Karasioŭ – “dva”!

Karasioŭ – “dva”!

Za ŭdzieł u demanstracyi dyrektarka zapatrabavała pastavić dziesiaciklaśniku-“zubroŭcu” “dva” pa pavodzinach

Pastavić hadavuju dvojku pa pavodzinach dziesiaciklaśniku Antonu Karasiovu zapatrabavała na pasiedžańni pedahahičnaje rady dyrektarka mienskaj himnazii №13 Volha Čarnavusava. Pryčynaj stałasia telefanavańnie ź milicyi: pravaachoŭnyja orhany paviedamili, što junak — siabar ruchu “Zubr” — udzielničaŭ 19 krasavika ŭ akcyi “Tak žyć nielha”. Nastaŭniki nia mieli pretenzijaŭ da paśpiachovaści i pavodzinaŭ Antona, ale za niezdavalniajučuju adznaku prahałasavali bieź piarečańniaŭ. Paśla hetaha, kaža Volha Karasiova, maci Antona, ad chłopca zapatrabavali zabrać dakumenty z himnazii.

Dyrektarka arhumentavała svaje dziejańni tym, što Anton parušyŭ statut navučalnaje ŭstanovy, dzie napisana: himnazistam udzielničać u palityčnych akcyjach zabaroniena. Adnak u statucie hetaj navučalnaj ustanovy niama nivodnaha słova pra ŭdzieł u palityčnych akcyjach. Tam zapisana: “Vučań abaviazany /.../ dastojna pavodzić siabie ŭ himnazii i za jaje miežami”. I ŭsio! Što ž “niedastojnaha” było va ŭdziele Antona ŭ akcyi “Tak žyć nielha”? Mierapryjemstva, viadoma, nie było dazvolenaje ŭładami, ale ŭdzieł u im — heta prajava hramadzianskaj pazycyi. Pahatoŭ, u punkcie 11 “Zadačy himnazii” adna z metaŭ hetaj ustanovy farmulujecca jak “vychavańnie ŭ vučniaŭ hramadzianskaści, patryjatyzmu, adkaznaści pierad saboj i hramadztvam”.

Razmaŭlać z karespandentam “NN” spn.Čarnavusava admoviłasia: “Radyjo “Svaboda” karystajecca niepravieranaj infarmacyjaj. A ja na hetuju temu budu havaryć tolki z vučniem i jahonymi baćkami. Aficyjnyja kamentary dam tolki “Nastaŭnickaj haziecie”.

Zahadčyca adździełu daškolnaj i siaredniaj školnaj adukacyi Mienskaha haradzkoha ŭpraŭleńnia adukacyi Ała Frałova zaznačyła: “Himnazija sapraŭdy maje prava pastavić vučniu niezdavalniajučuju adznaku za pavodziny pa-za škołaj ci himnazijaj — kali jon ździejśniŭ złačynstva ci pravaparušeńnie. Adnak baćki mohuć apratestavać niapravilnuju, na ichnuju dumku, adznaku: jany musiać napisać zajavu, potym budzie stvoranaja kamisija, jakaja razhledzić pravamiernaść adznaki”.

U Pravaabarončym centry “Viasna” “NN” paviedamili, što vyklučyć Antona Karasiova z himnazii za “dvojku” pa pavodzinach nia majuć prava: padstavaj dla vyklučeńnia moža być tolki kiepskaje navučańnie (“trojki” pa pradmietach).

U himnazii №13 užo źjaviŭsia zahad pra vučniaŭ, vyklučanych ź jaje pa vynikach navučańnia. Proźvišča Karasiova tam nie fihuruje. Praŭda, niezdavalniajučuju hadavuju adznaku za pavodziny Antonu ŭsio ž pastavili. Dyrektarka škoły patrabuje, kab baćki Karasiova samastojna zabrali dakumenty z himnazii. Anton admaŭlajecca rabić heta: “Chaču vučycca dalej”, — kaža jon.

Arkadź Šanski