U minułuju niadzielu ŭ parafii Katedralnaha Saboru BAPC śv.Kiryły Turaŭskaha ŭ Bruklinie prajšoŭ 3-i Biełaruski festyval.
Ranicaj Śviatuju Liturhiju adpraviŭ a.Ihar Jakunin ź ijeradyjakanam Vasilom Kaściukom, pryhoža śpiavaŭ chor pad kiraŭnictvam Lidy Kano. Paśla słužby ŭsie sabralisia ŭ prybranaj ručnikami carkoŭnaj zali, dzie čakaŭ pryhatavany našymi achviarnymi parafijankami vybar smačnych biełaruskich stravaŭ — draniki, syrniki i h.d. Hetyja stravy parafijanki pradavali na vulicy pierad carkvoj, dzie ŭ hety dzień miascovyja amerykanskija arhanizacyi ładzili vialiki hadavy kirmaš, nazvany «Atlantic Antic». Šyrokaja vulica była na ceły dzień začynienaja, i na joj pavystaŭlali tavary sotni amerykanskich i roznaetničnych handlaroŭ. Biełaruskija stravy karystalisia dobrym popytam, i ŭvieś padrychtavany zapas byŭ pradadzieny jašče pierad kancom kirmašu.
Tym časam u carkoŭnaj zali pačałasia kancertnaja častka festyvalu. Našyja miłyja parafijanki-śpiavački Lida Kano i Ryma Prakopčyk pad akampanement Taciany Dziamieščyk vydatna praśpiavali niekalki biełaruskich pieśniaŭ. Novaj źjavaj na našaj scenie było tryjo Taciany Dziamieščyk, jaje dački Volhi dy Nastaśsi Stralec, vystup jakich vyklikaŭ zachapleńnie publiki. Apošniaja paradavała ŭsich jašče i solnym vykanańniem našych pieśniaŭ. Paśla kancertu była razyhranaja bahataja latareja, pieravažna z vyrabaŭ biełaruskaha narodnaha mastactva.
Barys Daniluk, Ńju-Jork
Kamientary