ŚNID nastupaje

ŚNID nastupaje

Kamisija AAN pa spravach ŚNIDu apublikavała dniami sensacyjnaje paviedamleńnie pra epidemiju hetaj chvaroby.

Virus usio chutčej raspaŭsiudžvajecca ŭ krainach Afryki, Azii, Karybskaha basejnu i Ŭschodniaj Eŭropy, tym samym abviarhajučy papularnyja raniej teoryi, pavodle jakich kolkaść chvorych musiła “stabilizavacca” z pryčyny niedachopu patencyjnych “achviaraŭ” u hrupach najbolšaj ryzyki. U krainach ža, jakija i raniej byli liderami pa raspaŭsiudžanaści ŚNIDu, rost kolkaści nośbitaŭ VIČ prosta ŭražvaje.

Tak, u Batsvanie dva hady tamu virus u svajoj kryvi mieli 36% darosłych žycharoŭ. Siońnia ich užo 39%. U Zymbabve ŭ 1997 h. nośbitami virusu byli 25% žycharoŭ, siońnia — užo tracina. U AAN ličać: kali nie pryniać terminovych mieraŭ, dyk u 45 najbolš “infikavanych” krainach za 2000—2020 h. ad ŚNIDu pamruć 68 młn. čałaviek. Dla paraŭnańnia: za apošnija 20 hadoŭ jon źniščyŭ tam 13 miljonaŭ.

Padličana, što ŭ Paŭdniova-Afrykanskaj Respublicy praź niekalki hadoŭ ŚNID zrobić śmiarotnaść siarod žycharoŭ 15—34 hadoŭ u 17 razoŭ bolšaj za naturalnuju.

Vielmi chutka pašyrajecca VIČ va Ŭschodniaj Eŭropie i Rasiei. Prablema, jakaja jašče niadaŭna tyčyłasia pieravažna narkamanaŭ, siońnia chvaluje “šyrokuju hramadzkaść”. Va Ŭkrainie až 25% novych zaražeńniaŭ — vynik hieteraseksualnych połavych znosinaŭ.

Epidemija pierš za ŭsio zakranaje moładź. Pałova novazaražanych maje ad 15 da 24 hadoŭ. Takich u śviecie ciapier bolš za 12 młn., i ich kolkaść štodnia pavialičvajecca na 6 tysiačaŭ čałaviek. 14 miljonaŭ dziaciej stracili z-za ŚNIDu prynamsi adnaho z baćkoŭ.

Eksperty AAN śćviardžajuć, što z pašyreńniem virusu možna zmahacca. Tak, va Ŭhandzie j Zambii, dziakujučy masavym papieradžalnym akcyjam, rost zachvorvańnia pačaŭ prykmietna mienšać. Va Ŭhandzie za apošnija dva hady kolkaść chvorych źniziłasia z 8,3% da 5% ad nasielnictva krainy.

Dla Biełarusi hetaje pytańnie taksama aktualnaje. Jak paviedamiła 2 lipienia na pres-kanferencyi hałoŭny doktar Respublikanskaha centru prafilaktyki ŚNIDu Lidzija Mialeška, na siońnia ŭ Biełarusi zarehistravanyja 4344 VIČ-infikavanyja. Na pieršym miescy Homielskaja vobłaść (2833 vypadki), dalej —Miensk (581 vypadak). 83,41% infikavanych składaje moładź 15—29 hadoŭ. Pašyreńnie infekcyi siarod žančyn vyklikaje rost kolkaści dziaciej, narodžanych ź virusam u kryvi. Usiaho ad VIČ-infikavanych maci naradziłasia 229 dziaciej, i 23 ź ich užo pastaŭleny adpaviedny dyjahnaz.

Hałoŭny epidemijolah Ministerstva achovy zdaroŭja Anatol Kažamiakin kaža, što pašyreńnie virusu pakul źviazanaje pierš za ŭsio z narkamanijaj (76,7% vypadkaŭ). U rehijonach adčynienyja ŭžo 34 punkty ananimnaha kansultavańnia narkamanaŭ. Tam jany mohuć atrymać šprycy j prezervatyvy, infarmacyjnuju, medyčnuju, kansultacyjnuju i psychalahičnuju dapamohu. Takija punkty naviedvajuć usiaho 3—10% biełaruskich narkamanaŭ, a dla dasiahnieńnia choć niejkaha efektu treba achapić 60—70%. Realnaja kolkaść narkamanaŭ u krainie dasiahnuła 40 tysiačaŭ, tady jak na ŭliku ŭ narkadyspanserach staić usiaho 7706 čałaviek, paviedamlaje BiełaPAN.

Pavodle słovaŭ Ł.Mialeški, prafilaktyka adnaho vypadku VIČ-infekcyi kaštuje 68 dalaraŭ, a lačeńnie chvoraha na ŚNID — 10 tys. dalaraŭ.

Pavodle Reuters, BiełaPAN