Para padvieści rysu pad palemikaj vakoł artykułu «Tłustaja rysa pad minułym».
U joj skryžavali piory publicysty niezaležnych vydańniaŭ. Nivodnaja dziaržaŭnaja hazeta na palemiku nie adhuknułasia. Što moža być bolš pakazalnym? Ideja «tłustaj rysy» ŭzamien za demakratyju niasvoječasovaja. Heta i jość hałoŭnaj vysnovaj. Dyskusija była biez karyści? Nie, abmierkavanyja idei kaliści buduć zapatrabavanyja. Spadziajusia, što chutka. Tłustaja rysa — heta lepš, čym źviadzieńnie rachunkaŭ, bo heta šaniec viarnuć krainu ŭ siamju eŭrapiejskich demakratyj. Praŭda, dla hetaha spačatku apazycyja pavinna stać mocnaju, kab u krainie ŭźnikła raŭnavaha siłaŭ. Naprykład, vyjhrać parlamenckija vybary abo arhanizavać paśpiachovy bajkot. (Što z hetaha — staronka 3.)
Rychtujecca sud nad padazravanymi ŭ dačynieńni da źniknieńniaŭ apazycyjaneraŭ. Jon maje raspačacca nie ŭ Biełarusi, na žal, a za miažoju. Mahčyma, u Belhii. A voś Halina Žuraŭkova i Jahor Rybakoŭ siadziać u ajčynnaj turmie. Jość niejkaja zahadka ŭ takim adnačasovym aryšcie i tych «źlivach infarmacyi», jakija jaho atačajuć. Nikoha nia dzivić sam fakt złoŭžyvańniaŭ blizkich da Łukašenki ludziej. «Nad Kiraŭnictvam spravaŭ prezydenta visić pieršarodny hrech», — pišuć naviny.by. Čamu ciapier i čamu hetych aryštavali? Najpieršaje tłumačeńnie — pierad važnymi palityčnymi kampanijami ŭłady starajucca choć čym padtrymlivać svaju papularnaść. U takim razie, padvojny aryšt śviedčyć pra histeryku ŭ kalidorach ułady, vyklikanuju hazavym presynham. «Hazprom» uciahvaje ŭ «kanflikt haspadarčych subjektaŭ» polskich i niamieckich spažyŭcoŭ hazu. Upieršyniu za doŭhi čas vakoł Biełarusi pačynaje razyhryvacca surjoznaja mižnarodnaja hulnia, na jakuju administracyja Łukašenki nia maje ŭpłyvu.
Čytačy padtrymali Redakcyju ŭ jaje zakliku «Ni rubla parazytam» («NN» №5). U pošcie hetaha tydnia jość niamała cikavych listoŭ na hetuju temu (staronka 10).
Ese Alaksandra Sałžanicyna «Žyć bieź iłžy» ź ciažkaściu, ale paddałosia pierakładu na biełaruskuju movu. Prablemy byli vyklikanyja indyvidualizmam i racyjanalizmam biełarusaŭ, što adroźnivaje nas ad rasiejcaŭ. My i z manoj zmahajemsia inakš, adnak zadumacca ese prymušaje i nas, i ciapier (staronka 15).
Andrej Dyńko
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary