Z usioj krainy

Z usioj krainy

Sparoli hniozdy

Dniami ŭ Kobryni na čyhunačnym vakzale administracyja zahadała źlikvidavać usie hniozdy łastavak. Ptuški z krykami lotali nad hałovami “likvidataraŭ”, sprabujučy ŭratavać ptušaniataŭ i svaje prytułki. A miž tym, u horadzie łastavak užo redka možna ŭbačyć, zatoje kamaroŭ dy inšaje žamiary — chmary.

Dyjamentavy pojas

Na pamiežnym pierachodzie “Varšaŭski most” mytniki skanfiskavali ŭ pasažyra turystyčnaha aŭtobusa 1380 kaštoŭnych kamianioŭ roznaje vieličyni zavodzkaj ahranki dy z ukazańniem karatnaje vahi. Kamiani byli schavanyja ŭ nacielny pojas. Kantrabandyst — rasiejec, žychar Jekaciarynburhu. Kiravaŭsia jon u Niamieččynu.

I. Chviedarovič, Bieraście

Dziahavičy pieramahli

Hałoŭny redaktar hazety “Respublika” na staronkach svajho vydańnia vybačyŭsia pierad žycharami vioski Dziahavičy Kryčaŭskaha rajonu. Jon pryznaŭ, što karespandent Ŭładzimier Dubavik skaziŭ histaryčnyja fakty j nia mieŭ racyi, kali tłumačyŭ haspadarčyja niaŭdačy viaskoŭcaŭ drennaj hienetykaj. Jak paviedamlała “NN”, zvyš 50 viaskoŭcaŭ padpisali list u redakcyju “Respubliki”, patrabujučy abviaržeńnia Dubavikovaha artykułu, i ŭžo surjozna rychtavalisia byli da sudu.

Rajvykankam suprać ušanavańnia pamiaci

Kryčaŭski rajvykankam nie dazvoliŭ arhkamitetu pa ŭšanavańni represavanych ziemlakoŭ ustalavać memaryjalnuju došku ŭ honar kryčaŭcaŭ, źniščanych u 1931—53 h. Na dumku namieśnika staršyni rajvykankamu sp.Sivakova, viešać došku niama sensu, bo ŭ knizie “Pamiać”, jakaja chutka vyjdzie, buduć proźviščy ŭsich represavanych.

Andrej Kuźmin, Kryčaŭ

Pieradśmiarotnaja prośba niemca

Adnoŭlenaja Śviata-Pakroŭskaja carkva ŭ Miłasłavičach (Klimaviččyna). Jana była pabudavanaja ŭ XIX st. U 1963 h. chram kančatkova začynili, i jon pačaŭ razburacca. Sabranych ludźmi srodkaŭ na adbudovu carkvy nie stavała. Dapamahli niemcy, što pryvoziać u rajon humanitarnuju dapamohu. Asabliva blizka da serca kłopat pryniaŭ Adam Trojer, jaki, pamirajučy, paprasiŭ svajakoŭ i siabroŭ pryjści na pachavańnie nia z kvietkami i viankami, a z achviaravańniami dla carkvy ŭ Miłasłavičach. Tak było sabrana 3550 dalaraŭ.

“Rodnaja niva”

Halošy dla aŭhancaŭ

Kryčaŭski zavod humavych vyrabaŭ vyjšaŭ na mižnarodny rynak. Ciapier štomiesiac da kanca hodu jon budzie ekspartavać dva vahony halošaŭ u Aŭhanistan. Abodva baki zadavolenyja, praŭda, spatrebiłasia krychu dapracavać “dyzajn” abutku.

“Leninski klič”

Vada za hrošy

Pastaŭskija kamunalniki pierakryli vadu tym, chto nia płacić za kvateru. Usie raniejšyja vychavaŭčyja miery — ad spahnańnia hrošaj praz sud da źmiaščeńnia śpisu vinavaŭcaŭ u “rajoncy” — vyjavilisia marnymi. Za apošnija miesiacy śpisy tyja tolki pabolšali. Kab nia lotać na dvor ź viodrami, ludziam tre budzie zapłacić i za kvateru, i za paŭtornaje padklučeńnie. Hetaja pasłuha kaštuje 21 tys. rubloŭ.

Źnik aktor Balasłaŭ Siaŭko

2 červienia pajechaŭ na lecišča dy źnik aktor Kołasaŭskaha teatru Balasłaŭ Siaŭko. Pieršy tydzień jaho šukali svajaki dy kalehi, na druhi dałučyłasia milicyja, na treci fatazdymki źnikłaha źjavilisia va ŭsich viciebskich hazetach… Na žal, dahetul źnikłaha B.Siaŭka nichto nia bačyŭ, choć hetaha artysta viedajuć u tvar dy mahli b paznać sotni viciebskich hledačoŭ.

A.T., Viciebsk

Vandały ŭ Kraśnicy

Viosku Kraśnica, što na Ivaceviččynie, niemcy ŭ vajnu spalili razam z žycharami. Na jaje miescy — siarod lesu, ubaku ad daroh — ludzi pastavili pomnik. Ale nieludzi, šukajučy kalarovych metałaŭ, dapiali j tudy. Vandały ściahnuli z pomnika plitu, razburyli i źniaviečyli aharodžu vakoł brackaj mahiły.

