Izrailcianie čakajuć Łukašenku

Prahnazavany pośpiech pravych na vybarach u izrailski Kneset 28 studzienia budzie aznačać zachavańnie «asablivych adnosinaŭ» miž uradami Šarona j Łukašenki.

Były šef KDB Hienadź Łavicki, jaki ŭžo siomy hod ačolvaje pasolstva ŭ Tel-Avivie, nie darma jeść svoj chleb. Mnohija izrailcianie stanoŭča aceńvajuć sučasny palityčny režym Biełarusi.

Na forumie virtualnaha biełaruskaha ziamlactva ŭ Izraili www.souz.co.il/belzem zdaŭna traplalisia zapisy kštałtu «mnie padabajecca, jak Łukašenka kiruje krainaj». Z 2000 h. pačalisia palityčnyja vandroŭki naziralnikaŭ-izrailcianaŭ na parlamenckija j prezydenckija vybary ŭ Biełaruś. Parušeńniaŭ jany, u adroźnieńnie ad eŭrapiejcaŭ, nie zaŭvažali nikoli. Uvosień 2001 h. Biełaruś naviedali deputaty Knesetu, municypalnyja čynoŭniki dy kiraŭniki Abjadnańnia vychadcaŭ ź Biełarusi. Ichnyja mierkavańni tranślavała BT, drukavali «Sovietskaja Biełoruśsija» i «Narodnaja hazieta». Mnie zapomnilisia słovy byłoha mienčuka Lava Zusmanoviča, pradprymalnika j sustaršyni zhadanaha Abjadnańnia: Zachad užyvaje padvojnyja standarty jak da Biełarusi, tak i da Izrailu, tamu davajcie zmahacca razam...

Pośpiecham biełaruskaj dyplamatyi staŭsia vizyt Łukašenki ŭ Izrail u pačatku 2000 h. BNF i Suśvietnaje zhurtavańnie biełaruskich habrejaŭ pratestavali tady, ale chto ich słuchaŭ... Ciapier pazytyŭny imidž biełaruskaha režymu stvarajecca praz udzieł supracoŭnikaŭ pasolstva Biełarusi ŭ festach i sustrečach «biełaruskich izrailcianaŭ», praź źnižki na pasłuhi kampanii «Biełavija» dla veteranaŭ vajny, a taksama praz prapahandu ŭ izrailskich ŚMI. Jakraz hod tamu źjaviŭsia štomiesiačny dadatak da hałoŭnaj rasiejskamoŭnaj izrailskaj hazety «Novosti niedieli» — «Diałoh: biełorusskije novosti». Z taho «Dyjalohu», jaki rychtuje kalektyŭ niebieźviadomaha «Hołasu Radzimy», možna daviedacca pra dobraje žyćcio habrejaŭ i niehabrejaŭ na prastorach našaj krainy.

Intyfada vyjaviła słabaści izrailskaha hramadztva, i mnohija imihranty, dyj nia tolki jany, tužać pa mocnaj ruce ŭ palitycy. Na tle habrejskaj demakratyi, kali ŭ parlamencie zasiadajuć pradstaŭniki dvuch dziasiatkaŭ partyj, Biełaruś sapraŭdy vyhladaje aazysam stabilnaści... Paśla strajkaŭ prybiralščykaŭ śmiećcia, kali Tel-Aviŭ robicca padobnym na klaaku, imihrantaŭ vabić čyścinia mienskich praspektaŭ. Pamiatajuć i pra toje, što kaliści na «Słavianskim bazary» ŭ Viciebsku pieramoh izrailcianin.

Jašče ŭletku 2000 h. bujny funkcyjaner partyi «Naš dom Izrail» kazaŭ mnie ŭ pryvatnaj hutarcy: «Izrailu patrebny taki lider, jak vaš Łukašenka». Hetak, vidać, miarkuje i kiraŭnik «Našaha domu», uradženiec Małdovy Avihdor Libierman, jaki dosyć časta naviedvaŭ Biełaruś u druhoj pałovie 1990-ch. Apošni jahony vizyt datujecca kastryčnikam 2001 h. Supravadžaŭsia jon šmatlikimi zajavami ab mižparlamenckim siabroŭstvie.

Prahnazavany pośpiech pravych na čale z Šaronam na vybarach u Kneset 28 studzienia moža ŭzmacnić aŭtarytarnyja tendencyi ŭ izrailskaj palitycy. Sp.Libierman, były ministar infrastrukturaŭ, viadomy, miž inšaha, prahaj da vykryvańnia karupcyi, maje ŭsie šancy znoŭ uvajści ŭ kaalicyjny ŭrad ad bloku «jastrabaŭ» «Nacyjanalnaje adzinstva». Ci zdoleje jon vykanać svaju prahramu (pryniaćcie Kanstytucyi, nadańnie dadatkovych paŭnamoctvaŭ prezydentu Izraila i orhanam vykanaŭčaj ułady, utvareńnie Rady Biaśpieki), pakaža čas. U lubym vypadku, kolišni žart «Vožyka» ab biełaruska-rasiejska-izrailskim chaŭrusie, abumoŭlenym chvalaj emihracyi, užo nie padajecca tolki žartam.

Volf Rubinčyk

• 0
• 0
• 0
• 0
• 0
• 0
• 0
• 0