U karčmie ŭ centry Prahi piva kaštuje mienš za 50 centaŭ, šykoŭnaja zasmažanaja śvinaja naha — kala 4 dalaraŭ i h.d. Za 5 dalaraŭ možna napicca i najeścisia na ŭvieś dzień. Plus prymalny ŭzrovień servisu, persanał razumieje pa-anhielsku. Možna prajścisia viačernim Mienskam i pašukać niešta padobnaje.
Dadajcie patrebu ŭ vizie, małuju viadomaść krainy, aŭtarytarny režym, Čarnobyl... Voś čamu adnolkavyja pa kolkaści nasielnictva Biełaruś i Čechiju naviedvajuć dva i sto miljonaŭ čałaviek u hod adpaviedna.
Urad znajšoŭ novuju panaceju, jakaja musić «vyciahnuć» viosku i vyrašyć ekanamičnyja prablemy krainy. Heta turyzm, asabliva jaho eka- i ahravaryjanty. Maŭlaŭ, tak i rvucca zamiežniki z svaich zabrudžanych mehapolisaŭ u biełaruskuju viosku «tanna i kamfortna» adpačyć. Ci maje heta pad saboj padstavy? Davajcie parazvažajem.
Turyzm — kapitałajomistaja halina. Zamožny inšaziemiec nia budzie chadzić u viaskovuju prybiralniu i biaz dušu žyć nia budzie. A zaarhanizavać narmalny pobyt va ŭmovach biełaruskaj vioski — jak minimum 10 tys. dalaraŭ! Voś čamu mnohija kurorty ŭ toj ža Polščy naležać niemcam ci aŭstryjakam: jany majuć nieabchodnyja kapitały, viedajuć, jaki servis patrebny ich suajčyńnikam, jak rabić pramocyju svaich pasłuhaŭ na patencyjnych rynkach. Tamu, kab pryciahnuć siudy zamiežnych turystaŭ, treba było b nie deklaracyi prymać, a, skažam, zdać voziera Narač u arendu niemcam. Tady b žychary Niamieččyny chutka daviedalisia i dzie Biełaruś znachodzicca, i jakija ŭ nas pryhožyja aziory dy redkija ptuški.
Jašče adna pamyłka — rabić staŭku na turystaŭ ź inšych krainaŭ. Zamiežny turyzm — sprava sezonnaja, nivodzin kurort nia zdoleje pracavać biaz stałaj płyni ajčynnych turystaŭ.
Krainy z vyznačanymi nacyjanalnymi admietnaściami pryciahvajuć značna bolš turystaŭ. Dośvied raźvićcia turystyčnaj spravy ŭ polskich Tatrach i na Mazurach u paraŭnańni z Sylezijaj i Pamorjem paćviardžaje hetuju tezu. Tamu zabudźma pra aziory, jakich u Finlandyi nieźličonaja kolkaść, pra busłoŭ, balšynia suśvietnaj papulacyi jakich hniazdujecca ŭ Polščy, i napierad — čytać pra Marka Šahała i Ihnata Damejku, hatavać stravy ź «Litoŭskaj haspadyni» dy varyć krambambulu!
Daminik Michajłovič
Kamientary