Radyjo "Svaboda": Bolšaść tych, chto zastalisia nanač kala namiotaŭ -- maładyja ludzi. Adnak siarod ich možna sustreć i dobra viadomych u krainie asobaŭ. Tak, razam z dačkoj pryjšoŭ siudy Siarhiej Dubaviec...
(Dubaviec: ) “Mianie vielmi mocna ŭražvaje toje, što tut sabrałasia moładź. Faktyčna tyja, chto pa ŭzroście maje dzieci. I ja lišni raz uśviedamlaju, što taja prablema, dziela jakoj jany siudy pryjšli, heta prablema majho pakaleńnia, a nia ichnaha!
Prosta čamuści majo pakaleńnie nie znajšło ŭ sabie stolki salidarnaści, siły duchu, kab stajać pierad absalutnaj pustatoj, pierad absalutnaj biezvynikovaściu i ŭsio ž taki patrabavać dla siabie inšaj krainy i inšaha žyćcia.
My sapraŭdy strašna-strašna małyja, my adkulści vyrastajem i ŭsio, na čym my staim, heta na svajoj viery, na sile duchu, a nie na jakich tam hrantach, finansavańni zachadu, Ameryki i hetak dalej”.
Filozaf Valancin Akudovič nia dumaŭ, što pryjdzie na Płošču 20-ha sakavika – kaža, što chacieŭ zachavać u dušy ŭźniosły nastroj ad papiaredniaha dnia, kali tut sabralisia dziasiatki tysiač ludziej. Adnak hetym razam jaho paklikała siamja...
(Akudovič: ) “Voś tut pobač žančyna pytajecca: “Dzie maje dzieci?”, dyk i ja ŭ hetkaj samaj sytuacyi. Žonka pryjechała siudy z haračaj harbataj u termasach, z usim astatnim... I ŭ namiotach ciapier jana, ja, syn z dačkoj – usia siamja!”
(Karespandent: ) “Što za ŭsim hetym staić?”
(Akudovič: ) “Razumieješ, pakul usie zališnie śpiašajucca abahulniać. A heta treba rabić paśla taho, jak pabačym razhornutaść učorašnich 10 ci 30 tysiač... Tady, paźniej, i skažam, ci sapraŭdy z hetymi namiotami źjavicca inšaje pakaleńnie, inšaja hieneracyja, ź inšym razumieńniem zmahańnia. Ale jany źjavilisia, i heta pakul samaje kaštoŭnaje”.
