Los "Krynicy" akreśliŭsia: 3 młn 123 tys. 738 akcyjaŭ mienskaha brovaru pieradali na piać hadoŭ u davierčaje kiravańnie "Pryjorbanku". Inicyjatyva zychodziła ad banku.
Skazać, što dziaržava addała najbujniejšamu pryvatnamu banku krainy kantrolny pakiet, značyć nie skazać ničoha - ciapier "Pryjorbank" trymaje 80,75% akcyjaŭ "Krynicy". Razam z akcyjami "Krynicy" ŭrad pieradaŭ "Pryjorbanku" niepryjemny abaviazak vieści pieramovy z "Bałtykaj" pra restrukturyzacyju kredytorskaj zapazyčanaści mienskaha brovaru. Ad 2001 h., ledźvie "Krynica" zrabiłasia adkrytym akcyjanernym tavarystvam, rasiejskaja kampanija "Bałtyka" pačała "svatacca", spadziejučysia atrymać kantrol nad "Krynicaj", adnak atrymała narešcie harbuza. U biudžecie mienskaha brovaru zastaŭsia bujny rasiejski kredyt. Ciapier bank budzie damaŭlacca, kab śpisać całkam ci choć by źmienšyć abjom taho kredytu.
Ale tut sprava nia tolki ŭ niaviernutaj pazycy. Ciapier štohod biełarus vypivaje 23,7 ł piva. U 2005 h. kožny z nas budzie spažyvać užo 51 ł burštynavaha napoju ŭ hod (prynamsi, tak vyrašyli "ŭhary"). Pry hetym impartnaja pradukcyja musić składać tolki 10% ad usiaho piva, što pradajecca ŭ krainie. Urad maryć, što praz try hady našyja brovary buduć varyć 72,4 młn dekalitraŭ piva štohod zamiest ciapierašnich 31,1 młn. I sapraŭdy: sioleta ŭpieršyniu ad 1998 h. naziraŭsia rost vytvorčaści biełaruskaha piva. Ale dla bujnoha zruchu brovary pavinny atrymać 111 młn dalaraŭ investycyjaŭ. "Pryjorbank" razam ź inšymi biełaruskimi bankami musić ukłaści ŭ brovarnuju vytvorčaść 75 młn ciaham niekalkich hadoŭ. Abranyja brovary atrymajuć bankaŭskija kredyty na lhotnych umovach: rublovyja - pa staŭcy refinansavańnia Nacbanku (31% hadavych), valutnyja - pad 10%. "Pryjorbanku", aproč "Krynicy", addaduć u davierčaje kiravańnie 85% akcyjaŭ brovaru "Bieraściejskaje piva", 75% - "Biełsoładu" dy kantrolny pakiet Połackaha brovaru, jaki jašče nie paśpieli zrabić akcyjanernym tavarystvam. Inšyja brovary musiać sami šukać dla siabie kredytoraŭ. A voś AAT "Lidskaje piva" dy "Alivaryja" nia majuć dziaržaŭnaj doli ŭ statutnych fondach - nie atrymajuć i kredytaŭ. Małyja ž brovary kali nie začyniać, dyk pieraabstalujuć na vyrab hazavanych napojaŭ dy kvasu.
Toj fakt, što los biełaruskaha piva davieryli "Pryjorbanku", šmat pra što kaža. Jaho kantrolny pakiet naležyć aŭstryjskaj bankaŭskaj hrupie "Raiffeisen". Zachodnieeŭrapiejski kapitał tryvała biarecca za biełaruskija pradpryjemstvy. I robić rynak biaź lišnich PR-akcyjaŭ dy medyjaskandałaŭ.
Aleś Kudrycki
Łukašenka pamiłavaŭ eks-kiraŭnika svajoj achovy Uciuryna6
Kamientary