Aleś Łaŭraniuk, Ivacevičy

Aŭtobus u Smalensk

Ź minułaje piatnicy pamiž Mahilovam i Smalenskam pačali kursavać rejsavyja aŭtobusy. Chadzić jany buduć dvojčy na dzień u piatnicy, suboty i niadzieli. Ciapieraka ŭ mahiloŭcaŭ źjaviłasia dobraja mahčymaść bližej paznajomicca ź pieršaj stalicaj savieckaje Biełarusi.

Mikoła Kisiel

Abrez za šafkaj

Na Baranavickim zavodzie sianažnych viežaū milicyjanty znajšli ahniapalnuju zbroju. Samarobny pułhak z karotkaj rulaj zachoūvaūsia ū harderobie, za šafkaj adnaho z rabočych.

Kaściol rychtuje žurnalistaū

Škola žurnalistyki j kamunikacyji pry kulturna-relihijnym časopisie “Dyjaloh” Baranavickaha ryma-katalickaha kaściołu Maci Božaj Facimskaj vypuściła ū červieni pieršych 13 słuchačoū. Na praciahu dvuch hod, pa vychodnych, z usioj Biełarusi (Miensk, Horadnia, Babrujsk, Vaūkavysk, Maładečna) źjaždžalisia jany ū Baranavičy na vučobu. Sioleta ūsie vypuskniki paśpiachova abaranili dyplomnyja pracy. Viadziecca nabor na nastupnyja 2 hady.

Handlary kabietami

Baranavickaja siamja — muž z žonkaj — handlavali ludźmi. Tak, za 1500 niamieckich marak jany pradali letaś u Polšču 21-hadovuju žančynu. Krychu paźniej — 22-hadovuju (za jaje atrymali 800 marak). Abiedźviuch žančynaū u Polščy zmusili handlavać saboj. Na žal, “pradprymalniki” zdoleli ūciačy ad zakonu za miažu.

Rusłan Raviaka, Baranavičy

Udakładnieńnie pra katalohi “Otto”

U “NN” №24 pračytaŭ navinu I.Chviedaroviča ź Bieraścia pad nazvaj “Zamova za 10 tysiač”. Maju da jaje ŭdakładnieńnie. Nazvanaja tam pasłuha – zamova rečaŭ pa niamieckich katalohach – isnuje na poštach usioj krainy. Dyj prydumali jaje, vidać, nie bieraściejskija paštaviki. Mahčymaść pahladzieć na praciahu 1–2 sutak kataloh nie kaštuje ničoha, 10 tysiač rubloŭ pakidajucca ŭ zakład. Kaštuje ž sama zamova 15% ad koštu ŭpadabanaj rečy – heta kali jana kaštuje da 100 dalaraŭ ZŠA. Kali bolej – da cany dadajecca jašče 30% mytnaha zboru. Zamović možna nia ŭsio: dastaŭlajuć pasyłki vahoj da 31,5 kh, nie pryviazuć mebli, mabilnych telefonaŭ i zbroi. Tak što darma aŭtar hetak niapravilna j paviarchoŭna padaje źviestki.

Dźmitry Vinčeŭski z tut.by

cud tydnia

Kvaśnieŭski dałažyŭ Statkieviču pra dałučeńnie Biełarusi da šenhienskaj zony

Lider Narodnaj Hramady Mikoła Statkievič sustreŭsia ŭ Varšavie z prezydentam Polščy Alaksandram Kvaśnieŭskim. Pabačylisia na chvilinku — u časie kanferencyi “Bačańnie eŭrapiejskaha adzinstva”, što pravodziłasia pad patranažam polskaha lidera. Pavodle infarmacyi pres-słužby BSDP (NH), padčas spatkańnia A.Kvaśnieŭski vykazaŭ dumku, što “pryjšoŭ čas abmierkavać mahčymaść pašyreńnia dziejańnia šenhienskich pahadnieńniaŭ pra biaźvizavy ruch ludziej u Eŭrasajuzie nia tolki na Kalininhradzkuju vobłaść, ale i na Biełaruś”. Kali heta žart — pryjemna. Kali surjozna — udvaja.

Fest u Navahradku zapomniŭsia:

Mindoŭham paŭsiul. Jamu była pryśviečanaja bolšaść imprezaŭ: turnir, fihura ź piasku, karanacyja.

Lanotnymi rycarami, jakija paśla biassonnaje načy nie žadali ani bicca mižsobku, ani zabaŭlać publiku.

Imklivym, ale niadoŭhim buhurtam, na jakim vajary nia słuchalisia svaich ačolcaŭ, za što j byli razahnanyja milicyjaj i arhanizatarami.

Daždžom, što zmyŭ tron i karonu piasčanaha Mindoŭha, pakinuŭšy adnu pachmurnuju ruduju hałavu.

Majstrami z Brasłaŭskaha muzeju, jakija na vačach publiki plali kašy, tkali, lapili hliniany posud, davali pisać na vaskovych doškach, piakli bliny na hlinianaj piečy.

Vialikaj kolkaściu milicyjantaŭ, na fonie jakich fatahrafavalisia damy.

Doŭhim čakańniem šturmu zamku i nieadpaviedna chutkasnym šturmam.

Vydatnym kancertam na haradzkim placy. Muzyki ź Biełarusi, Rasiei, Łatvii, Čechii, Polščy pracavali za hrošy, vidać, tamu j vykłalisia napoŭnicu.

Mina Doŭhi,