Liberały niasuć straty

Biełaruski dziaržaŭny ŭniversytet źmienić haspadara. Rektar Alaksandar Kazulin jedzie pradstaŭlać Biełaruś u AAN. Siarod kandydataŭ u rektary BDU — Žuk, Kucharčyk, Kraŭčanka i viečny dziadźka z Mahilova.

U piatnicu mižnarodnaja kamisija pałaty pradstaŭnikoŭ uchvaliła kandydaturu Kazulina. Siarhieja Linha, jaki dahetul byŭ pradstaŭnikom, vierahodna, nakirujuć na pensiju. Jon sioleta adznačyŭ 65-hodździe. Novaje pryznačeńnie Kazulina — hanarovaja ssyłka.

Ciaham apošniaha hodu A.Kazulin znachodziŭsia ŭ niapeŭnym stanoviščy. Paśla taho jak studenty BDU “niapravilna” prahałasavali na prezydenckich vybarach, rektara vyvieli z składu Savietu ministraŭ, a sam universytet pazbavili mnohich ilhotaŭ. Ceły hod A.Kazulin nia mieŭ peŭnaści, ci doŭha jašče prasiedzić u rektarskim fateli. Chadzili čutki, što rektarskuju mantyju jon moža źmianić na turemnuju robu. Sprava skončyłasia hanarovaj ssyłkaj. Choć liberalna-kapitalistyčnaja partyja ŭ łukašenkaŭskim atačeńni paniesła straty, asabista Kazulin, ličy, abyšoŭsia lohkim pierapudam.

Praz ssyłku ŭ AAN prajšli Hienadź Buraŭkin, źmieščany z pasady kiraŭnika BT, i eks-premjer S.Linh. Voś vierniecca Kazulin, małady j perspektyŭny, ź Ńju-Jorku “na biełym kani” — moža, tady i vyśvietlicca, ci daremna chadzili čutki pra vyłučeńnie jaho na prezydenta Biełarusi. Pahatoŭ, A.Kazulin pakidaje svaju VNU “sa ščytom”: 21 listapada skončyłasia padpisańniem mirnaha pahadnieńnia sprečka pamiž BDU i “Makdonaldzam”, dniami navukoŭcy ŭniversytetu atrymali dźvie Dziaržaŭnyja premii za vynachodki.

Chto stanie novym rektaram? Pasada važnaja navat u ahulnadziaržaŭnaj hijerarchii. Niezdarma BDU peŭny čas isnavaŭ jak asobnaje ministerstva, niepadkantrolnaje Minadukacyi. Mienavita ŭ BDU prachodziła aprabacyju 10-balnaja systema adznak. Jak pakazała pryznačeńnie prezydenta Akademii navuk, asoba moža być samaja niečakanaja.

Naŭrad ci rektaram zrobicca Ŭładzimier Zamiatalin, jakim pałochali studentaŭ hod tamu. Siońnia jon nastolki adyšoŭ ad spravaŭ, što ŭjavić jaho źjaŭleńnie ŭ bolš-mienš aktyŭnaj samastojnaj roli ciažka.

U kalidorach BDU najbolš imaviernym kandydatam ličycca pieršy namieśnik ministra adukacyi Alaksandar Žuk. Jon dobra viedaje ŭniversytet “ź siaredziny”: doŭhi čas pracavaŭ prarektaram, tutsama staŭ doktaram pedahahičnych navuk i prafesaram. Dyj dla samoha A.Žuka heta nia budzie panižeńniem.

Jość taksama imaviernaść, što hetuju pasadu zojmie siońniašni rektar Akademii kiravańnia Piatro Kucharčyk. Da pryznačeńnia A.Kazulina ŭ 1996 h. jon paŭhodu vykonvaŭ rektarskija abaviazki.

Abo — čamu b nia moh stać rektaram universytetu Piatro Kraŭčanka, niadaŭna adazvany ź Japonii? Heta zadavoliła b i jaho samoha, i nacyjanalnuju intelihiencyju, i ŭniversytet. Pahatoŭ, sam sp.Kraŭčanka ciapier “biaz pracy”.

Rektara hałoŭnaha ŭniversytetu krainy, biez sumnievu, budzie pryznačać A.Łukašenka. Darma što va ŭniversytecie pasada rektara vybarnaja: heta ž nie pieraškodziła ŭ 1996 h. zahadam pastavić A.Kazulina. Toj, praŭda, iznoŭ uvioŭ praceduru vybaraŭ rektara (u 2000 h.) i navat na biezalternatyŭnaj asnovie vyjhraŭ. Pahavorvajuć, što pasadu rektara A.Łukašenka ŭžo prapanavaŭ niekamu z mahiloŭskich čynoŭnikaŭ ad adukacyi.

Arkadź Šanski

• 0
• 0
• 0
• 0
• 0
• 0
• 0
• 0