Premii ad Šaramieta

19 vieraśnia, u čas praviadzieńnia «Dnia začynienych hazetaŭ», biełaruskim žurnalistam byli ŭručanyja premii «Za mužnaść i prafesijanalizm» imia Źmitra Zavadzkaha. Premiju, zasnavanuju rasiejskim «Pieršym kanałam» (były ORT), uručaŭ kiraŭnik adździełu specprajektaŭ infarmacyjnaj dyrekcyi kanału Pavał Šaramiet.

Laŭreatami stali nie aryštanty Markievič dy Ivaškievič, a fotakarespandent ahienctva AR Siarhiej Hryc, redakcyja «Biełorusskoj diełovoj haziety», a taksama fotakarespandent ahienctva «Reuters» Vasil Fiedasienka.

Rašeńnie ab uručeńni premii prymała ekspertnaja rada «Pieršaha kanału», paśla čaho jano było zaćvierdžanaje hieneralnym dyrektaram Kanstancinam Ernstam.

Dzień začynienych hazet i ŭručeńnie premij stali nahodaj dla praviadzieńnia «kruhłaha stała» pa prablemach niezaležnych ŚMI ŭ krainie. Atmasfera na im była dalokaj ad śviatočnaj. Sytuacyja pa-raniejšamu krytyčnaja: niezaležnych radyjostancyj niama zusim, ahulnanacyjanalnyja hazety možna paličyć na palcach adnaje ruki.

«Kab uzarvać manapoliju ŭłady na infarmacyju, niedziaržaŭnaja presa pavinna sfarmulavać novuju stratehiju dziejańniaŭ», — takuju dumku vykazała staršynia Biełaruskaj asacyjacyi žurnalistaŭ Žanna Litvina.

«Kalektyvy dvaccaci hazetaŭ pieražyli represii z boku ŭłady. Pa sutnaści, sudzili i pryciahvali da kryminalnaj adkaznaści našu prafesiju».

Asablivy niespakoj Ž.Litvinoj vyklikaje raspracoŭka novaha, drakonaŭskaha zakonu pra ŚMI. Paŭtara hodu tamu pabačyła śviet jaho pieršaja redakcyja. «Dziakujučy mižnarodnaj padtrymcy nam udałosia adciahnuć čas pryniaćcia novaha zakonu. Adnak, zychodziačy z najaŭnaj infarmacyi, možna mierkavać, što zakonaprajekt, jaki bližejšym časam pavinien pastupić na razhlad parlamentu, maje šerah abmiežavańniaŭ dla niedziaržaŭnaj presy, u tym liku kantrol dziaržavy nad Internetam i papiaredniuju cenzuru navat dla małatyražnych vydańniaŭ», — skazała Ž.Litvina.

Siabry rady BAŽ Leanid Mindlin i Dźmitry Padbiareski źviarnuli ŭvahu na nieabchodnaść stvareńnia alternatyŭnaj systemy raspaŭsiudu niedziaržaŭnaj presy.

Na dumku jašče adnaho vice-staršyni BAŽ Eduarda Mielnikava, varta pierajści da stvareńnia transhraničnaha televiaščańnia na 300 tys. spadarožnikavych anten, ustalavanych u krainie, a taksama pašyryć mahčymaści zamiežnaha vydańnia biełaruskich hazet i časopisaŭ.

Franc Subiel

• 0
• 0
• 0
• 0
• 0
• 0
• 0
• 0