpinku kresła i ŭzhadaje takija ziamnyja radki:
chaj doždž praljecca, i vyjduć
pčoły,
i ŭ poli vyrastuć kamiani,
i ź nieba promień pyrśnie viasioły
na krony, kraty i karani!
Bo i praz sto hadoŭ biełarusy zastanucca svabodnaj Nacyjaj Paetaŭ.
Słavamir Adamovič
KDB aktyŭna viarbuje palitviaźniaŭ, vyzvalenych pa pamiłavańni — pravaabaroncy4
Kamientary