Kaplica na miescy saboru

A na miescy Małoha Haścinaha dvara — fantan. Unitarnaje pradpryjemstva «Mienskprajekt» ciškom padrychtavała novy prajekt.

Falšavańnie staroha Miensku skora budzie skončana. Va ŭnitarnym pradpryjemstvie «Mienskprajekt», jakoje jość faktyčna manapalistam na praviadzieńnie prajektnych rabotaŭ na Vierchnim horadzie, hetymi dniami davodziać da prezentacyi čarhovy prajekt.

Biez ahałoski dapracoŭvajecca dakumentacyja na dva abjekty. Na miescy, dzie stajaŭ renesansavy sabor Śviatoha Ducha, uzarvany kamunistami ŭ 1937 hodzie, ciapier dla Maskoŭskaha Patryjarchatu pabudujuć kaplicu (vyšynia 6 metraŭ). Prosta na staražytnych padmurkach, nie zvažajučy na kulturny słoj. Vyznačanaje miesca – prykładna za padmurkami byłoha hałoŭnaha fasadu saboru, uhłyb hałoŭnaj navy na 2 mietry.

Usio heta, atrymlivajecca, dziela taho, kab RPC zastaŭpiła terytoryju, kab nichto tam ničoha nie planavaŭ adbudoŭvać.

A na miescy byłoha budynka małoha haścinaha dvara (pł.Svabody, 19‑21) (pravaruč ad hałoŭnaha fasadu ciapierašniaha pravasłaŭnaha budzie... basejn z fantanam. Staršynia harvykankamu Michaił Paŭłaŭ užo ŭchvaliŭ hetyja prajekty.

Biełaruskaja respublikanskaja navukova‑mietadyčnaja rada pa pytańniach historyka‑kulturnaj spadčyny pry Ministerstvie kultury čarhovy raz uchvaliła čarhovy akt vandalizmu.

Choć, u adpaviednaści z pastanovaj Savietu Ministraŭ ad 12 kastryčnika 2004 h. №1271 «Pra zaćvierdžańnie Kompleksnaj prahramy rekanstrukcyi, restaŭracyi, adnaŭleńnia i dobraŭparadkavańnia histaryčnaha centru h.Miensku na 2004‑‑2010 hady» harvykankam unios abodva hetyja abjekty ŭ Śpis budynkaŭ i zbudavańniaŭ historyka‑kulturnaj spadčyny ŭ miežach histaryčnaha centru. Sami pryniali, sami parušym...

Kali prajekty realizujucca, stary horad stanie jašče mienš padobny da taho, jakim jon byŭ. Źmianšajucca šancy na adnaŭleńnie Vierchniaha horadu ŭ cełaści — kvartału ščylnaj baročnaj zabudovy. Biaz hetaha genius loci, duch miesca staroha Miensku, tracicca niezvarotna. Zamiest hetaha krok za krokam Vierchni horad nasyčajecca rasiejskimi architekturnymi elementami, jakich jon histaryčna nia viedaŭ.

Siarhiej Chareŭski

• 0
• 0
• 0
• 0
• 0