Mitrapalit Mikałaj. BAPC, BANPC i A.Sałahub

U minułym numary “NN” źmiaściła analiz ciapierašniaha stanu biełaruskaha aŭtakiefalnaha pravasłaŭja za miežami Biełarusi paśla adychodu śvietłaj pamiaci ŭładyki Mikałaja. Na žal, na momant nadrukavańnia artykułu redakcyja nia mieła ŭ svaim rasparadžeńni važnaha piśma, vydadzienaha mitrapalitam Mikałajem za 5 dzion da śmierci.

Prosim čytačoŭ pryniać hety list da ŭvahi.

BAPC, BANPC i A.Sałahub

Vyjaśnieńnie

U interviju biełaruskaj prahramie radyjo “Svaboda” 25 traŭnia 2002 h. japiskap Alaksandar Sałahub, adłučany 26 studzienia 2002 h. ad Biełaruskaj Aŭtakiefalnaj Pravasłaŭnaj Carkvy za biaspraŭnaje prysvajeńnie ŭłady, byŭ pradstaŭleny jak “namieśnik pieršajararcha BAPC Mitrapalita Mikałaja”. U svaich vykazvańniach A.Sałahub paćvierdziŭ takoje niepraŭdzivaje pradstaŭleńnie jaho, vystupiŭšy ŭ roli jararcha BAPC. U interviju jon skazaŭ: “Ajciec Jan Spasiuk maim ukazam byŭ pryznačany kiraŭnikom spraŭ BAPC u Biełarusi z šyrokimi paŭnamoctvami”.

Da niadaŭnaha času a.Jan Spasiuk byŭ u hetak zvanaj Biełaruskaj Aŭtakiefalnaj Narodnaj Pravasłaŭnaj Carkvie “iapiskapa” Ehidyjuša Ryžaha. A ciapier, jak skazaŭ Sałahub, “u sakaviku sioleta ja pryniaŭ pad svoj archirejski amafor byłyja parafii tak zvanaj Biełaruskaj Aŭtakiefalnaj Narodnaj Pravasłaŭnyj Carkvy”.

Ideja aŭtakiefalii Biełaruskaj Pravasłaŭnaj Carkvy maje za saboj doŭhuju historyju, uviančanuju samaachviarnaj pracaj papiarednikaŭ, siarod jakich byli j mučaniki. Śvietłuju ideju aŭtakiefalii pavinien padtrymlivać kožny śviadomy biełarus jak na Baćkaŭščynie, hetak i ŭ dyjaspary. Uvasableńniem hetaj idei na čužynie stałasia bolš za 50 hadoŭ tamu Biełaruskaja Aŭtakiefalnaja Pravasłaŭnaja Carkva. Šmat chto z našych surodzičaŭ bačyć, jak maskoŭskaje pravasłaŭje vyjadaje kulturu j dušu biełarusaŭ. Aŭtakiefalija — heta ratunak ad niščeńnia Biełaruščyny, ad rusifikacyi. Ale ž ideju aŭtakiefalii treba pravodzić u žyćcio surjozna j na ćviordym hruncie. Treba, kab pad budynkam adnoŭlenaj BAPC u Biełarusi była histaryčnaja hleba j kananičnaja pierajemnaść.

Alaksandar Sałahub volny rabić toje, što jon choča, ale paśla jahonaha adłučeńnia ad BAPC nia maje nijakich padstavaŭ vystupać u roli jejnaha jararcha. I robiać pamyłku tyja, chto jaho ŭ takoj roli pradstaŭlaje.

Mitrapalit Mikałaj, Pieršy Jararch BAPC, Taronta

15 červienia 2002 h.

Pachavańnie mitrapalita Mikałaja

Uładyka Mikałaj byŭ pachavany 26 červienia ŭ Ńju-Jorku, na biełaruskich mohiłkach u Hajłend-parku. Ściah, jakim była ŭkrytaja truna jararcha, byŭ pieradadzieny na zachavańnie Staršyni Rady Biełaruskaj Narodnaj Respubliki Ivoncy Surville “dla biełaruskaha narodu”.