Hramadzki arhkamitet pa śviatkavańni 750-hodździa karanacyi Mindoŭha na svaim pasiedžańni 16 studzienia vyrašyŭ dałučycca da dziaržaŭnych mierapryjemstvaŭ, ale i dadać bahata svaich. Była pryniataja prahrama śviatkavańnia, jakaja składajecca z 18 punktaŭ.
Plany ŭ siabroŭ arhkamitetu, jaki ŭznačalvaje historyk Anatol Hryckievič, napaleonaŭskija. Najpierš — damahčysia, kab u Navahradku źjaviłasia vulica Mindoŭha i centralnaja płošča horadu taksama nasiła jahonaje imia. Pa vajnie ŭ Navahradku isnavała vulica Mindoŭha, ale niedzie ŭ 70-ch jaje pieranazvali. Hetkija ž vulicy musiać źjavicca i ŭ inšych haradoch i miastečkach Biełarusi. U samim Navahradku, jak zaznačyŭ mastak Mikoła Kupava, treba ŭparadkavać haru Mindoŭha i zakłaści pomnik kniaziu. Pastavić pomnik sioleta nierealna — jaho niama jašče i ŭ prajekcie. Praspekt Mindoŭha i pomnik vialikamu kniaziu, jak było vyrašana na pasiedžańni, musiać taksama źjavicca i ŭ Miensku.
Jašče adzin krok dziela ŭšanavańnia pamiaci vialikaha kniazia i karala — patrabavańnie aficyjna viarnuć pieršaj stalicy VKŁ najmieńnie Navahradak.
Śviatkavańni nie abmiažujucca tolki prapanovami pierajmienavańniaŭ dy zakładkaj pomnikaŭ. Projduć vystavy dziciačaj tvorčaści i tvoraŭ siabroŭ Sajuzu mastakoŭ. 5 albo 6 lipienia (jak udasca arandavać zalu) adbudziecca ŭračystaje pasiedžańnie i śviatočny kancert. Arhkamitet pastanaviŭ dbać pra vypusk pamiatnaj jubilejnaj manety, a taksama admysłovych kanverta i marki, pryśviečanych Mindoŭhavaj karanacyi.
Aproč taho, było vyrašana damahčysia ad kiraŭnictva Opernaha teatru adnaŭleńnia opery «Kniaź Navahradzki». Pastanoŭka, jakaja vytryvała ŭsiaho niekalki pakazaŭ na pačatku 90-ch, była źniataja, kali kiraŭnikom teatru staŭ Siarhiej Kartes. Siońnia ŭsie dekaracyi i teatralnyja kaściumy ŭžo źniščanyja, ale operu možna adnavić u kancertnym vykanańni. Siabry hramadzkaha arhkamitetu ličać, što mienavita symbaličnym «Kniaziem Navahradzkim» musić pačacca ŭvosień novy operny sezon.
Jubilejnyja śviatkavańni z nahody Mindoŭhavaj karanacyi zaciahnucca amal na paŭhodu. Jano i dobra: nia kožny ž hod vypadaje taki znakavy jubilej.
Adam Voršyč
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary