Vybar raście. Tyražy padajuć

Vystava «Knihi Biełarusi-2004» — najvažniejšaja padzieja hodu dla vydaŭcoŭ. Adnak sioleta ź joju kankuruje inšaja, nia mienš značnaja: pierarehistracyja, jakuju ŭsie vydavieckija struktury musiać prajści da 1 sakavika.

Pierarehistracyja licenzijaŭ — nie adzinaja prablema knihavydaŭcoŭ. Dla vydaviectvaŭ, što specyjalizujucca na biełaruskamoŭnaj litaratury, minuły hod adznačyŭsia rezkim padzieńniem nakładaŭ. Pa-biełarusku knižnaj pradukcyi ŭ paraŭnańni z papiarednim hodam vyjšła na 13,9% bolš pa nazvach, ale na 19,4% mienš pa tyražy (hł. tablicy).

Biełaruskija knihi nie byli absalutnymi haspadarami na sioletniaj, adzinaccataj pa liku vystavie. Udzieł u joj uziali 400 vydaŭcoŭ i raspaŭsiudnikaŭ, u tym liku 180 biełaruskich, bolš za 60 rasiejskich i kala 20 ukrainskich. Infarmacyjnyja stendy zrabili ZŠA, Kitaj, Niamieččyna, Słavakija, Francyja, Švecyja i 22 arabskija krainy na stendzie Lihi arabskich dziaržavaŭ. Na pieršym paviersie vystaŭnaha centru «BiełEkspa» raźmiaściłasia «ofisnaja» častka, na druhim išoŭ razdrobny prodaž.

Zaprašeńni na prezentacyi hučali tolki na «druhoj dziaržaŭnaj», ale biełaruskija vydaŭcy ŭsio ž trymalisia biełaruskaj. Byli j «razynki»: tak, «Mastackaja litaratura» na svaju prezentacyju zaprasiła Ŭładzimiera Puzyniu z surmoj. Rasiejskaje vydaviectva «Rosmen» pryjechała z hałoŭnaj svajoj «fiškaj» — pierakładam čarhovaha ramanu pra nizkavokaha tynejdžera z paranarmalnymi zdolnaściami. Pryčym «Hary Poter i Orden Feniksa» na vydavieckim stendzie čamuści kaštavaŭ daražej, čym u razdrobnych handlaroŭ na druhim paviersie. Na jatkach apošnich panavała pradukcyja rasiejskich vydaviectvaŭ. Biełaruskija, zdavałasia, traplali tudy tolki vypadkova.

Asnoŭnaja pryčyna — nizkaja pakupnickaja zdolnaść čytačoŭ biełaruskamoŭnaje pradukcyi, ličyć hałoŭny redaktar vydaviectva «Encyklapedyks» Źmicier Kołas: «Tamu na pieršym planie stanovicca kiłbasa, a knihi, teatry — na druhim». Hałoŭny redaktar vydaviectva «Technalohija» Źmicier Sańko jašče bolš kateharyčny: «Adbyvajecca razbureńnie biełaruskaha knižnaha rynku, vyklikanaje nizkaj pakupnickaj zdolnaściu». Dyrektar vydaviectva «Knižnyj dom» kandydat filazofskich navuk Siarhiej Kuźmin adznačaje, što ŭ vyniku takoj sytuacyi vydaŭcy pačynajuć aryjentavacca na rasiejski rynak: «Vyžyć tolki na biełaruskim paprostu niemahčyma: čym bolšyja nakłady, tym tańniej kniha abychodzicca».

Poŭny varyjant artykułu hladzicie ŭ hazecie "Naša Niva".

Vieranika Dziadok,

Źmicier Dziadzienka

• 0
• 0
• 0
• 0
• 0
• 0
• 0
• 0