Zavody ŭ abmien na mir

Zavody ŭ abmien na mir

Pucin praryvajecca ŭ biełaruski palityčny aharod

Upieršyniu za try hady ŭvahu aficyjnaje Maskvy pryciahnuła prablema źnikłych apanentaŭ A.Łukašenki. U Dumu nanieśli vizyt svajaki achviaraŭ represij u Biełarusi. Kiraŭniki praŭradavych frakcyj Dumy źviarnulisia ź listom da U.Pucina dy paprasili ŭmiašacca ŭ śledztva pa hetaj spravie.

Jak paviedamiŭ kiraŭniku AHP Anatolu Labiedźku Barys Niamcoŭ, na sustrečy z kiraŭnikami dumskich frakcyj rasiejski prezydent uvažliva vysłuchaŭ, adznačyŭ, što prablema surjoznaja, što jon u kursie, skazaŭ, što abaviazkova budzie na hetuju temu havaryć z Łukašenkam. Pry kancy sustrečy, jakaja doŭžyłasia bolš za 4 hadziny, Pucin zaznačyŭ: “Vielmi drenna, kali pravaja apazycyja, — hledziačy na Niamcova, — albo levaja apazycyja, — hledziačy na Ziuhanava, — kudyści źnikaje”.

Ciažka pavieryć, što paśla troch hadoŭ zmoŭnickaha maŭčańnia Rasieja adčuła zhryzoty sumleńnia. Pryčyna, vierahodna, u inšym. Jak pisała 27 červienia maskoŭskaja “Niezavisimaja hazieta”, “mocnyja rasiejskija biznes-koły byli b jašče j jak nia suprać uziać pad kantrol praktyčna “nieruš” biełaruskaj ekanomiki, darma što jana “składaje tolki 3% ad rasiejskaj”. Kuračka pa zierniejku dziaŭbie”.

Słuchańni ŭ Dumie na temu źnikłych byli dasiahnieńniem Abjadnanaj hramadzianskaj partyi i Anatola Labiedźki. Biełaruskaja apazycyja tym samym pryciahvaje Maskvu da vyrašeńnia ŭnutrypalityčnaj prablemy Biełarusi. Heta moža stać niebiaśpiečnym precedentam. Maskva ŭžo vykarystoŭvaje nahodu dla psychalahičnaha cisku na ŭrad u spravie pryvatyzacyi. Nia vyklučana, što apazycyja niekali horka paškaduje ab hetym zvarocie pa dapamohu. Maskva navažyłasia atakavać Łukašenku tolki dy kali biełaruskaja pravaja apazycyja praktyčna spyniła svajo isnavańnie. Kreml pierastaŭ bajacca, što Łukašenku źmieniać mienš prychilnyja da jaho siły. Z prychodam Pucina na biełaruskaje palityčnaje pole miesca dla nacyjanalnaje apazycyi moža nie zastacca zusim.

Lubaja krytyka Łukašenki ŭ čas, kali vyrašajecca los biełaruskaj majomaści, hučyć dvuchsensoŭna.

Pakul niajasna, jakim budzie vyrašeńnie kanfliktu pamiž rasiejskim kapitałam i biełaruskim režymam. Samaja prostaja schiema — “zavody ŭ abmien na mir”. Rasieja atrymlivaje dostup da majomaści i ŭzamien daje zhodu na praviadzieńnie Łukašenkam referendumu ab padaŭžeńni paŭnamoctvaŭ.

Druhuju schiemu ahučyli niefarmalnyja lidery “prarasiejskaje partyi” ŭ Biełarusi: Łukašenku adchilajuć ad ułady i pałata pradstaŭnikoŭ pryznačaje novyja vybary.

Najbolš rezka siarod biełaruskich kiraŭnikoŭ adreahavaŭ na apošnija padziei kiraŭnik savietu respubliki Alaksandar Vajtovič. U Biełarusi dałučeńnie da Rasiei na pravach subjekta padtrymlivaje 3,2% nasielnictva, zajaviŭ jon. Etničnych rasiejcaŭ u krainie bolej. Pakul A.Vajtovič adziny va ŭładzie, chto adkryta zajaŭlaje pra treci varyjant — zbližeńnie Biełarusi z Eŭropaj i rynkavyja reformy.

Va ŭmovach, kali Rasieja stała paŭnapraŭnym udzielnikam “vialikaje vaśmiorki”, demakratyzacyja Biełarusi robicca adzinaj mahčymaściu zachavać nacyjanalnuju niezaležnaść.

Mikoła Buhaj