Novyja knihi, dasłanyja ŭ redakcyju

23 studzienia

Antyčnaja litaratura ŭ biełaruskich pierakładach: Staražytnaja Hrecyja: Chrestamatyja / Haradzienski dziarž. un-t imia Ja.Kupały. — Horadnia, 2002. — 226 s.

Nakładam usiaho 100 as. z paznakaju «Navučalnaje vydańnie» vyjšaŭ zbornik biełaruskich pierakładaŭ antyčnych aŭtaraŭ. Hetkaja chrestamatyja pry bolšym nakładzie j lepšym palihrafičnym azdableńni zaniała b hanarovaje miesca na palicach mnohich pryvatnych biblijatek. U knizie pradstaŭlenyja tvory Hamera, Sapfo, Anakreonta, Ezopa, Eschiła, Safokła, Arystotala, pierastvoranyja pa-biełarusku B.Taraškievičam, Ł.Barščeŭskim, A.Kłyškam, A.Žłutkam, Ju.Drejzinym. U «Akademknizie» chrestamatyja kaštuje kala 6000 rub.

Baradulin R. Zbor tvoraŭ: T. 4. Kryt. artykuły, uspaminy, lit. zapisy. — Miensk: Mastackaja litaratura, 2002. — 502 s.: ił.

U čaćviorty tom Zboru tvoraŭ paeta ŭvajšli krytyčnyja artykuły-«spodumki», aŭtabijahrafičnaja proza j viasiołyja abrazki z rodnaj Vušaččyny, a taksama «Vušacki słava

zbor» — sapraŭdnaja skarbnica niepaŭtornych dy daścipnych narodnych słovaŭ i «prybabuniek». Z krytyčnych materyjałaŭ paŭstajuć jaskravyja partrety V.Bykava, U.Karatkieviča, P.Pančanki, M.Stralcova, Ja.Janiščyc. Kaštuje blizu 6000 rubloŭ.

Krynica: Lit.-kulturalah. časopis. — 2002. — №11—12 (17).

Apošni numar litaraturnaha časopisu za 2002 h. adkryvajecca natatkami pra… Mienskuju kalcavuju darohu. Pad nazovam «Čym žyvie maładaja paezija...» drukujecca paviarchoŭny j niesystemny ahlad tvorčaści maładych aŭtaraŭ, jaki ź vialikaj dolaj umoŭnaści možna nazvać «litaraturnaj krytykaj».

U pahoniu: Zamaloŭki ź biełaruskaj «natury»: [Karykatury]. — B. m., B. h. — 68 s.

Zborničak hrafičnych pracaŭ Alesia Surovaha dziejničaje jak vybuchovaja pryłada. Prapanavaŭšy satyryčny varyjant asensavańnia palityčnaj sytuacyi ŭ Biełarusi, mastak jašče raz davioŭ, što śmiech — nia prosta leki ad usich chvarobaŭ, ale j mocnaja zbroja.

Šnip V. Vyratavańnie atrutaj; Rubleŭskaja Ł. Nad zamkavaj viežaj. — Maładečna, 2003. — 128 s. — (Biblijateka časopisu «Kuferak Vilenščyny»; №5).

Pad adnoju vokładkaju abjadnanyja dźvie paetyčnyja knihi — vieršy Viktara Šnipa, napisanyja ŭžo ŭ novym stahodździ, i raniej nie drukavanyja tvory Ludmiły Rubleŭskaj za roznyja hady. Kachańnie j śmierć, historyja j sučasnaść Biełarusi — asnoŭnyja temy. Ilustravała vydańnie sama Ł.Rubleŭskaja. Nakład knihi abmiežavany — 299 asobnikaŭ.

Janovič S. Nia žal pražytaha / Red. Ju.Chmialeŭski. — Biełastok, 2002. — 190 s.: ił. — (Biblijateka Biełaruskaha litaraturnaha abjadnańnia «Biełavieža». Kn. 40).

Uspaminy «hramadzianina Krynak» Sakrata Janoviča achoplivajuć 1936—2001 h. i «ad pieršaj asoby» znajomiać čytača ź losam biełarusa ŭ Polščy. Kniha dapoŭnienaja fatazdymkami j dakumentami, jakija śviedčać, što aŭtar atrymaŭ sapraŭdnaje pryznańnie siarod polskich dy eŭrapiejskich intelektuałaŭ.

Taciana Vabiščevič

• 0
• 0
• 0
• 0
• 0
• 0
• 0
• 0