Personal Depeche

Roznyja vykanaŭcy. «MSH Records», (p) 2002

Jašče adzin prykład umiełaj pracy pradusaraŭ, jakija ciaham ładnaha kavałku času «źlivali» infarmacyju pra hety albom — rychtavali publiku j muzyčnuju hramadzkaść da sustrečy z pryŭkrasnym — pieršym u historyi biełaruskaj papularnaj muzyki pryśviačeńniem tvorčaści suśvietnaj słavutaści. Byli navat čutki, što jaho zamovili rasiejcy, jakija vyrašyli praz muzyku «Depeche Mode» paznajomić svaju publiku z zahadkavaj biełaruskaj rokavaj dušoju.

Ale ŭsio było značna praściej: kampanija «Philips» źviarnuła ŭvahu na hety prajekt i ŭkłała ŭ jaho hrošy. I, musić, niebłahija — heta adrazu adčuvajecca, ledźvie pačynaješ słuchać albom.

Dyj pradusary spracavali jak maje być. Naležnym čynam naładzili padrychtoŭčy praces, potym — zapis materyjału, aznajomili z hatovym praduktam Marcina Hora i reštu «depešaŭ». Jak vynik — nivodnaj (pavodle słovaŭ Rusłana Makarava, Adama Starpoviča dy Andreja Chaładzinskaha, jany ž «MSH») zaŭvahi i navat dazvoł na volnaje vykarystańnie hetych zapisaŭ. Nie patrapili ŭ albom versii «Kramy», muzyki jakoj prosta spaźnilisia da vyznačanaha terminu, dy «Vicious Crusade», jakija sami admovilisia ad pracy, paličyŭšy, musić, takuju «papsu» nia vartaj uvahi sapraŭdnaha ekstremała.

Kožny vykanaŭca abiraŭ dla ŭvasableńnia što chacieŭ. U vyniku atrymaŭsia taki histaryčny ahlad tvorčaści «Depeche Mode» — ad najbolš rańnich, a tamu sapraŭdy jaskrava papsovych, až da pustavataści, tvoraŭ («See You» Ludmiły Kraŭcovaj) da opusaŭ apošniaha času, u jakich nieabyjaki talent Hora sapraŭdy dajecca ŭ znaki. Mianie hetaja rabota praniała dastatkova surjozna. Navat na Lapisaŭ z Trubiackimi zirnuŭ krychu inšymi vačyma, choć hetym razam i nie Michałok dakazvaŭ, što jon nibyta taksama vakalist.

U albomie sustrakaješ adrazu niekalki pryjemnych niečakanaściaŭ. «Nejra Dziubel», uzbroiŭšysia dziaŭčatami z hurtu «Huda», daŭ dobraha čadu, źjadnaŭšy «I Feel You» z narodnaj biełaruskaj melodyjaj. Musić, sierbanuŭ Hor z toj pieśniaj dobruju porcyju siurpryzu! Džazmeny z «Apple Tea» ładnieńka, vytančana abyhrali ŭ stylistycy smooth temu «It's No Good», a na adnym z kancertaŭ pryznalisia, što hanararu jašče nie atrymali. Dyk pjesa ž tak i nazyvajecca! «Kryvi» ŭ krychu niecharakternaj dla ich maniery (biez Masuda Talibani) pryjemnieńka vykanali «Freelove», «NRM» mahutna vydali «Personal Jesus», «Zet» prosta ŭrazili źlitnym, miasnym hukam u «Useless», Todar daskanała praśpiavaŭ «I Want You Now».

Adnak najlepšy numar albomu — heta instrumentalnaja jazyčnickaja imša na temu «Free State» ŭ vykanańni «Trojcy». Prybivaje da hleby jak piarun! Mienavita hetyja muzyki najmacniej prasiaklisia mistykaj muzyki «Depeche Mode», nadaŭšy joj miascovy kalaryt.

U toj ža čas krychu stracili siabie i Alaksiej Šadźko, i «Flat», i «Kali Juha», choć i zastalisia samimi saboj, vystupiŭšy nie jak prostyja intepretatary, a jak sapraŭdnyja suaŭtary «Depeche Mode».

Personal SŁUCHAČ

• 0
• 0
• 0
• 0
• 0
• 0
• 0
• 0