Bitva za Mazyr
Kancern “Słaŭnafta” pierachodzić z ruk u ruki
Praciahvajecca baraćba miž rasiejskimi palityčna-finansavymi kłanami za kantrol nad kampanijaj “Słaŭnafta”. Peryjad “dvuchkaraleŭja” ŭ kampanii skončyŭsia pieramohaj Jurja Suchanava, čałavieka jelcynskaj “siam”i”.
Rasiejskaja dziaržava vałodaje 55% akcyj “Słaŭnafty”, 10,8% kantraluje Biełaruś. U traŭni, padčas vybaraŭ novaha prezydenta kampanii, biełarusy razam ź pieciarburskim “Mižprambankam” Siarhieja Puhačova padtrymali Anatola Baranoŭskaha. Ale pieramoh Jury Suchanaŭ, za jakim stajała “Sibnafta” Ramana Abramoviča, premjer Kaśjanaŭ i Barys Jelcyn. Tady z dapamohaj ministra ŭnutranych spravaŭ Barysa Hryzłova i namieśnika staršyni FSB Jurja Zaastroŭcava eks-prezydent Hucaryjeŭ samavolna zaniaŭ ofis kampanii, a Jurja Suchanava tudy nie puścili na toj padstavie, što suprać jaho ŭzbudžanaja kryminalnaja sprava.
Tolki ŭ aŭtorak kanflikt byŭ urehulavany. Abyšłosia biez stralaniny. Prosta, kažučy strymanaj movaj milicejskaha pratakołu, “milicyja pierastała zabiaśpiečvać prysutnaść Hucaryjeva ŭ ofisie kampanii”. Vierahodna, kanflikt vyrašyŭ sam Pucin.
Jury Suchanaŭ budzie nadalej ačolvać “Słaŭnaftu”. Na vosień zaplanavany prodaž u pryvatnyja ruki amal 20% akcyj kampanii, jakija ciapier naležać rasiejskaj dziaržavie.
Kryzys u “Słaŭnafcie” vyklikaŭ źnižeńnie abjomaŭ pastaŭki nafty ŭ Biełaruś. Pavodle infarmacyi prezydenta kampanii “Biełnaftachim” Ivana Bambizy, Mazyrski naftapierapracoŭčy zavod, jaki ŭvachodzić u skład kancernu “Słaŭnafta”, ciapier nie atrymlivaje patrebnych abjomaŭ syraviny. Pad pahrozaj apynułasia i rekanstrukcyja pradpryjemstva, u jakuju ŭžo ŭkładziena 60 młn. dalaraŭ. U červieni amal na tracinu źmienšylisia i abjomy pierapracoŭki rasiejskaj nafty ŭ Navapołacku.
Praŭda, “Słaŭnafta” nie najbujniejšy jaje pastaŭščyk u našu krainu. Samy bujny — kampanija “Surhutnaftahaz”. Jana planuje pastavić u Biełaruś u trecim kvartale sioleta 1,1 młn. tonaŭ nafty. “Słaŭnafta” z svaimi 340 tys. ton zajmaje tolki piataje miesca pa abjomach pastavak paśla “Jukasu” (790 tys. t), “Sibnafty” (607 tys. t) i “Łukojłu” (565 tys. t). Kali ž ličyć ad pačatku hodu, dyk Biełaruś atrymała navat bolej nafty, čym planavałasia. Usiaho za hod my pavinny impartavać z Rasiei 13 młn. t čornaha zołata. Sami ž zdabyvajem 2 młn. t.
Paraza Hucaryjeva — heta jašče adzin udar z Rasiei pa Alaksandru Łukašenku, jaki mieŭ z Hucaryjevym dobryja adnosiny.
Aleh Tačony
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary