Klub analitykaŭ “Soniejka”

Klub analitykaŭ “Soniejka”

Našyja niezaležnyja adzin ad adnaho analityki viarnulisia z adpačynku, kab abmierkavać pachaładańnie ŭ biełaruska-rasiejskich adnosinach, vizyty Jelcyna i Prymakova j padrychtoŭku amerykanskim kanhresam Aktu pra demakratyju ŭ Biełarusi.

Fiadupa: Prymireńnie Haranta Kanstytucyi, jaki kinuŭ rasiejskich aliharchaŭ, z haspadarom Kramla pakul nie pajšło dalej abmienu vinšavańniami siaredniaj i małoj dalnaści. Z nahody 10-hodździa ŭstalavańnia dyplamatyčnych adnosinaŭ Pucin (ach, jaki duška!) pažadaŭ biełaruskamu narodu zdaroŭja i praćvitańnia, padkreśliŭšy tym samym, što Łukašenku jon nam na šyju nie sadžaŭ, dyk i zdymać nia budzie. Choć u Rasiei chapaje ŭpłyvu na terytoryju Biełarusi.

Kaściam: Pucin vaš, kali jamu ruki češucca adździalać katlety ad much pad amerykanskuju dudku, niachaj u Kanadzie heta robić, a da nas sa svajoj žujkaj nia suniecca. Bo kali što jakoje — my možam sabie słavianskich bratoŭ i ŭ Strasburzie znajści. Tam jakraz miesca pamiž Azerbajdžanam i Belhijaj pustoje.

Zmahar: Pravilna! U Strasburh! A tam i da Haahi niedaloka!

Kaściam: Da lumbahi tabie niedaloka! Ty, apazycyja, užo daŭno na ładan dychaješ, nie žyvieš, a mučyšsia. I palityčnaja eŭtanazija — najlepšaje dla ciabie vyjście, pakul nas z Eŭraźviazam nie pasvaryła. Jak zaŭsiody…

Kaladop: Darečy, kalehi, pavodle pravieranaj infarmacyi kampetentnych orhanaŭ, rychtujecca kardynalnaje abnaŭleńnie biełaruskaj apazycyi: na jaje abrynucca paprostu vadaspady śviežaj kryvi, u suviazi z vykładzienym u prajekcie amerykanskaha Aktu pra demakratyju ŭ Biełarusi punktam pra 40 młn. dalaraŭ, vydatkavanych na zmahańnie z režymam. Niezdarma ž naviedaŭ Miensk rasiejski palityk superciažkoj vahavaj katehoryi Jaŭhien Prymakoŭ. U časie pieramovaŭ z Harantam Kanstytucyi jany razhladali mahčymaść pierachodu Prymakova ŭ apazycyju. Mahčyma, jon navat uznačalić jaje.

Łabećka: E, stop! A jak ža…

Kaladop: …Dyj ź vizytam Barysa Jelcyna jahony pryjezd supadaje nia prosta tak. Samyja kampetentnyja krynicy śviedčać, što eks-prezydent Rasiei taksama mocna choča nazad va ŭładu.

Fiadupa: Źjeść to jon źjeść, jak kažuć… U Rasiei razumnyja ludzi žyvuć — nia toje, što ŭ nas. Jany razumiejuć, što viartańnie Jelcyna moža mieć dla krainy fatalnyja nastupstvy. Tamu rasiejskaje łobi ŭ Eŭraparlamencie skiruje ŭvieś upłyŭ jelcynskaha kłanu na mižnarodnyja struktury z tym, kab eks-prezydent Rasiei źmianiŭ Kofi Anana na pasadzie hienseka AAN. Tady Jelcyn zmoža bieśpieraškodna vykonvać rolu pasiarednika miž Maskvoj i Mienskam biez apasieńnia być pasiečanym na palityčny farš.

Kaściam: Dy vaš Jelcyn daŭno ŭžo tolki na toje hodny, kab vianki ŭ memaryjalnym kompleksie “Viskuli” ŭskładać. A vaš Prymakoŭ pradaŭ Radzimu — sajuz Biełarusi i Rasiei! Bo pajšoŭ słužyć judzie słavianskich narodaŭ Pucinu. A vaš aŭtar Aktu pra demakratyju Hiełmz, jak paviedamiŭ časopis “Nioman”, pakutuje na neŭralahičnyja rasstrojstvy i mazaičnuju psychapatyju — jon vystupaŭ suprać sajuzu Biełarusi j Rasiei, udziełu rasiejskaj zbornaj u matčy Brazylija—Niamieččyna, admaŭlaŭ isnavańnie boha Dža i adzinaj mytnaj prastory!

Zmahar: A ty sam i tvoj patron Hans Vik?

Łabećka: A što Vik?! A što Vik?!

Tut my musili zhasić śviatło i ŭklučyć pažarnuju syhnalizacyju, bo sprečka pahražała vyjści za miežy analityčnaha rynhu.